Read Uab Meto NEHEMIA 4 Bible Online

NEHEMIA 4 - Uab Meto bible

NEHEMIA 4

¹Leka Nai Sanbalat in nen nak hai atoni Yahudi fe hai mileko baki lape kot, in nato' anae le'uf ma in nasi'u kai.

²In na'uab anbi in biaf sin matan ma solalus Samaria nak, “Atoni Yahudi amle'ut le kan mepu nabe'i fa sa'-sa' sin anmepu sa' es nane ka? Ai sin anlomi he nahakeb nafani kot i ka? Oni sin natenab nak mepu nane nabe'i sin anmepu nasopu anbi neno mese, al nok natulu fua tulu ka? Ai knutu le natupu nane nabe'i sin anmo'e anfani fatu-fatu baki lape ka?”

³Oke te Nai Tobia le anhake anbi in aon bian in na'uab nak, “Amkiso baki lape le sin nahakeb nane! Asu fui amsa nabe'i nakua nani!”

⁴Es nane te au onen toti ak, “Koi Uisneno, amnen fa sin nasi'u kai onme! So nati' sin lasi si'ut nane nali'on anfani neu sin fufun. So nati' nasik nani ale sin amu'in ma naiti neki son on atoni le anheke nan sin neu pah bian.

⁵Kais amsako sin mo'et amle'ut ma kais amnikan sin sanat, natuin sin nasi'u nalali kai le hai fe mifena mepu i.”

⁶Mes hai amepu piut mileko baki lape nane, ma ka lo fa namuni na'ko nane te baki lape nane ok-oke hai mileko milali aon bian, natuin to anmepu nok matani.

⁷Leka Nai Sanbalat, Nai Tobia ma atoni-atoni na'ko Amon ma Asdod ma atoni-atoni Arab sin nen nak mepu naleko baki lape Yerusalem nane anao mat nok matani ma ale kobe bola' he natemen, onane te sin nato' anae le'uf kun.

⁸Sin anmalokin lasi he nape' Yerusalem he napoitan taisibu.

⁹Es nane te hai am onen toti neu hai Uisneno ma ampao kot nane manas ma fai.

¹⁰Mes atoni Yehuda sin ansi sit kae koli i nak: “Hit be'ik ma matanik oke neu het loi baut mafena, mes knutu fe natupu anae le'uf kun. Hit atnaben ka tabe'i teni fa het mepu onle i tafena baki lape kot i.”

¹¹Mes hai musu sin ansali kai he nale'un kai nok askeken, oke te namate kai talantia hai mepu nasnas.

¹²Mes atoni Yahudi le natua anhaumak sin, sin nem neu kai haef fauk-fauk ma sin naton neu kai antom musu sin salit nane.

¹³Es nane te au bati suni, auni ma aklaot neu to, ma au uhakeb sin natuin sin kankenu mese-mese anbi baki lape kotin, anbi bale-bale le fe kan mepu nalali fa baki lape nane.

¹⁴Leka au kiso nak to sin namtau, onane te au ak neu sin ma neu ale makana sin ma neu ale nakaf sin ak, “Kais mimtausan musu sin! Mimnau nai neu UISNENO le abe'it ma matani kun, ma amabe'u nai neu hi bia ma hi benu sin, hi anah-anah sin, hi fenai sin ma hi ume sin!”

¹⁵Hai musu-musu sin anen nak sin salit nane hai amnen milali. Onane te sin nahin nak Uisneno an eka sin salit nane. Nalali te hai al-al kai amfani ma amepu mileko baki lape nane.

¹⁶Mes na'ko neno nane al aon bian na'ko au to es anmepu, mes aon bian anteni anpanat ma anpao neki bale pake sobalu makenat ma ampake bale manuat auni, ben besi tika, ma aklaot. Ale anakaf sin anfe tuntakus neu to nok matani

¹⁷le fe sin naleko baki lape nane. Ale aloit sin le sin anloi bale mepu nane sin anmepu neki nimaf mese, mes niman bian ana' bale manuat.

¹⁸Ale amepu fatu sin anmepu nok anfutun sin suni anbi sin atnankenu. Ale fatu to'is ma knit, sin anhake anhaumak kau piut.

¹⁹Oke te au ak neu to, ale makana sin ma ale nakaf sin ak, “Mepu i anfenus ma anmenua fun anao nan a'lo, talantia hit tasan'ok tatuin baki lape i, es na'lo na'ko es.

²⁰Es nane te, leka hi amnen to'is ma knit in hanan, mibuabom nok manoe amfun mitef man kai anbi bale i. Hit Uisneno of anmaken anseka kit.”

²¹Onle nane hai amepu na'ko nok-nok ana' talantia ale afkun anpin anbi neno tnanan. Aon bian na'ko to sin naleko baki lape, ma bian anteni sin anpanat neki suni anbi sin niman.

²²Anbi batan nane ale ameput nok sin atuntakus sin, au lenu sin antup anbi Yerusalem. Nok nane te hai ampanat kot anbi fai ma anbi manas hai mifena baki lape.

²³Fun au, ma au biaf sin, au to sin ma ale au apanat ma apaot sin anpake bale mepu piut, anbi manas ma anbi fai nok. Hai miloitnom ma mibalbom piut, fun bale manuat anbi hai nimam.