Read Uab Meto NEHEMIA 2 Bible Online

NEHEMIA 2 - Uab Meto bible

NEHEMIA 2

¹Anbi neno mese, funan ha namuni na'ko nane, anbi funan Nisan, leka Kesel Nai Artahsasta fe anbukae, au utnanab tua min kase neune nok humaf le nahenu nok susal. Au humak ka namle'u nit fa anbi in human onle anbi neno nane.

²Es nane te in natoti kau nak, “Nansa' es ho humam namle'u onle nane maski ho ka mumen fa? Mes anmu'i lasi sa'-sa' esle' nale'un ho nekam.” Au umtau,

³oke te au utae ak, “So nati' Usi ho moni talantia nabal-bal! Leka me au humak he ka namle'u fa onme, kalu talantia neno i kot bale ho ate au amfenu sin naukel fe anfani fatu tutnae piut ma ale in eno-eno naek sin ai notu nani sin ok-oke.”

⁴Kesel natoti nak, “Ho hem toti sa' na'ko kau ka?” Au onen toti anbi au nekak nanan neu Uisneno Akuasat neno tunan,

⁵oke te au utae kesel ak, “Kalu Usi hom lomi ma amsimo ho ate au han totis, amsonu ho ate kau neu pah Yehuda he nati' au uhakeb ufani kot bale au amfenu sin naukel.”

⁶Oke te kesel le fe antunon nok in Kesel Fenai anbi in aon bian, ansimo au han totis. In antoti kau neu of au umaika bi nane talantia leka ma of leka te au he fani, es nane te au uton neune neno le au utetab ulali.

⁷Nalali te au toti sulat neu ale Kumlol anbi propinsi Efrat Neno Tesan, he nati' sin antuntaku kau anbi lanan talantia Yehuda.

⁸Anesi na'ko nane te, au amsa toti sulat neu Nai Asaf, ameput le anpao nasi anbi pah in nanan, he nati' in naloitan kau hau neu eno naek anhaumak Ume UISNENO, ma neu baki lape kot ma ume le of au utua bine. Kesel nanokab neu kau sa' le au toti nane, natuin Uisneno antuntaku kau.

⁹Fun kesel ansonu solalus anakaf fauk-fauk ma solalus asae bikase sin nok kau, oke te au fen ma nao neu Efrat Neno Tesan. Anbi nane au fe kesel in sulat nane neu ale Kumlol.

¹⁰Mes leka Nai Sanbalat, atoni Bet-Horon ma Nai Tobia, atoni anaet mese na'ko Amon, sin nen nak au aum eki lasi alekot neu to Israel, onane te sin nekan namle'u anae le'uf.

¹¹Au aum atia Yerusalem, oke te au usnas neno tenu.

¹²Fun au ka utonan fa es amsa neu Uisneno antao anbi au nekak neu he uhakeb ufani Yerusalem. Noka fa anbi fai au fen ma oke te au ak au biaf sin hai amnao ampoi mi'ko kot. Al bikase luke mnanu le au sae eune, hai ka meki amteni fa bikase bian.

¹³Fun fe fai fe, leka hai misaitan kot amnao mok Eno Naek Nonof anbi aon neno tesan. Hai amnao am ali neno aon bian a'ne'u, amnao meu Eno Naek Knutu, amnao mok Oe Mata Kaun Koko. Anbi lanan nane au tae ale baki lape le namle'u anbi kot ma au it amsa ale eno naek le ai notu nani sin.

¹⁴Nalali te na'ko kot in neno saen haim nao amfini meu neno aon bian a'li, amnau meo Eno Naek Oe Tunu ma Nifu Kesel. Mes anbi nane katit fa lanan neu bikase luke mnanu le au sae eune, natuin baki lape natkua anae le'uf kun.

¹⁵Es nane te, hai amsanu meu Nonof Kidron hai amnao piut anbi fai nane, ma hai amtae baki lape kot nane. Oke te hai amfani meu kot amnao mok Eno Naek Nonof.

¹⁶Katit fa es amsa na'ko nakaf sin neu nahin neu au nao bi me, ma sa' le au he mo'e. Natuin antia tabu nane amsa au fe ka uton fa sa'-sa' neu atoni-atoni au nonot sin, leko neu ale Ana' fuat knino ai neu ale amnasit sin, ai neu ale ameput sin, ma neu sekau am sekau le of sin nok he nahakeb kot Yerusalem.

¹⁷Mes oke te au ak sin ak, “Amkiso nai hit monik le nahenu nok susal mafena i! Yerusalem al on fatu tutnae ma in eno-eno naek sin ai notu nani sin. Aim nai hit tahakeb tafani ale baki lape Yerusalem he nati' kais nale'uf anteni kit.”

¹⁸Oke te au utonan sin neu Uisneno antuntaku kau ma sa' le kesel naton nalali neu kau. Sin natae kau nak, “Aim he hit tahakeb nai!” Oke te sin naloitan ma nabalab he sin naiti mepu.

¹⁹Leka Nai Sanbalat, Nai Tobia, ma Nai Gesyem, atoni Arab mese, sin nen lasi nane, sin anmanis kai ma nale'uf ma nakle'at kai. Sin nak, “Hi he mo'e sa' ka? Ai hi hem laban kesel ka?”

²⁰Mes au utae sin ak, “Uisneno Akuasat neno tunan of In anmo'e hai mepu talantia napoitan in osan. Hai le i In ate-ate kun ma hai of amfatan hai mepu. Mes hi ka mu'i fa kuasat ai hi ka mu'i fa sa'-sa' amsa anbi Yerusalem. Ma leka atoni namolok neu Yerusalem, hi kanam of kan tek nani fa sin.”