Read Uab Meto NEHEMIA 6 Bible Online

NEHEMIA 6 - Uab Meto bible

NEHEMIA 6

¹Nai Sanbalat, Nai Tobia, Nai Gesyem ma hai musu bian sin a nen nak hai mileko milali baki lape, ma nok ale in kobe sin hai mileko milali sin, maski anbi tabu nane hai fe kam tao fa bena eka anbi kot in eno-eno naek sin.

²Fun Nai Sanbalat ma Nai Gesyem sin anhone kau he nati' au nao he mo'e buat ok sin anbi kuan mese anbi Nonof Ono. Mes au uhin nak sin he nale'un kau.

³Es nane te au sonu han taes i neu sin ak, “Au fe unaoba mepu mafena mese es nane te au ka eti fa. Mepu nane of ka nao fa leka au usaitan he utef ok ki.”

⁴Fun sin ansonu haef neu kau talantia hae ha, ma au utae sin papmese onane.

⁵Nai Sanbalat ansonu in ate mese nem neu kau anbi hae nim ma anfe neu kau sulat mafai

⁶le in nesan nak on i: “Nai Gesyem in namneob nani uab molok anbi uf-uf anfun natef kai anbi i, le nak ho ma ale atoni Yahudi sin hi he mo'e lasi amlaban plenat, ma es nane te ho mepu muleko mufani baki lape kot nane. In na'uab amsa nak ho he maiti ho aom hem fani Kesel Yehuda,

⁷ma hom lek mulali Mafefa knino fauk-fauk he nasaeba ko on kesel anbi Yerusalem. Uab molok nane namneo ma of anao antia kesel. Es nane te, ho aum nai he hit tamolok lasi nane.”

⁸Mes au sonu han taes i ak, “Ale sa' le ho mumolok nane uab luman kun ma lasi nane ho uab amoele kun.”

⁹Sin nami hen hakatau kai he nati' hai misnasab mepu nane. Fun au onen toti ak, “Koi Uisneno, amhatani Ho ate kau!”

¹⁰Anbi tabu nane amsa, au nao neu Nai Semaya Nai Delaya anmone Nai Mehetabeel upuf, natuin in naseni ma ka nem neu kau fa. In nak neu kau nak, “Aum he hit nua kit atnao he tatolo' atbi Ume UISNENO. Hit atletu ale in eno sin, natuin anmu'i atoni le he namate ko. Oni anbi fai le i of namate ko.”

¹¹Mes au utae ak, “Au le i atoni ka amnaenat kau fa. Au on to ana' au ka nabe'i fa he tam eu Ume UISNENO, natuin mes au mate. Kahaf, au ka lomi fa!”

¹²Leka au tai ulek-leko lasi nane, au uhin nak han totis na'ko Nai Semaya nane ka na'ko fa Uisneno, mes na'ko Nai Tobia ma Nai Sanbalat. Sin anfe nalali noni mate neu Nai Semaya he natiaba beno nane neu kau.

¹³Fun salit nane he nati' au umtau ma utuin sin fulit talantia au usanab. Nok nane te sin napeni sona he nale'uf au kanak talantia anfani fefa hanaf to amfaun.

¹⁴Au onen toti ak, “Koi Uisneno, mumnau sa' le Nai Tobia ma Nai Sanbalat anmo'e nane. So nati' amfe neu sin kasat! Onane amsa Mafefa knino bi Noaja ma mafefa knino-mafefa knino bian anteni le sin anhakatau kau pitu.”

¹⁵Mepu naleko nafani baki lape nane in a'lon neno 52, ma nasopu nani anbi neno bo'nua am nim funan Elul.

¹⁶Leka nai musu-musu sin anbi uf-uf anfun natef kai nane sin nen lasi nane, sin namtau ma namaebon, natuin ale atoni sin nahin nak mepu nane nanaobon natuin Uisneno antuntaku kai.

¹⁷Fun anbi neno nane ale nakaf to Yahudi fe sin nanaoba sulat namfau nok Nai Tobia.

¹⁸Atoni Yahudi namfau le fe anmafef leko nok Nai Tobia, natuin in moen fe'u na'ko Nai Sekhanya Nai Arah anmone. Anesi anteni amsa Nai Yohanan, Nai Tobia anmone in anmafe nok Nai Mesulam anfeto Nai Berekhya in anah.

¹⁹Maski Nai Tobia antui sulat piut-piut neu kau hen hakatau kau, mes ale nakaf to Yahudi nane sin antek Nai Tobia in lasi leko piut-piut anbi au matak. Nesi anteni te sa' le au umolok, sin naton nani neune.