Read Uab Meto NEHEMIA 5 Bible Online

NEHEMIA 5 - Uab Meto bible

NEHEMIA 5

¹Namuni na'ko nane te atoni Yahudi sin namfau, naimone ma fenai, sin ansakoi neu atoni-atoni sin nonot sin.

²Fun bian sin nak, “Au anah sin namfau. Hai amlomi ane kae he hai moni.”

³Fun bian anteni sin nak, “Nok aseke au una'at au lene, au lene tua min kase ma hai ume he hai amsos ane kase he nati' kais hai maten amnahas.”

⁴Ma bian anteni nak, “Hai mitus noni he ambaen mifek noni poni le kesel anlek nani neu hai lene ma hai lene tua min kase.

⁵Ait hai ka atoni Yahudi kai fa ka? Ait hai anah-anah sin ka papmese fa nok anah-anah atoni Yahudi bian? Maski onane amsa hai mifetin hai anah-anah sin anfani ate. Ma anesi na'ko nane te anmu'i hai anfeto le misosa sin anfani ate. Hai ka mibe'i amteni fa natuin hai lene ma hai lene tua min kase hai mina'at milali sin.”

⁶Leka au nen sin han sakoit nane, au uto' nae le'uf

⁷ma au ufek he hataniok he uleko lasi nane. Oke te au ubokan ale makana sin ma to sin anakaf. Au ak, “Him hamu'i hi biaf sin!” Nalali te au mo'e buat anaek mese he uleko lasi nane,

⁸ma au ak, “Nok hit matanik ok-oke hit tafetin talali hit biaf sin atoni Yahudi le nok aseke sin nasosa sin aokin neu uf bian. Mes muni i hi es miseke sin he nasosa sin aokin neu ki, mes hi amsa atoni Yahudi ki!” Ale to sin anakaf ka natae fa fefa mese amsa.

⁹Oke te au ak ateni sin ak, “Hi mo'et nane ka naleko fa! So mes hi moni nok lasi nek amtaus neu Uisneno. Nok nane te hit musu le ka ma uisneno nane hi kam fe fa sona neu sin he nasi'ut kit.

¹⁰Fun au, au biaf sin ma au benuf sin hai amfe amlapat milali noni ma ane kase neu to. Hai of kam toti mifani fa sin.

¹¹So nati' hi amsa mineku ale to sin tusa anbi ki, he noni ka ai he ane kase ka, he tua mina mtasa ka ai mina bub fua mina. Anbi neno i amsa amfe mifani sin lene, lene tua min kase, lene bub fua mina ma sin ume!”

¹²Fun to sin anakaf sin natae nak, “Fainekat nane of hai mituin. Hai of amfe mifani ale sa'-sa' ma of hai kam toti fa sin hen baen sa'-sa' neu kai.” Oke te au o'en ale Ana' fuat knino ma au lenu to sin anakaf ansup anbi Ana' fuat knino sin matan, nak sa' le sin na'uab nalali nane, of sin nanaoba nani nok namneo-namneo.

¹³Nalali te au sefi pilu takaf anbi au tnanak oke te au tekal ma au ak, “So nati' onle i Uisneno antekal sekau am sekau le ka nanokab fa in lasi manta'en. Atoni nane of anfani atoni amamu'it, in ume ma in amaus of Uisneno naiti nani sin!” Ma to ok-oke sin natae nak, “Amin!” oke te sin naliatas UISNENO. Ma ale to nane sin anakaf sin nanokab sin lasi manta'en nane.

¹⁴Fun Kesel Nai Artahsasta in naiti kau fani Kumlol Yehuda ton bo'es am nua, na'ko ton bo'nua antia ton bo'tenu anbi in aplenat. Anbi tabu nane fun au ma au biaf sin au ka simo it fa au noni on Kumlol.

¹⁵Mes kumlol-kumlol le nahunun kau, sin neki mafena neu to natuin sin antoti noni muti bo'ha anbi neno mese neu sin bukae ma tua mina mtasa. Anesi na'ko nane, ale sin ameput-ameput sin amsa anhamu'i to. Mes au ka mo'e fa onane natuin au umtausan Uisneno.

¹⁶Au be'ik au matanik au fe ani oke neu mepu he uhakeb baki lape ma au ka upeni fa nain akle'o amsa on seunbanit neu kau, maski au atuntakus sin nok amsa anbi mepu nane.

¹⁷Atoni Yahudi natun mese am bo'nim am ale sin atomatas sin au tuthae sin anbukae anbi au ume, fe kat so'i fa ale amnemat sin na'ko uf-uf le anfun natef kai.

¹⁸Neno-neno au uloitan bijael mese, bibi kase apokat ne ma manu namfau le au upoitan na'ko au mu'ik. Ma anesi nane, neno bo'mese te au uloitan au tua mina mtasa. Maski onane amsa au ka toti fa au noni le hen baen kau on Kumlol, natuin au uhin nak to ansutai mafena nae le'uf kun.

¹⁹Au toti Ko koi Uisneno, mumnau ale sa' le au mo'e ulali neu to i ma amfe tetus neu kau.