Read Uab Meto KELUARAN 1 Bible Online

KELUARAN 1 - Uab Meto bible

KELUARAN 1

¹Nai Yakub le nakanab in amsa Israel, in nao neu Mesir nok in anah-anah sin ma sin ume nanan sin mese-mese. Nai Yakub in anah-anah sin esle':

²Nai Ruben Nai Simeon Nai Lewi Nai Yehuda

³Nai Isakhar Nai Zebulon Nai Benyamin

⁴Nai Dan Nai Naftali Nai Gad Nai Asyer.

⁵Nai Yakub in sufan nane alsin atoni bo'hitu. Nai Yusuf in nao nahun neu Mesir.

⁶Anbi tabu fauk namuni te Nai Yusuf nok in biaf sin anmaten, onane amsa ale atoni le nabatnokan.

⁷Mes sin sufan, esle' atoni Israel, sin sufan ka'un nane namfau, ma sin aiken nane ansae piut nok manoe le'uf, talante pah Mesir nahenu nok sin.

⁸Namuni onane te kesel fe'u mese le ka nahin fa Nai Yusuf in nanaoba plenat anbi Mesir.

⁹In nak neu in to nak, “Atoni-atoni Israel nane of sin nale'un kit, natuin sin namfau nes ma sin nabe'i nesin kit.

¹⁰Oni kalu makenat anbol, sin of nabua ma sin neka mese nok musu he nati' anlaban kit, oke te sin naplenat pah le i. Hit mes he tami lanan he nati' sin ain nane kaisa namfau anesi anteni.”

¹¹Es nane te atoni-atoni Mesir naiti apanat-apanat neu to Israel he nati' anhafen sin monit neki mepu naek. Naseke sin he nati' sin nafena neu Kesel Mesir kot-kot Pitom ma Raamses hen fani kot anaek hen nabela ale blua.

¹²Mes maski nak atoni Mesir anhamu'i sin nok mafena, atoni Israel sin aiken nane antu'an ma namfau piut, ma sin nasitbok anfun natef ma nahenu pah nane, talante atoni Mesir namtausan sin.

¹³Oke te nok maufinu sin amhamu'i atoni Israel,

¹⁴ma nasusab sin anbi sin monin. Ka nok fa nek amnaut sin naseke sin ma anmepu nok matani anbi bale-bale mepu he nafena ma anbi lene-lene.

¹⁵Nalali te Kesel Mesir anfe plenat neu bi Sifra ma bi Pua, bife apalolit nua le antuntaku bife-bife Ibrani le he nahoni.

¹⁶Kesel Mesir nak, “Anbi tabu him tuntaku bife Ibrani he nahoni, mimnau lasi le i: Kalu li'ana le nahonis nane atoni, mimate in! Kalu li'ana le nahonis nane feto, mifetin he in anmoni.”

¹⁷Mes bife apalolit nua en nane atoni le namtausan Uisneno. Sin kan lomi fa he nanaoba kesel in plenat nane ma sin nafetin ale li'anmone sin anmoni.

¹⁸Es nane te kesel anboin apalolit nua en nane ma natan sin nak, “Nansa' es hi mifetin li'anmone sin anmoni?”

¹⁹Sin natae nak, “Bife Ibrani sin ka onfa bife Mesir. Sin nahoni ka nok fa susal. Nahun na'ko apalolit nem antia, sin nahoni nalali sin anah.”

²⁰Es nane te Uisneno anfe tetus neu bife-bife apalolit nane ma anfe neu sin sufa ka'uf, natuin sin nabes neu Uisneno. Ma atoni Israel sin ansato ma namfau piut ma anmatani.

²²Oke te kesel anfe plenat i neu in to ok-oke nak, “Ale li'anmone na'ko atoni Ibrani le fe nahonis nalali mes ampolin mitan sin neu Noe Nil in nanan, mes sin li'anfeto mifetin hen moni.”