Read Uab Meto NEHEMIA 11 Bible Online

NEHEMIA 11 - Uab Meto bible

NEHEMIA 11

¹Ale nakaf sin nabala anbi Yerusalem ma to anhelan sulat hen beti ume mese na'ko ume bo'mese le mes he natua anbi kot knino Yerusalem. Le ka mabeti nabe'i sin natua anbi kot-kot bian.

²Anbi sin anmu'i le natua nabala anbi Yerusalem, ma to naliatas sin.

³Anbi kot-kot bian, to Israel, ale Ana' fuat knino, atoni-atoni Lewi, ale ameput Ume UISNENO, ma ate-ate na'ko Nai Salomo sin natua anbi bale sin ini kun ma anbi kot-kot sin ini kun.

⁴Atoni fauk-fauk na'ko uf Yehuda ma uf Benyamin sin natua anbi Yerusalem. I sin kankenu le matui anbi sulat: Sin le na'ko uf Yehuda: Nai Ataya Nai Uzia anmone ma Nai Zakharia upuf. Fauk-fauk na'ko sin amfenu esle': Nai Amarya, Nai Sefaca ma Nai Mahalaleel, Nai Peres, Nai Yehuda. Sin amfauken atoni abe'it ma matani 468. Nai Maaseya Nai Barukh anmone ma Nai Kolhoze upuf. Fauk-fauk na'ko sin amfenu esle': Nai Hazaya, Nai Adaya, Nai Yoyarib, Nai Zakharia, Nai Syela, Nai Yehuda.

⁷Sin le na'ko uf Benyamin: Nai Salu Nai Mesulam anmone ma Nai Yoed upuf. Fauk-fauk na'ko sin amfenu esle': Nai Pedaya, Nai Kolaya, Nai Maaseya, Nai Itiel ma Nai Yesaya. Nai Gabai ma Nai Salai. Sin mabia benu mahaumak nok Nai Salu. Sin amfauken atoni 928

⁹ma Nai Yo'el Nai Zikri anmone es anfani nakaf neu sin ma in atuntakus, es Nai Yehuda Nai Hasenua anmone.

¹⁰Ale Ana' fuat knino: Nai Yedaya Nai Yoyarib anmone ma Nai Yakhin. Nai Seraya Nai Hilkia anmone ma Nai Mesulam upuf. Fauk-fauk na'ko sin amfenu esle': Nai Zadok, Nai Merayot, Nai Ahitub le in es ana' mepu Ana' Fuat Knino Amnanut.

¹²Ana' fuat knino le antuthae anbi Ume UISNENO sin amfauken ok-oke 822. Nai Adaya Nai Yeroham anmone Nai Pelalya upuf. Fauk-fauk na'ko sin amfenu esle': Nai Amzi, Nai Zakharia, Nai Pasyhur ma Nai Malkia.

¹³Nakaf-nakaf anbi ume nane sin ok-oke atoni 242. Nai Amasai Nai Asareel anmone ma Nai Ahzai upuf. Sin amfenu bian esle': Nai Mesilemot ma Nai Imer.

¹⁴Na'ko nonot i anmu'i meo pa'e abe'it ma matani atoni 128. Sin anakaf es Nai Zabdiel Nai Gedolim anmone.

¹⁵Atoni-atoni Lewi: Nai Semaya Nai Hasub anmone ma Nai Azrikam upuf. Sin amfenu bian es Nai Hasabya ma Nai Buni. Nai Sabetai ma Nai Yozabad, atoni-atoni Lewi makana le anpanat mepu anbi Ume UISNENO kotin. Nai Matanya Nai Mikha anmone Nai Zabdi upuf, na'ko Nai Asaf sufan. In anfani nakaf neu ale asit sin neu onen totis tulu nekaf. Nai Bakbukya anfani atuntakus neu Nai Matanya. Nai Abda Nai Samua anmone ma Nai Galal upuf na'ko Nai Yedutun sufan. Sin amfaukenu ok-oke atoni 284.

¹⁹Ale apao eno naek sin: Nai Akub, Nai Talmon ma sin biafenu. Sin amfaukenu ok-oke atoni 172.

²⁰To Israel, ale Ana' fuat knino ma atoni-atoni Lewi bian anteni, sin natua anbi sin bale anbi kot-kot anbi Yehuda.

²¹Ale ameput anbi Ume UISNENO sin natua anbi bale bian kanan Ofel anbi kot Yerusalem. Sin anmepu ma Nai Ziha ma Nai Gispa es anfani nakaf neu sin.

²²Nakaf atoni-atoni Lewi le natua anbi Yerusalem es Nai Uzia Nai Bani anmone ma Nai Hasabya upuf. Sin amfenu bian es Nai Matanya ma Nai Mikha. In antam nonot Nai Asaf, le in es naloitan asit anbi Ume UISNENO.

²³Mepu neu nonot mese-mese le he naloitan sit anbi Ume UISNENO anbi neno-neno anlek nani natuin lekat lulut na'ko kesel.

²⁴Nai Petahya Nai Mesezabeel anmone na'ko nonot Nai Zera ma uf Yehuda, in anfani atuntakus Israel anbi sonaf Persia.

²⁵Amfaun na'ko to sin natua anbi kot-kot le anhaumak nok ale sin lene. Atoni fauk-fauk na'ko uf Yehuda sin natua anbi bale Bersyeba aon bian neno ne'u ma Nonof Hinom aon bian neno a'li sin atnanan. Sin natua anbi kot-kot i nok kuan-kuan funam natef: Kiryat-Arba, Dibon, Yekabzeel, Yesua, Molada, Bet-Pelet, Hazar-Sual, Bersyeba, Ziklag, Mekhona, En-Rimon, Zora, Yarmut, Zanoah, Adulam, Azeka, Lakhis.

³¹Atoni fauk-fauk na'ko uf Benyamin sin natua anbi Geba, Mikhmas, Ai, Betel ma kuan-kuan le anhaumak anbi nane,

³²anbi Anatot, Nob, Ananya,

³³Hazor, Rama, Gitaim,

³⁴Hadid, Zeboim, Nebalat,

³⁵Lod, Ono ma anbi Nonof Apakaet sin.

³⁶Atoni Lewi pukan fauk-fauk le afi sin natua anbi pah Yehuda anlelu sin natua nabua nok atoni-atoni Benyamin.