Read Uab Meto NEHEMIA 8 Bible Online

NEHEMIA 8 - Uab Meto bible

NEHEMIA 8

¹Anbi fun hitu atoni Israel mese-mese natua anbi in kot kun. Antam neno mese anbi funan nane sin al-al sin nabua anbi Yerusalem anbi Eno Naek Oe in matan. Sin antoti he nati' Ana' Fuat Knino Nai Ezra atoni ahinet Plenat Knino in naiti Sulat Plenat Knino Nai Musa le UISNENO anfe nani neu Israel.

²Oke te Nai Ezra in neki sulat nane anbi tolas knino sin matan, fun atoni, bife ma li'ana le anheke nahin lasi.

³Nalali te, na'ko nok-noka talantia manas namtetu, Nai Ezra anso'i Plenat Knino nane neu sin. Sin al-al sin nen nok alekot.

⁴Nai Ezra anhake anbi mimbar hau le anmo'e nalali natuin buat nane lomin. Fun ahaket le anhake anbi in aon bian a'ne'u es: Nai Matica, Nai Sema, Nai Anaya, Nai Uria, Nai Hilkia ma Nai Maaseya; ma le anhake anbi in aon bian a'li es: Nai Pedaya, Nai Misael, Nai Malkia, Nai Hasum, Nai Hasbadana, Nai Zakharia ma Nai Mesulam.

⁵Mimbar bale Nai Ezra anhake anbine nane, naait'ion nesin to ok-oke, talantia sin al-al sin nit in ok-oke. Leka in anfai sulat plenat nane sin al-al sin anfen anhake ok-oke.

⁶Nai Ezra nak, “Miliatas nai UISNENO anaet!” To ok-oke naiti sin niman ma natnop neki ansae ma natae nak, “Amin, amin!” Oke te sin anli'tu ma nabes neu Uisneno.

⁷Nalali te sin anfen anhake anbi sin bale mese-mese ma atoni Lewi puknes nanoina Plenat Knino nane neu sin. Atoni-atoni Lewi nane sin es: Nai Yesua, Nai Bani, Nai Serebya, Nai Yamin, Nai Akub, Nai Sabetai, Nai Hodia, Nai Maaseya, Nai Kelita, Nai Azarya, Nai Yozabad, Nai Hanan ma Nai Pelaya.

⁸Sin nate'un ma nabaina Plenat Knino Uisneno nane pa'neu pa' ma naketi nani talantia to nahin so'it Plenat Knino nane.

⁹Leka to nen so'it Plenat Knino nane, sin nekan antu', oke te sin ankae. Es nane te Kumlol Nai Nehemia ma Ana' Fuat Knino Nai Ezra ahinet Plenat Knino nane, ma atoni-atoni Lewi le sin nanoina Plenat Knino nane, sin nak neu to ok-oke nak on i, “Neno i neno knino neu hi UISNENO, kais hi nekam antu' ma kais hi amkae.

¹⁰Amfani nai esle' i; miah nai ma minu nai nok amlilat. Amfe nai na'ko hi mnahat bian ma hi tua mina mtasa bian neu anukat sin. Neno i neno knino neu hit UISNENO, es nane te kais hi misusbom. Lasi amlilat le UISNENO anfe nani neu ki of namepan ki.”

¹¹Fun onane amsa atoni Lewi sin anfainek to ma nak neu sin piut-piut nak, “Kais hi minu'om anbi neno knino i.”

¹²Onane te to ok-oke sin anao anfani he sin nah ma ninu ma anbati mnahat neu atoni bian. Sin namlil natuin sin nahin nalali so'it nane in otan le sin nen ma natnin nalali.

¹³Ma noka fa te ale anakaf to, ale Ana' fuat knino ma atoni Lewi, sin nabua ok-oke, oke te sin anao neu Nai Ezra he sin nanoina ale noina Plenat Knino UISNENO.

¹⁴Fun sin napeni matui anbi Plenat Knino le UISNENO anfe nao nok Nai Musa, nak UISNENO anlenu nonot Israel he sin natua anbi la' hau no' leka Tolas La' Hau No' nanaobon.

¹⁵Es nane te sin an etun ma naton plenat i anbi Yerusalem ok-oke anbi kot-kot ma anbi kuan-kuan nak, “Amnao nai meu neten ma maiti aijob atlaen, bub fua mina atlaen, hau mina atlaen, bone ma hau bian anteni in atlaen he mo'e la' hau no' anmatom nok lekat lulut anbi Sulat Plenat Knino in nanan.”

¹⁶Oke te sin anao ma naiti hau atlaen. Ma sin anmo'e la hau no' anbi sin ume penen mnela, anbi sin ume po'an, anbi po'an matan Ume UISNENO, anbi mnela anhaumak Eno Naek Oe ma anbi mnela anhaumak Eno Naek Efraim.

¹⁷To ok-oke le anfani nem na'ko bale mapolin nane sin anmo'e la' hau no' nane, oke te sin natua anbi nane. Le i hae ahunut sin anmo'e lasi nane na'ko afi Nai Yosua Nai Nun anmone in batan, es nane te sin al-al sin namlil ma namoke.

¹⁸Neno hitu a'lon sin anmo'e tolas. Ma neno-neno Nai Ezra anso'i a'an knino na'ko Sulat Plenat Knino Uisneno. Anbi neno fanu sin anmo'e luli besa amsoput, anmatom nok lekat lulut Plenat Knino.