Read Uab Meto NEHEMIA 10 Bible Online

NEHEMIA 10 - Uab Meto bible

NEHEMIA 10

¹Atoni ahunut le antui in kanan esle' Kumlol Nai Nehemia Nai Hakhalya anmone. Oke te Nai Zedekia. Nalali te atoni-atoni i antui sin kankenu amsa:

²Ale Ana' fuat knino Nai Seraya, Nai Azarya, Nai Yeremia, Nai Pasyhur, Nai Amarya, Nai Malkia, Nai Hatus, Nai Sebanya, Nai Malukh, Nai Harim, Nai Meremot, Nai Obaja, Nai Daniel, Nai Gineton, Nai Barukh, Nai Mesulam, Nai Abia, Nai Miyamin, Nai Maazya, Nai Bilgai ma Nai Semaya.

⁹Atoni-atoni Lewi Nai Yesua Nai Azanya anmone, Nai Binui nonot Nai Henadad sufan, Nai Kadmiel, Nai Sebanya, Nai Hodia, Nai Kelita, Nai Pelaya, Nai Hanan, Nai Mikha, Nai Rehob, Nai Hasabya, Nai Zakur, Nai Serebya, Nai Sebanya, Nai Hodia, Nai Bani ma Nai Beninu.

¹⁴To sin anakaf Nai Paros, Nai Pahat-Moab, Nai Elam, Nai Zatu, Nai Bani, Nai Buni, Nai Azgad, Nai Bebai, Nai Adonia, Nai Bigwai, Nai Adin, Nai Ater, Nai Hizkia, Nai Azur, Nai Hodia, Nai Hasum, Nai Bezai, Nai Harif, Nai Anatot, Nai Nebai, Nai Magpias, Nai Mesulam, Nai Hezir, Nai Mesezabeel, Nai Zadok, Nai Yadua, Nai Pelaca, Nai Hanan, Nai Anaya, Nai Hosea, Nai Hananya, Nai Hasub, Nai Halohes, Nai Pilha, Nai Sobek, Nai Rehum, Nai Hasabna, Nai Maaseya, Nai Ahia, Nai Hanan, Nai Anan, Nai Malukh, Nai Harim ma Nai Baana.

²⁸Hai, to Israel, ale Ana' fuat knino atoni-atoni Lewi, ale apao eno Ume UISNENO, ale asit ma ameput anbi Ume UISNENO, ale hai fenai ma hai anah-anah sin le sin nanae nalali he sin nahin ma ale atoni le natuin Plenat Uisneno ma anbeti nalali sin aonken na'ko atoni amnemat le natua anbi hai pah.

²⁹Hai al-al kai oke nekaf mese mok ale hai nakaf sin ma amsup he moni mituin Plenat Uisneno le In anfe nalali neu kai nao nok In ate Nai Musa. So nati' Uisneno anfe kasat neu kai leka hai ka minokab fa lasi manta'en i. Hai amsup of hai mo'e mituin ale plenat, ale a'an ma lekat lulut na'ko UISNENO, hai Uisneno.

³⁰Hai amsup neu of hai ka mafe ma mamone fa mok uf-uf amnemat le natua nok kai anbi hai pah.

³¹Leka atoni uf amnemat anlomi he nasosa neu kai ane kase ai bale sa' anbi Neno Snasat ai anbi neno knino bian anteni, hai of kam sos mani fa. Ma anbi ton hitu, hai of ka mepu fa lene ma hai of kam toti fa tusa.

³²Anbi ton mese-mese hai es-es of mitnat noni muti gram nim neu tuthae Ume UISNENO.

³³Hai of miloitan ale sa'-sa' neu luli besa anbi Ume UISNENO, esle': utunu' tnatas, fua tulu ane kase anbi neno-neno, mu'it neu fua tulu mnotu anbi neno-neno, fua tulu bian anteni, fua tulu sako sanat Israel, ma ale sa' le he natulu anbi Ume UISNENO.

³⁴Hai, to, ale Ana' fuat knino ma atoni-atoni Lewi, hai of amhel sulat anbi ton-ton hem lek nonot me es he naloitan hau hopit neu ale fua tulu le natulu neu UISNENO, hai Uisneno, natuin lekat lulut Plenat knino.

³⁵Anbi ton-ton hai of meki hai ane kase anakan ma hai hau fua ahunut le namnatu anbi hau sin ukenu neu Ume UISNENO.

³⁶Hai of meki hai anmone ale'u ta'uf neu ale Ana' fuat knino anbi Ume UISNENO he natulu nani neu Uisneno, natuin lekat lulut Plenat Knino. Hai of mina'at hai bijae ana' sin amsa, hai bibi kase ana' sin amsa ai hai bibi ana' sin le nahoni nahunun sin.

³⁷Of anbi ton-ton hai meki ut ane kase nakan le maselo neu hen tunu utunu' neu ale Ana' fuat knino anbi Ume UISNENO, onane amsa fua tulu bian esle' tua mina mtasa, mina bub fua mina ma ale hau fua bian anteni. Of hai meki hai fua tulu bati bo' na'ko hai lene in afan neu atoni-atoni Lewi le sin naiti fua tulu bati bo' anbi kot-kot bale lene.

³⁸Mes Ana' fuat knino mese na'ko Nai Harun sufan in mes nok atoni-atoni Lewi nane leka sin naiti ale fua tulu nane. Ma fua tulu bati bo' na'ko ale fua tulu nane atoni-atoni Lewi sin mes neki neu ke'an-ke'an amaus anbi Ume UISNENO.

³⁹To Israel ma atoni-atoni Lewi sin mes neki ale tnatas ane kase, tua mina mtasa ma mina bub fua mina neu ke'an-ke'an bale nabela ale bale' Ume UISNENO. Ale Ana' fuat knino le fe antuthae, ale apao eno Ume UISNENO ma ale asit sin natua anbi bale nane. Hai of ka misaitan fa hai UISNENO In Ume.