Read Uab Meto NEHEMIA 9 Bible Online

NEHEMIA 9 - Uab Meto bible

NEHEMIA 9

¹Anbi neno bo'nua am ha anbi funan nane amsa, to Israel sin nabua. Sin nanahom ma nalile sin nek te'un neu ale sin sanat-sanat sin. Sin anbetion na'ko ale anao amnemat. Ma anfani ataka neu sin nekan antu', sin anpake bale kulut ma kaet ma antao afu anbi sin anakan. Nalali te sin anhake ma an au sin sanat ma sin amfenu sin sanat.

³Oni tabu tenu in a'lon, anso'i Sulat Plenat Knino UISNENO, sin Uisneno ma oni tabu tenu in a'lon anteni sin an au sin sanat-sanat sin. Oke te sin anli'tu neu UISNENO, sin Uisneno.

⁴Anbi nane anmu'i mimbar neu atoni-atoni Lewi ma Nai Yesua, Nai Bani, Nai Kadmiel, Nai Sebanya, Nai Buni, Nai Serebya, Nai Bani ma Nai Kenani sin anhake anbi nane. Sin onen toti nok hanan anaek neu UISNENO sin Uisneno.

⁵Atoni Lewi sin le i es anfatan luli besa neno nane: Nai Yesua, Nai Kadmiel, Nai Bani, Nai Hasabneya, Nai Serebya, Nai Hodia, Nai Sebanya ma Nai Petahya. Sin nak, “Amfen amhake nai ma miliatas UISNENO hit Uisneno! Mitnat nai pules neu In talan nabal-bal! Ampules nai In kanan le nahenu nok apinat, kanaf le matani, anesi na'ko ale pules ma liatas!”

⁶Nalali te to Israel sin an onen toti nak on i: “Fun Ho meskum UISNENO, ma Ho meskum Lo Mese Kun; Ho mo'e afkun ma neno tnanan kuni peni, fun tasi ma pah pinan ma nok sin nesan ok-oke, oke te Ho mumonib sin ma ampao ma ampanat sin. Ma ale akuasat anbi neno tnanan naluli ma nabes neu Ko; sin naluli neu Ko ma anli'tu neu Ko.

⁷Fun Ho meskum, UISNENO Mese Kun. Hom beti Nai Abram na'ko in nonot sin atnanan. In nasaitan Ur anbi Babel, natuin Ho meskum es amtopu in. Oke te Ho amfe neune kanaf fe'u mese; Abraham, na'ko tabu nane antek in onane.

⁸Ho mupeni in nekan aki'at neu Ko ma natuin Ko. Oke te Ho mo'e fef bela mok in le nahel kun. Pah Kanaan, Het ma Amori, pah Feris, Yebus ma Girgasi, Ho amfe mani sin ok-oke neune; on bale maika neu in sufan sin ok-oke. Nalali te Ho mutis Ho a'am, fef bela nane neune, natuin Ho amneot Ho ma aki'at Ko.

⁹Fun Ho mit mulali hai amfenu sin susal nukat anbi tabu afinit; Fun Hom nen sin kaet anbi Mesir ma anbi Tasi Teberau.

¹⁰Ma Ho mo'e lasi-lasi mafen le'uf neu Kesel Mesir, ma neu ameput sin amsa ma neu in to anbi in pah, natuin Ho muhin neu onme sin anhamu'i Ho to. Oke te Ho kanam mateka kun talantia neno i.

¹¹Fun Ho ampolo mbati tasi, ma amoe lanan neu Ho to sin; Ho mutlakab sin anao nok tasi tu'in anbi meto. Ale ali'ut sin anlem anmate anbi oe amnanut, onle fatu anlem anbi tasi nanan.

¹²Hom topu sin meki ni nope anbi manas. Ma anbi fai Hom topu sin meki ni ai.

¹³Afi Ho amsanu anbi Tubu Sinai, oke te Ho mukau Ho a'am neu Ho nonot. Hom fe Ho a'am, Ho lekat lulut ma Ho plenat le amneot, amnonot ma maota.

¹⁴Neno Snasat le aknino kun sin mes he naliatas, ma Hom fe Ho plenat nao nok Nai Musa.

¹⁵Leka sin namnah ma mnahat ka noka fa, Ho musanut utunu' na'ko neno tunan. Ma Ho mupoitan oe nok nathoe, na'ko fatu nu'af, fatu putun matani. Hom lenu sin he natua pah, le Hom ba'an neu sin nok lasi supat.

¹⁶Mes hai amfenu namoko'on ma namanub sin nekan; sin ka natuin nani fa Ho plenat sin.

¹⁷Sin ka na'ki fa, sin anikan Ho lasi alekot, ma ale Ho lasi amkakat sin anikan nani. Nok nek amoko sin anbeti mnasi mese, he neki sin anfani neu Mesir, he nati' sin anfani ate anteni. Mes Ho Uisneno asako sanat Ko, Ho nek anone Ko, Ho nek amahoet Ko ma muhenu mok lasi manekat. Ho manekam nane nae le'uf kun; Ho ka musaitan mit fa sin.

¹⁸Sin anmo'e uisneno teta on bijae. Oke te sin nak, ‘Hi Uisneno esle' i, le napoitan ki na'ko Mesir, na'ko pah aten nane.’ Koi Uisneno, Ho kum es sin nasi'u Ko!

¹⁹Mes Ho ka musaitan fa sin anbi mnela snaen, natuin Ho muhenu nok nek mamun anae le'uf. Ho ka muskotun fa ni nope ma ni ai na'ko sin, ahel lanan neu sin anbi manas ma anbi fai nok.

