Read Uab Meto NEHEMIA 12 Bible Online

NEHEMIA 12 - Uab Meto bible

NEHEMIA 12

¹Le i ale Ana' fuat knino ma atoni-atoni Lewi le anfani nem na'ko bale mapolin nok Nai Zerubabel Nai Sealtiel anmone ma nok Ana' Fuat Knino Amnanut Nai Yesua:

²Ale Ana' fuat knino: Nai Seraya, Nai Yeremia, Nai Ezra, Nai Amarya, Nai Malukh, Nai Hatus, Nai Sekhanya, Nai Rehum, Nai Meremot, Nai Ido, Nai Ginetoi, Nai Abia, Nai Miyamin, Nai Maaja, Nai Bilga, Nai Semaya, Nai Yoyarib, Nai Yedaya, Nai Salu, Nai Amok, Nai Hilkia, ma Nai Yedaya. Sin le nane Ana' fuat knino nakaf anbi batan Nai Yesua.

⁸Atoni-atoni Lewi: Nakaf sit tulu nekaf: Nai Yesua, Nai Binui, Nai Kadmiel, Nai Serebya, Nai Yehuda ma Nai Matanya.

⁹Asit anbi pukan asit le ansi sit matonis es: Nai Bakbukya, Nai Uni ma in biafen nonot mese.

¹⁰Ana' Fuat Knino Amnanut Nai Yesua in sufan esle' i: Nai Yesua, Nai Yoyakim, Nai Elyasib, Nai Yoyada,

¹¹Nai Yonatan, Nai Yadua.

¹²Le i sul kanaf ale Ana' fuat knino nakaf nok sin nonot sin leka Nai Yoyakim antuthae on Ana' Fuat Knino Amnanut: [Ana' fuat knino] — [Nonot] Nai Meraya — Nai Seraya Nai Hananya — Nai Yeremia Nai Mesulam — Nai Ezra Nai Yohanan — Nai Amarya Nai Yonatan — Nai Melikhu Nai Yusuf — Nai Sebanya Nai Adna — Nai Harim Nai Helkai — Nai Merayot Nai Zakharia — Nai Ido Nai Mesulam — Nai Gineton Nai Zikhri — Nai Abia ... — Nai Minyamin Nai Piltai — Nai Moaja Nai Samua — Nai Bilga Nai Yonatan — Nai Semaya Nai Matnai — Nai Yoyarib Nai Uzi — Nai Yedaya Nai Kalai — Nai Salai Nai Heber — Nai Amok Nai Hasabya — Nai Hilkia Nai Netaneel — Nai Yedaya

²²Sul kanaf antom nakaf-nakaf atoni Lewi sin ume nanan ma Ana' fuat knino sin ume nanan matui nalali anbi batan ale Ana' Fuat Knino Amnanut i: Nai Elyasib, Nai Yoyada, Nai Yohanan, ma Nai Yadua. Tuis nane namsopu leka Nai Darius in ana' aplenat on kesel Persia.

²³Mes antom nakaf-nakaf ume nanan nonot Nai Lewi al matui antia batan Nai Yonatan Nai Elyasib upuf.

²⁴Atoni Lewi sin anakaf sin Nai Hasabya, Nai Serebya, Nai Yesua, Nai Binui ma Nai Kadmiel, anbati atoni Lewi pukan-pukan. Hae es te pukan nua es antuthae naliatas UISNENO ma natnat onen totis neu In ma anmatonin natuin lekat lulut Kesel Nai Daud, Uisneno In ate nane.

²⁵Ale apao eno naek Ume UISNENO le anlek sin hen panat ale ke'an-ke'an amaus anhaumak eno naek Ume UISNENO esle' Nai Matanya, Nai Bakbukya, Nai Obaja, Nai Mesulam, Nai Talmon ma Nai Akub.

²⁶Sin le anmoni anbi batan Nai Yoyakim Nai Yesua anmone ma Nai Yozadak upuf ma anbi batan Gubernur Nai Nehemia ma Ana' Fuat Knino Nai Ezra, ahinet Plenat Knino nane.

²⁷Leka naki'at baki lape kot Yerusalem, no'en ale atoni-atoni Lewi na'ko ale bale le sin natua anbine, he nati' sin nok naliatas lasi nane, neki ale sit tulu nekaf, ma neki heo ma biola.

²⁸Ale asit na'ko Nai Lewi in ume nanan sin nabuabon, he na'ko bale Yerusalem kotin, ai he na'ko kot-kot anfun natef Netofa,

²⁹na'ko Bet-Gilgal, Geba ma Asmawet.

³⁰Ale Ana' fuat knino ma atoni-atoni Lewi nane sin anmo'e luli besa naknino sin aon nalali te neu to, neu eno-eno naek sin ma baki lape kot.

