Read Uab Meto NEHEMIA 13 Bible Online

NEHEMIA 13 - Uab Meto bible

NEHEMIA 13

¹Anbi tabu anso'i plenat Nai Musa neu to, sin napeni a'at i: ‘Atoni Amon ma Moab ka nabe'i fa he nabua nok nonot Uisneno;

²natuin leka to Israel anpoi na'ko Mesir; uf nua en nane sin kan fe fa mnahat ma oe neu to Israel. Mes sin anbaen Nai Bileam he nati' ansukat to Israel, mes Uisneno nabaina sukat nane ma anfani tetus.’

³Leka to Israel sin nen lasi nane, sin anbeti ale atoni amnemat na'ko to Israel.

⁴Nahun na'ko nane Ana' Fuat Knino Nai Elyasib, le anlek in anpanat ale ke'an-ke'an amaus anbi Ume UISNENO in anmu'i malutas alekot nok Nai Tobia.

⁵Nai Elyasib anfe neu Nai Tobia ke'an anaek mese le afi naloitan ke'an nane ma nabela fua tulu ane kase, atu fomeni, ale bale pakae le anpake anbi Ume UISNENO, fua tulu neu ale Ana' fuat knino, fua tulu bati bo' na'ko ane kase, tua mina mtasa, ma mina bub fua mina, le of anbati nani neu atoni-atoni Lewi, ale asit sin ma apao eno naek Ume UISNENO.

⁶Leka lasi nane anbol, au ka bi fa Yerusalem, natuin anbi ton bo' tenu ma nua Nai Artahsasta, kesel Babel ana' aplenat, au nao meu Babel he uton ale lasi neu kesel. Fun oke neno fauk-fauk namuni te kesel nafetin kau,

⁷he au nao fani neu Yerusalem. Leka au aum antia Yerusalem, au uskek natuin au uhin nak Nai Elyasib anfe nalali neu Nai Tobia ke'an mese anbi Ume UISNENO.

⁸Au uto' anae le'uf ma au polin upoitan Nai Tobia in bale sin ok-oke.

⁹Oke te au lenu he nati' anmo'e luli besa knino he naknino ale ke'an-ke'an nane. Nalali onane te au eki ufani neu bale nane ale fua tulu ane kase ma atu fomeni ma ale bale pakae Ume UISNENO.

¹⁰Fun anesi na'ko nane, au upeni nak ale asit sin ma atoni-atoni Lewi sin nasaitan nalali Yerusalem ma sin anao anfani neu sin lene mese-mese, natuin to ka nanokab fa sin monit neno-neno.

¹¹Ma au ubokan ale atomatas sin natuin sin nasaitan nalali Ume UISNENO ma ka mapanat fa. Oke te au o'en ufani ale atoni-atoni Lewi ma ale asit sin ma au lenu sin anmepu anfani anteni.

¹²Nalali te to Israel ok-oke anfe anteni fua tulu bati bo' na'ko sin ane kase, ma sin bub fua mina, ma neki nani sin neu ale ke'an-ke'an amaus.

¹³Au lek atoni-atoni i he sin anpanat ale ke'an-ke'an amaus nane: Ana' Fuat Knino Nai Selemya, Nai Zadok atoni ahinet Plenat Knino ma Nai Pedaya atoni Lewi mese. Nai Hanan Nai Zakur anmone ma Nai Matanya upuf au lek sin hen tuntaku sin. Fun au uhin ak atoni-atoni nane nabe'i tafnekan sin ma of sin anlek ma anbati ale sa'-sa' neu sin biaf ameput sin nok alekot.

¹⁴Koi au Uisneno, mumnau fa ale sa' le Ho ate au mo'e ulali neu Ho Ume ma in atuthaes sin.

¹⁵Anbi batan nane au it nak anbi Neno Snasat atoni fauk-fauk anbi Yehuda sin anteli tua min kase in fuan. Ma anmu'i atoni anteni le nasaeba ane kase, tua mina mtasa, tua min kase fuan, bub fua mina ma bale bian anteni nasaeba neu sin bikase luke mnanu ma neki meu Yerusalem. Au ukain sin he kais sin nasosa anbi Yerusalem.

