Read Uab Meto ESTER 9 Bible Online

ESTER 9 - Uab Meto bible

ESTER 9

¹Namuni te neno bo'es am tenu funan Adar in anbol kun, nane neno le anlek nani he nanaoba kesel in aplenat neu atoni-atoni Yahudi. Musu-musu uf Yahudi sin anhat ma anpao neno nane hen hamu'i sin. Mes namuni te atoni Yahudi es anbe'u sin.

²Anbi kot mese-mese, atoni-atoni Yahudi sin nabua ma anmesnon hen laban ale atoni le ansali he nale'un sin. Uf-uf anbi me-me amsa anfani namtausan sin talantia katit fa es amsa le nabe'i hen laban sin.

³Ma fun ale anaet anbi propinsi, ale Kumlol, Bupati ma ale ana' aplenat anbab atoni Yahudi natuin sin al-al sin namtausan Nai Mordekhai.

⁴Anbi pah ok-oke atoni nahin nak Nai Mordekhai anfani atoni anaet anbi sonaf nanan ma in kuasat nane ansato piut.

⁵Onle nane atoni Yahudi sin anmo'e ale lasi natuin sin alomin neu sin musu sin, sin anlaban sin neki suni oke te namate sin.

⁶Anbi susan pah in kot ainaf, atoni Yahudi sin namate atoni natun nim.

⁷Anbi sin le nane Nai Haman Nai Hamedata anmone, musu naek atoni Yahudi in anmone sin bo'mese sin. Sin le nane esle': Nai Parsandata, Nai Dalfon, Nai Aspata, Nai Porata, Nai Adalya, Nai Aridata, Parmasta, Nai Arisai, Nai Aridai ma Nai Waizata. Mes atoni Yahudi sin ka nasik fa sa'-sa'.

¹¹Anbi neno nane amsa sin natonan kesel neu le namate atoni sin anbi Susan sin amfaukenu.

¹²Kesel nak neu Fenai bi Ester nak, “Al anbi Susan atoni Yahudi namate nalali atoni 500, nane nok Nai Haman anmone sin bo'mese. Sa' anteni anbi propinsi-propinsi! Neu oni sin hen mo'e sa' ka anbi nane! Nah, ho hem toti sa' anteni ka anbi tabu le i? Muton nai, of ho mes mupeni mani!”

¹³Fenai bi Ester natae nak, “Kalu Usi ho amlomi, so ho mufetin atoni Yahudi le natua anbi Susan i he nati' noka fa sin anmo'e anteni sa' le sin anmo'e nalali anbi neno i. Ma anteni amsa, so nati' Nai Haman anmone sin aon nitun naboni sin anbi ni boni sin.”

¹⁴Oke te kesel anfe plenat he nanokab bi Ester in han totis; ma napoitan sulat plenat neu kot Susan ma Nai Haman anmone bo'mese sin aon nitun naboni nani sin.

¹⁵Es nane te anbi neno bo'es am ha funan Adar, atoni Yahudi sin nabua anfani anbi Susan ma namate anteni atoni 300 anbi kot nane. Ma anbi haefes le i amsa sin ka nasik fa sa'-sa'.

¹⁶Atoni-atoni Yahudi le natua anbi propinsi-propinsi sin nabua amsa ma anhake natau sin amonin. Sin anbe'u sin musu sin ma namate atoni 75.000 le an unto'an neu sin. Mes sin ka nasik fa sa'-sa'.

¹⁷Lasi nane anbol anbi neno bo'es am tenu funan Adar. Anbi neno noka fa, anbi neno bo'es am ha, sin ka namate fa es amsa, mes sin naliatas neno nane nok amlilat.

¹⁸Mes atoni Yahudi le anbi Susan sin naliatas neno bo'es am nim anfani on neno naek, natuin sin namate sin musu sin anbi neno bo'es am tenu ma neno bo'es am ha.

¹⁹Es nane te atoni Yahudi le sin natua anbi kot-kot ana sin, sin naliatas neno bo'es am ha funan Adar anfani on neno amlilat, neno sin anmo'e fesat malinat ma on neno sin anmafenen atnatas bukae es nok es.

²⁰Oke onane te Nai Mordekhai antui ale lasi nane ma ansonu sulat neu ale atoni Yahudi anbi plenat Persia ok-oke, leko neu a'lot, ma neu anhaumakat.

²¹Sulat nane in nesan es lasi plenat he naliatas neno bo'es am ha ma neno bo'es am nim funan Adar anbi ton-ton.

²²Natuin anbi neno-neno nane sin anbe'u sin musu-musu sin, talantia sin nukat ma sin kulut nabaina anfani amlilat ma amoket. Es nane te sin mes he naliatas neno-neno nane neki fesat ma mei tolas ma anmafeneun bukae es neu es ma anbati amnaut neu atoni amamu'it sin.

²³Atoni Yahudi sin natuin Nai Mordekhai in aplenat nane ma nok nane te fesat nane anfani on halat mese anbi ton-ton.

²⁴Nai Haman Nai Hamedata anmone, Nai Agag sufan, musu naek atoni Yahudi anhel nalali sulat le antek amsa nak “purim” anlek nalali neno hen lolo namate atoni Yahudi; in ansali nalali he naneku sin.

²⁵Mes bi Ester antam naeku nok kesel, ma kesel anfe plenat le matui anbi sulat le anmo'e talantia salit amle'ut Nai Haman anmo'e nane anfani ma antom neu in aon kun, talantia in ma in anhenu naboni sin anbi ni boni.

²⁶Es nane te neno-neno naek nane antek sin nak Purim. Nai Mordekhai in sulat ma ale sa' le atoni Yahudi natef nokan,

²⁷in amnekin nane esle' anmo'e sin talantia sin anmo'e lekat lulut mese neu sin aokenu, neu sin sufan sin neu ale atoni le of antam ma anfani to Yahudi. Natuin lekat lulut nane anbi ton-ton sin mes he naliatas neno naek nua en nane le Nai Mordekhai anlek nalali.

²⁸Fun anlek nani amsa nak neno-neno naek Purim nane mes ale atoni Yahudi na'ko ale batan mes sin namnau nani ma naliatas nani anbi ale propinsi ma anbi ale kot talan nabal-bal.

²⁹Ma anesi na'ko nane, kesel in Fenai bi Ester bi Abihail in anfeto antui sulat hae nua nok Nai Mordekhai in sulat, le nahelan Nai Mordekhai in sulat nesan antom Purim nane.

³⁰Sulat nane ansonu neu ale atoni Yahudi, ma sulat in sonin nane ansonu sin neu propinsi 127 anbi plenat Persia. Sulat nane nok onen totis he nati' atoni Yahudi anbi aomina ma tainine piut.

³¹Sulat nane naton amsa he nati' sin ma sin sufan sin namnau neno-neno Purim nok alekot, onle sin namnau neno sin nanahon ma neno sin ankul ma ankae. Nane Nai Mordekhai ma Fenai bi Ester sin sulat in nesan.

³²Kesel in Fenai bi Ester in aplenat le anlek ale lekat lulut Purim, antui nani sin anbi sulat.