³¹Au hone ale anakaf Yehuda he sin ansae neu baki lape fafon he sin anlek pukan anaek nua le of anao maakatuin anfun natef kot ma ansi sit tulu nekaf neu Uisneno. Pukan ahunut anao maakatuin anbi baki lape fafon, an ali ne'u, neu Eno Naek Knutu.

³²Nai Hosaya in anao natuin asit sin kotin, ma ale anakaf atoni Yehuda bian anteni sin natuin.

³³Ale Ana' fuat knino i sin nao natuin sin kotin, ma anfu to'is esle': Nai Azarya, Nai Ezra, Nai Mesulam, Nai Yehuda, Nai Benyamin, Nai Semaya ma Nai Yeremia. Ma Nai Zakharia Nai Yonatan anmone Nai Semaya upuf natuin sin. Fauk-fauk na'ko sin amfenu esle': Nai Matanya, Nai Mikha, Nai Zakur na'ko nonot Nai Asaf.

³⁶Anbi in kotin in-ini sin natuin in: Nai Semaya, Nai Azareel, Nai Milalai, Nai Gilalai, Nai Maai, Nai Netaneel, Nai Yehuda ma Nai Hanani. Sin al-al sin neki ale bale sit, papmese onle afi Kesel Nai Daud, Uisneno In ate nane. Ana' Fuat Knino Nai Ezra, ahinet Aplenat Uisneno, anao anbi pukau maakatuin sin a'nakan bale sit sin.

³⁷Leka sin nem antia Eno Naek Oe Tunu sin anpeo ma ansae natuin sonaf elak Nai Daud in Kot, anao natuin sonaf Nai Daud, oke te anfani neu baki lape anbi Eno Naek Oe anbi kot aon neno saen.

³⁸Pukan asit mese anteni sin anao natuin baki lape fafon an ali anao neu a'li, ma au ok to bian hai mituin sin. Hai amnao mituin Elfatu Ai ma hai antia Baki Lape Menuan.

³⁹Oke te hai amnao mok Eno Naek Efraim, Eno Naek Mna, Eno Naek Ika, Elfatu Hananeel ma Elfatu Mea antia Eno Naek Bibi kase. Hai misnas amhaumak Eno Naek Bale Paot anhaumak Ume UISNENO.

⁴⁰Nalali te asit pukan nua sin nem antia anhaumak Ume UISNENO. Anesi na'ko ale anakaf le sin nok kau,

⁴¹onane amsa ale Ana' fuat knino le sin anfu to'is sin nok kau amsa. Sin le nane es: Nai Elyakim, Nai Maaseya, Nai Minyamin, Nai Mikha, Nai Elyoenai, Nai Zakharia ma Nai Hananya;

⁴²Nai Maaseya, Nai Semaya, Nai Eleazar, Nai Uzi, Nai Yohanan, Nai Malkia, Nai Elam ma Nai Ezer. Ale asit sin ansi ma Nai Yizrahya es anfani nakaf neu sin.

⁴³Anbi neno nane fua tulu amfau le'uf le natulu neu UISNENO. To namlil ma namoke natuin Uisneno anfe nalali neu sin ua alekot. Ale bife ma li'ana sin nok amsa anbi fesat nane, ma sin hankenu le namlil ma namoke nane manena na'ko a'lo.

⁴⁴Anbi tabu nane anlek atoni apaot fauk-fauk hen panat ale ke'an-ke'an amaus bale nabela ale atnatas neu Ume UISNENO, fun ale fua tulu bati bo' ma pah in afan ahunut anbi ton-ton. Ale apaot nane sin mes he nabuab ale atnatas nane na'ko ale lene le anfun natef kot-kot. Ale atnatas nane sin nana'at neu ale Ana' fuat knino ma atoni-atoni Lewi natuin lekat lulut Plenat Knino. Atoni-atoni Yehuda sin natola ale Ana' fuat knino ma atoni-atoni Lewi nane,

⁴⁵natuin sin es nanaoba luli besa knino ma luli besa bian anteni le Uisneno anlek nani. Ale asit sin ma apaot eno naek Ume UISNENO sin amsa nanaoba sin mepu sin, natuin lekat lulut Kesel Nai Daud ma Nai Salomo in anmone.

⁴⁶Na'ko batan Kesel Nai Daud ma ahinet sit Nai Asaf, ale asit sin ansi nalali ale sit tulu nekaf neu Uisneno.

⁴⁷Anbi batan Nai Zerubabel ma anbi batan Nai Nehemia amsa, to Israel ok-oke anfe fua tulu he nanokab monit neno-neno na'ko ale asit ma apao eno naek Ume UISNENO. Ma to anfe fua tulu anbeti nateta nani neu atoni-atoni Lewi ma atoni Lewi sin amsa anfe nani neu ale Ana' fuat knino sin ini le anlek nani.