²⁰Ho munoina sin meki Ho kuasat alekot. Sin anbukae mak muti ma ninu oe nok nathoe.

²¹Ton bo'ha in a'lon sin anbi mnela snaen, Ho munokab ale sa' neu sin. Sin bale pake ka namle'u nit fa, sin haekenu ka namen ma kan fu'un fa.

²²Hom fe neu sin lasi mnisat, neu ale plenat ma uf anbi nakat sin pah. Hesybon Kesel Nai Sihon in pah, sin antoko pah nane; Basan Kesel Nai Og in pah, sin natua nani.

²³Ho mo'e sin sufan amfaun on afkun anbi neno tnanan. Hom fe neu sin pah he nati' sin natua nani, pah le Hom ba'an mulali neu sin amfenu.

²⁴Sin sufan nis ma anbe'u pah Kanaan; Hom li'u tuafen anbi nane. Hom fe kuasat neu Ho nonot he sin mo'e sa' natuin sin lomin neu uf-uf Kanaan ma neu kesel-kesel sin.

²⁵Ho nonot sin nasik nan sin bale makenat, pah maafa ma ume le nahenu nok amaus. Ma sin antet nan ale oe mata ma oe honis, lene tua min kase, hau bub fua mina ma hau fua bian anteni. Sin anpok natuin sin anbukae natuin sin lomin. Ale Ho manekam alekot sin ansimo ma sin anbukae nani.

²⁶Mes Ho nonot sin anlaban Ko ma sin ka natuin Ko fa, sin naikoti Ho plenat ma Ho lekat lulut sin, sin namate ale Mafefa knino le namnauba sin, ma anlenu sin he nali'on anfani neu Ko, sin Uisneno. Koi UISNENO, hae'-hae' amsa sin nasi'u Ko,

²⁷ma Ho muna'at sin neu sin musu sin le naplenat sin nok mafena ma anhamu'i sin. Mes anbi sin susal le mafen le'uf, sin anbai neu Ko ma antoti hem tuntaku sin. Hom nen sin na'ko neno tunan; Ho mutae sin nahenu nok lasi manekat. Hom sonu neu sin afetin ma meo pa'e le nafetin sin na'ko musu.

²⁸Mes leka sin pah antainine anfani, sin anmo'e sanat anteni. Ma Ho muna'at sin anteni neu musu le anhamu'i sin. Mes anbi tabu sin nahin ma sin nate'un, sin anbai neu Ko ma antoti he mufetin sin. Hom nen sin na'ko neno tunan, natuin Ho nekam antu' neu sin, ma Hom nek mumnau sin anae le'uf.

²⁹Hom fainek sin he nati' sin natuin Ho a'am knino, mes sin antite Ho plenat nok nek amnanut. Mes leka sin anmo'e natuin Ho plenat, mes sin monin of naleko. Sin anakan fatu ma namanub sin nekan, kan lomi fa he nen, ma kan lomi fa he natuin.

³⁰Ho nek anone Ko ma amfainek sin ton an maseka ton; nao natuin Mafefa knino, Ho Smanam Knino nakua a'an neu sin. Mes Ho nonot nane sin antobe sin luken, oke te Ho muna'at sin neu uf-uf anbi pah-pah.

³¹Mes natuin Ho ka manekam anae le'uf kun, talantia Ho ka musaitan fa sin ma ka mule'un muskuku fa sin. Namneo, Ho mes kum Uisneno le katit fa es he nanes'on nok Ko; Ho manekam anae le'uf, nahenu nok nek mamun!

³²Koi Uisneno, hai Uisneno abe'it ma matani! Uisneno naek ma matani! Hom na' ale fef bela nok aki'at; Ho fef bela sin Ho munokab ma munaoba mani. Na'ko afi batan kesel Asyur anhamu'i kai talantia neno i, hamu'it namfau le hai mipeni. Ale hai kesel, Ana' fuat knino, Mafefa knino, ma hai makana sin, hai amfenu, ma to, napeni nalali hamu'it ok-oke. Kais Hom nikan ale hamu'it nane! Kais Ho muneku mani na'ko Ho tenab!

³³Hom kas kai le hai asanat, Ho mo'et nane amneot kun; Ho mu'ki mubala neu kai maski hai mihenu nok sanat.

³⁴Hai amfenu, hai kesel sin, Ana' fuat knino ma ale hai makana sin, antanhai Ho plenat ma ka natuin nani fa. Ale Ho plenat ma Ho fainekat le Hom fe mani neu sin, kan sian nani fa, ma kan nen nani fa.

³⁵Hom fe tetus neu ale kesel le naplenat Ho to, leka sin natua anbi pah meunuan ma maafa le Hom fe mani neu sin. Mes sin ka nasaitan fa monit amle'ut, kan lomi fa he nate'un neu Ko ma naluli nabes neu Ko.

³⁶Es nane te neno i haim fani ate ambi pah le Hom fe mani neu kai on bale bela. Pah le i maafa, naheun nok pah in alekon, le namneo hai hem simo.

³⁷Pah le i le napoitan in afan mes minaa'at sin neu kesel sin. Ho maiti ale ana' aplenat nane neu Ho nonot, on kasat neu kai natuin hai misanab neu Ko. Sin naplenat natuin sin lomin kun neu hai aom ma hai mu'it le hai ini kun. Es nane te neno i hai moni anbi hamu'it, nahenu nok malelat ma kulut kaet!”

³⁸Natuin ale lasi nane, hai to Israel hai mo'e lasi manta'en le nahel ma matui, ma antao nani hai nakfenu sin malak, atoni-atoni Lewi ma hai Ana' fuat knino mese.