Read Uab Meto ESTER 1 Bible Online

ESTER 1 - Uab Meto bible

ESTER 1

¹Anbi Susan, Kot ainaf pah Persia, Nai Ahasyweros in ana' aplenat on kesel. In ana' aplenat anbi propinsi 127, na'ko India talantia Sudan.

³Anbi ton tenu in ana' aplenat, Kesel Nai Ahasyweros anmo'e fesat anaek neu ale in anaet sin ma in ameput sin. Ale solalus anakaf Persia ma Media sin amsa nok anbi fesat nane, onane amsa ale Kumlol ma ale ana' aplenat amnanut anbi in propinsi.

⁴Anbi funan ne in nanan kesel nalile in amu'in anbi in sonaf nanan ma in apinat ma in alekon anbi pah in nanan.

⁵Oke te kesel anmo'e fesat anteni neu ale in to ok-oke anbi Susan, neu amu'it ma amamu'it sin. Fesat nane nanaobon anbi klei mese in nanan ma anmo'e anbi kesel in po'an.

⁶Fun kesel in eno matan anpake noas nani neki pilu le maet bilu ma muti, anfutu neki piul muti mnutu ma anfutun sin neu niti-niti noni muti le antao sin anbi ale ni fatu muti. Ma antao hala mnatu ma noni muti anbi nain fatu muti le mapake noas nok in fatu muti, fatu me klima, banokae klima ma fatu klima le maet bilu.

⁷Kesel naloitan tua mina mtasa le nathoe le natnanab nani anbi klas mnatu huma-huma.

⁸Kan eka fa mninut tua mina mtasa neu ale amnemat mes ka naseke fa sin amsa. Kesel anfe nalali plenat neu ale ate anbi sonaf, he nati' antuthae ale amnemat sin mese-mese natuin sin alomin.

⁹Fun kesel in Fenai bi Wasti, in amsa anmo'e fesa neu ale in fenai anbi sonaf in nanan.

¹⁰Anbi neno hitu, kesel in ninu talantia in namlil anae le'uf. Es nane te in no'en atoni hitu le anfani ate neu in anbi sonaf nanan; sin le nane es Nai Mehuman, Nai Bizta, Nai Harbona, Nai Bigta, Nai Abagta, Nai Zetar, ma Nai Karkas.

¹¹In anlenu sin he neki Fenai bi Wasti nem neu in mapake neki sobe mnatu plenat anbi in anakan. Fenai nane namas anae le'uf, ma kesel he nalile in masan alekot nane neu ale in anaet sin ma neu ale in amnemat sin.

¹²Mes leka ale ate nane sin natiaba plenat nane neu Fenai bi Wasti, fenai kan lomi fa he nem, talantia kesel in nato' anae le'uf.

¹³Kesel anlek he natoti penit na'ko ale ahinet sin antom lasi plenat ma lasi halat nane. Es nane te in no'en in afainekat sin le sin nahin sa' le mes sin hen mo'e anbi lasi onle nane.

¹⁴Kesel in afainekat sin le in no'en sin piut anbi ale lasi esle': Nai Karsena, Nai Setar, Nai Admata, Nai Tarsis, Nai Meres, Nai Marsena, ma Nai Memukan. Sin le nane ana' aplenat Persia ma Media le anmu'i toko amnanut anbi plenat.

¹⁵Kesel nakua a'an neu sin hitu sin nak, “Au sonu ulali au ate-ate sin neu Fenai bi Wasti he in nem neu kau. Mes in kan lomi fa. Natuin lasi plenat, mes het mo'e sa' ka neu in?”

¹⁶Ma Nai Memukan anbaisenu kesel ma ale anaet sin nak, “Nok mo'et nane, Fenai bi Wasti in nasanab ka al fa neu ko Usi, mes neu ale Usi ho anaet sin, ma neu ale atoni anbi pah le i!

¹⁷Fun natuin fenai in mo'et nane of ale bife sin nahin nani lasi nane, ma of sin kan sian fa ale sin mone sin. Sin of na'uab nak Usi muplenat mulali Fenai bi Wasti he nem neu ko, mes fenai kan lomi fa he nem.

¹⁸Es nane te, leka ale anaet anbi Persia ma Media sin fenai sin nen lasi nane, of sin naton lasi nane neu sin mone mese-mese. Ma in amsopun nane esle', fenai sin of sin anlaban sin mone plenat ma sin mone sin of nato'an sin.

¹⁹Es nane te, hai ambaisenu ko Usi he nati' Usi ho maiti lasi fekat nak Fenai bi Wasti ka nabe'i fa anteni he nem neu ko Usi. Lasi fekat nane mes anmo'e anfani lasi fekat Plenat Persia ma Media, ma ka nabe'i fa he anhel nafani. Oke onane te, Usi ho Fenai bi Wasti in atoko amfe neu fenai bian le naleko nesin in.

²⁰Leka Usi ho lasi fekat nane nanaobon anbi pah anaet i, ale fenai of namtausan sin mone, he amu'it ka ai he amamu'it.”

²¹Fun lasi le Nai Memukan napoitan nane kesel ma ale anaet sin ansimo nani, ma kesel nanaoba nani nok manoe.

²²In ansonu sulat neu ale propinsi anbi pah in nanan, anbi a'at ma tuis anbi propinsi mese-mese. Plenat nane nahan nak anbi ume toko mese-mese, naimone es anfani nakafma in es mes naiti lasi fekat.