Read Uab Meto ESTER 8 Bible Online

ESTER 8 - Uab Meto bible

ESTER 8

¹Anbi neno nane amsa Kesel Nai Ahasyweros anfe ale amaus na'ko Nai Haman, musu naek atoni Yahudi nane, neu Fenai bi Ester. Bi Ester natonan kesel nak Nai Mordekhai nane in naof natuin sin na'if mese, ma na'ko nane nafetin in hen tam naeku nok kesel maski ka no'en fa in.

²Kesel nosu in akleli le in naiti nafani na'ko Nai Haman ma anfe nani neu Nai Mordekhai. Ma bi Ester naiti Nai Mordekhai anfani akuasat neu Nai Haman in amaus.

³Oke te bi Ester antam naeku anteni nok kesel. In anli'tu ma ankae ma antoti he nati' kesel naneku nani salit amle'ut le Nai Haman anmo'e neu atoni Yahudi.

⁴Kesel nanona in ue mnatu neu bi Ester, oke te bi Ester anfen ma nak,

⁵“Leka Usi ho amlomi ma amnek mumnau ho ate kau, so nati' Usi mupoitan sulat plenat he anhel nafani sulat-sulat Nai Haman le nahenu nok aplenat he nale'un atoni Yahudi anbi pah i.

⁶Leka me nabe'i ho ate au kiso au nonot ma au biaf au benuf sin le anlolo namate sin ok-oke?”

⁷Kesel Nai Ahasyweros nakua a'an neu Fenai bi Ester ma Nai Mordekhai nak, “Namneo au u'boni ulali Nai Haman natuin in he nale'un atoni Yahudi, ma in amaus au fe ulali neu bi Ester.

⁸Mes sulat le in antui natuin kesel kanan ma anmalak neki kesel in malak, ka nabe'i fa he anhel nafani. Mes, au ufetin ki hem tui sulat neu nonot Yahudi, sa' amsa sa' le hi amkiso te naleko. Amtui sulat nane natuin au kanak ma amalak sulat nane meki malak aplenat.”

⁹Fun anbi neno nane amsa, neno 23 fun tenu, funan Siwan, Nai Mordekhai no'en kesel in lultunis sin ma anlenu sin antui sulat neu ale Kumlol, ale Bupati ma ale anaet anbi propinsi 127, na'ko India talantia Sudan. Sulat-sulat nane sin antui sin anbi uab ma tuis propinsi-propinsi nane mese-mese. In amsa ansonu sulat nane neu atoni Yahudi anbi uab ma tuis Yahudi.

¹⁰Nai Mordekhai antui in kanan anbi sulat nane natuin Kesel Nai Ahasyweros kanan ma anmalak nani neki malak aplenat. Oke te Nai Mordekhai anlenu ale haef ma neki ale sulat-sulat nane neu propinsi-propinsi anbi pah nane fun sin ansae neu kesel in bikase akeot sin.

¹¹Sulat-sulat nane naton nak kesel nafetin ma anfe sona neu atoni Yahudi anbi ale kot he sin nabua ma anhake natau sin amonin. Leka ale ana' aikan na'ko to ma propinsi ma sin nem he nateku sin, nabe'i sin anlaban ma namate sin nok sin fe ma sin anah-anah sin; sin nabe'i anlolo namate ale sin musu-musu sin ma nabe'i nasik ale sin amaus sin.

¹²Mes nanaoba plenat nane anbi pah Persia ok-oke anbi neno le Nai Haman anlek nani he namate atoni-atoni Yahudi, anbi neno bo'es am tenu fun bo'es am nua, funan Adar.

¹³Sulat plenat nane mes napoitan nani on lasi tfeka mese ma natiaba nani neu atoni mese-mese anbi propinsi ok-oke he nati' to Yahudi naloitan he anlaban ale sin musu sin leka neno nane nem antia.

¹⁴Onane te ale haefen nane sin ansae neu kesel in bikase sin ma sin anfen ma sin anao. Plenat nane anso'i nani amsa, anbi Susan kot ainaf pah nane.

¹⁵Oke te Nai Mordekhai anpoi na'ko sonaf fun in anpake bale pake anaet metan amtasa ma muti, sobalu mnatu mas leok le'uf. Kot Susan tuakenu sin anhunun ma naba' fun sin namlil ma namoke.

¹⁶Atoni Yahudi sin anaben sin napeni snasat ma sin namlil, fun sin napeni ua alekot ma sin nekan nahenu nok amoket.

¹⁷Anbi ale kot ma propinsi, anbi me-me amsa anso'i sulat plenat na'ko kesel, atoni-atoni Yahudi namlil, ma namoke ma sin anmo'e fesat. Ma uf namfau anbi pah nane le antam ma anfani to Yahudi, natuin sin namtauan nonot nane.