¹⁶Fun atoni fauk-fauk na'ko Tirus le sin natua anbi Yerusalem sin neki ika ma bale sosa huma-huma neu Yerusalem anbi neno Snasat, he nasosa sin neu atoni Yahudi.

¹⁷Au ubokan ale anakaf Yehuda ma au ak sin ak, “Hi ka mihin fa ka nak hi mo'e milali amle'ut natuin hi milahi milali neno Snasat?

¹⁸Fun natuin sanat onle i onane te Uisneno anfe nalali kasat neu hit amfenu ma naskuku nale'un kot i. Ai him lomi hem sato amteni to'as Uisneno neu Israel nok hi milahi Neno Snasat?”

¹⁹Es nane te au fe plenat he nati' nahun na'ko neno-neno Snasat, es neno Nima anmabe, am ek eno-eno naek kot leka neno antes, ma ka nabe'i fa he misoitan talantia neno Snasat anfini, anbi neno Ne anmabe. Au tao au ate sin fauk-fauk anbi eno-eno naek nane hen pao he nati' anbi neno Snasat ka nabe'i fa he neki bale sosa hen tam neu kot nanan.

²⁰Mes anmui asosa fauk-fauk le nasosa bale huma-huma sin antup, anbi baki lape kotin anbi neno Nima anmabe.

²¹Mes au ak neu sin ak, “Ka maota fa him pao talantia noka fa ambi nane. Him pantom leka hae mese anteni hi mo'e onane, of au mo'e lasi mafena neu ki!” Na'ko neno nane sin ka nem anteni fa anbi neno Snasat.

²²Oke te au lenu atoni-atoni Lewi sin anmo'e luli besa he naknino sin aon he sin panat eno-eno naek sin ma anpao he nati' to naknino neno Snasat. Au onen toti ak, “Koi Uisneno, mumnau kau fa natuin lasi nane amsa, ma amnek mumnau Kau fa natuin Ho manekam anaek.”

²³Anbi batan nane au it amsa nak atoni Yahudi namfau le anmafe nalali nok bife-bife na'ko uf Asdod, Amon ma Moab.

²⁴Sin anhen bian ka nahin fa uab Yahudi, mes al sin nahin uab Asdod ai uab ateta bian anteni.

²⁵Au ubokan sin ma au sukat sin. Au beso ma tepo bian ma au bok sin nakan funu. Nalali te au lenu sin ansup anbi Uisneno kanan he nati' sin ma sin anhenu ka nabe'i fa hen mafe ma anmamone onane anteni.

²⁶Au ak sin ak, “Ai ka sanat onle i fa amsa le Kesel Nai Salomo anmo'e nalali ka? Katit fa kesel mese anbi pah pinan i le anesin in. Uisneno nek ma namnau in ma anmo'e in anfani kesel neu Israel ok-oke. Maski onane amsa ale bife-bife uf bian anfuli nalali in ma anmo'e sanat.

²⁷Namneo-namneo hi mo'et nane lo amle'ut kun! Hi nabe'i amlaban Uisneno ma hi mafe bife-bife na'ko uf bian!”

²⁸Nai Yoyada nane Ana' Fuat Knino Amnanut Nai Elyasib anmone, mes Nai Yoyada in anmone mese anfani moen fe'u Nai Sanbalat na'ko kot Bet-Horon. Es nane te au li'u Nai Yoyada na'ko Yerusalem.

²⁹Au onen toti ak, “Koi au Uisneno, mumnau fa neu onme sin le nane nalahi mepu Ana' fuat knino ma lasi fef bela nok ale Ana' fuat knino ma atoni-atoni Lewi sin!”

³⁰Onle nane au uknino to Israel na'ko ale sa'-sa' amle'ut. Au uhakeb lekat lulut neu ale Ana' fuat knino ma atoni-atoni Lewi sin, talantia mese-mese anmu'i kun in mepu anmes.

³¹Fun auk lek amsa he nati' anbi neno-neno le natetab nani, sin neki hau hopit neu fua tulu ma neki fua tulu pah in afan ahunut. Ma amsoput au onen toti ak, “Koi au Uisneno, mumnau fa ale lasi i ma amfe neu kau tetus.”