Read Uab Meto ESTER 4 Bible Online

ESTER 4 - Uab Meto bible

ESTER 4

¹Leka Nai Mordekhai in nen lasi le anbol nalali, in anpisu in bale pake ma in anpake kalo on bale kulut ma kaet. In antao afu neu in anakan, ma in anao anbi kot nanan nok kaet hanan anae le'uf natuin in ansutai nek susal anbi in nekan.

²In nasnas anbi sonaf eno naek, natuin atoni le anpake kalo nakain sin kais antam.

³Onane amsa anbi ale propinsi ok-oke, atoni-atoni Yahudi ankae ma ankul leka naton nalali kesel in aplenat. Sin nanahon, ankae ma ansakoi, ma namfau anbi sin anpake kalo ma antup anbi afu.

⁴Leka ale li'feto ma ale ameput le anlek nateta sin he antuthae kesel Fenai bi Ester sin naton neune lasi le Nai Mordekhai anmo'e, bi Ester in nekan ansusal anae le'uf. In ansonu bale pake neu Nai Mordekhai hen seka in bale kulut, mes Nai Mordekhai in kan lomi fa hen simo.

⁵Nalali te bi Ester no'en Nai Hatah, atoni mese na'ko ameput sin le kesel anlek in he antuthae bi Ester. Bi Ester anlenu Nai Hatah he natoti Nai Mordekhai neu lasi le anbol neune ma nansa' in anmo'e onane.

⁶Ma Nai Hatah anao neu Nai Mordekhai anbi mnela kot anbi sonaf in nasnas eno naek.

⁷Nai Mordekhai naton neune lasi le anbol nalali ma noni muti in amfaun le Nai Haman anba'an nalali he natam nani neu kesel in kas, leka namate nalali ale atoni Yahudi sin.

⁸Fun kesel in aplenat le matui in sonin no'mese le napoitan nalali anbi Susan he namate atoni Yahudi sin, Nai Mordekhai anfe nani amsa neu Nai Hatah. In anlenu Nai Hatah hen fe sulat nane neu bi Ester ma naton neune lasi nane, ma hen toti bi Ester amsa hen tam neu kesel hen toti in nekan mahoen he namnau in to.

⁹Oke te Nai Hatah in anao neu bi Ester ma natiaba Nai Mordekhai han ba'an nane.

¹⁰Mes bi Ester anlenu in anfani neu Nai Mordekhai neki han ba'an i nak,

¹¹“Sekau ma sekau, he atoni ka ai he bife ka, le ka no'en fa in, mes in antam naeku nok kesel anbi sonaf po'an nanan mes namate nani. Nane lasi plenat le nahakeb nalali ma ale atoni na'ko kesel in afainekat sin talantia neu ale to anbi ale propinsi, sin nahin nalali lasi nane. Al anmu'i lasi mese he nafetnon na'ko lasi plenat nane, esle' leka kesel nanona in ue mnatu neu atoni nane. Leka lasi nane anbol neune, in of napeni honis. Mes funan mese en kesel ka no'en kau fa.”

¹²Oke te Nai Hatah natiaba bi Ester in han ba'an nane neu Nai Mordekhai.

¹³Fun Nai Mordekhai in ansonu lasi mnauba i neu bi Ester nak, “Kais ho mutenab mak ho mes mufetnom na'ko atoni Yahudi bian sin, natuin ho mutua ambi sonaf in nanan!

¹⁴Atoni Yahudi of sin napeni tuntakus he nao nok lasi sa' amsa sa' ka talantia sin napeni honis. Mes leka ho ka mo'e fa sa'-sa' anbi lasi onle i, ho of amate ma ho ama ume nanan sin of namneku ok-oke. Fun sekau nahin, oni natuin anbi lasi-lasi onle i anbeti nalali ko amfani kesel in fenai!”

¹⁵Ma bi Ester ansonu a'at i neu Nai Mordekhai nak,

¹⁶“Amnibun ale atoni Yahudi anbi Susan ok-oke hen onen toti namnau kau. Kais hi miah ma hi minu anbi neno tenu ma fai tenu in nanan. Fun au ma ale li'feto au ate sin of hai minahom amsa. Nalali te of au tam ueku ok kesel, maski lasi nane antanhai lasi plenat. Leka au mes he mate natuin lasi nane, neu mautu he au mate!”

¹⁷Oke te Nai Mordekhai anao ma anmo'e natuin ale lasi nane onle bi Ester anba'an neune.