Read Uab Meto KELUARAN 10 Bible Online

KELUARAN 10 - Uab Meto bible

KELUARAN 10

¹UISNENO nakua a'an neu Nai Musa nak, “Amnao nai amhake ambi kesel in matan. Au umanub ulali in nekan ma ale in anaet sin nekan, he nati' Au uton ale lasi amkakat anbi sin atnanan,

²ma he nati' nabe'i ho mutonan ho anah ma ho upuf sin neu Au useni atoni Mesir sin eki ale lasi amkakat le nane. Ma hi alki of mihin mak Au le i UISNENO kau.”

³Oke te Nai Musa ma Nai Harun sin nao ma anhake anbi kesel in matan ma nak neune nak, “UISNENO, atoni Ibrani sin Uisneno, nakua a'an nak, ‘Antia leka anteni he ho ka mubes neu Kau? Mufetin Au to he nao, he nati' sin naluli nabes neu Kau.

⁴Kalu fe hom tite amteni amsa, anbi noka fa of Au usanut lamat neu ho pah.

⁵Lamat nane namfau talante of ankub naneku afu le nane in fafon. Ale luet ma ale hau le ul fatu ka nale'un fa, of lamat nane nah nani sin.

⁶Ho sonaf, ale anaet sin ume ma to sin ume of nahenu nok lamat amsa. Snama le i of anaek anesin sa' le hi na'if sin naeku nokan.” Nalali te Nai Musa nabain'on ma in nao.

⁷Ale anaet sin nak neu kesel nak, “Atoni nane he nasusab kit antia leka anteni ka? Mufetin ale atoni Israel nane he sin nao he naluli nabes neu sin UISNENO nane. Amkiso nai hit pah le i namle'u nalali!”

⁸Es nane te kesel anboin Nai Musa ma Nai Harun anhake anbi in matan. Kesel nak neu sin nak, “Nabe'i him nao he miluli mibes neu hi UISNENO. Mes sekau am sekau anbi ki es of sin he nao?”

⁹Nai Musa natae nak, “Hai al-al kai oke, leko munif ma mnasi. Of hai meki hai anah sin, ma ale hai bijae, bibi kase, ma hai bibi sin, natuin of hai he mo'e tolas anaek mese he mibes neu UISNENO.”

¹⁰Kesel nak, “Au ka ufetin ki fa he hi meki ale bife ma hi anah sin! Le him toti nane namnes nok him toti he UISNENO anfe ki tetus. Au uhin ulali nak hi mu'i salit amle'ut.

¹¹Kahaf! Al atoni-atoni sin es nabe'i he nati' sin nao he naluli nabes neu UISNENO, kalu namneo al him sali he mo'e luli besa!” In anli'u Nai Musa ma Nai Harun na'ko sonaf neki molok-molok nane.

¹²Oke te UISNENO nakua a'an neu Nai Musa nak, “Amlulun ho nimam neu afu pah Mesir in fafon. Lamat-lamat of nem ma nah nani ale luet le afin ul fatu ka nale'un fa.”

¹³Nai Musa na'aiti in tias ma UISNENO nasanut anin neno saet anfu pah le nane anbi neno teme mese ma anbi fai teme mese in nanan. Anhaumak hen meonmone anin nane neki lamat-lamat

¹⁴le in ain namfau nae le'uf kun, talante nahenu pah nane. Atoni fe ka nit fa lamat le namfau onane, ma namuni na'ko nane amsa lasi nane kan bol anteni fa.

¹⁵Lamat an aum nan afu anfun natef talante atkisot metan. Sin nah nani ale sa' le ul fatu ka nale'un fa, ma ale hau-hau sin fuan. Anbi pah Mesir anfun natef ka tit fa sa' esle' no mate le nabala anbi hau ai luet.

¹⁶Nok manapat kesel anboin Nai Musa ma Nai Harun oke te in nak, “Au usanab ulali neu hi UISNENO ma neu ki amsa.

¹⁷Amsako kau au sanat anbi haef le i, ma amonen toti neu hi UISNENO, he nati' In naiti na'ko kau kasat le neki maten le i.”

¹⁸Nai Musa nasaitan kesel ma in onen toti neu UISNENO.

¹⁹Ma UISNENO nabaina anin in anaon anfani anin neno tes le anaek. Anin anfu neki lamat-lamat nane neu Tasi Gelagah. Anbi pah Mesir anfun natef kan mu'i fa lamat mese amsa le he nabala anbi nane.

²⁰Mes UISNENO namanub kesel in nekan, ma in ka nafetin fa atoni Israel he sin anao.

²¹UISNENO nakua a'an neu Nai Musa nak, “Muaiti ho nimam neu neno tunan, ma pah Mesir of nahenu nok mesokan.”

²²Nai Musa naiti in niman neu neno tunan, ma anbi neno tenu in nanan pah Mesir nane nahenu nok mesokan.

²³Atoni-atoni Mesir ka nit fa sa'-sa' ma anbi leku nane amsa kan mu'i fa es he nao neu me-me. Mes anbi atoni-atoni Israel sin ume anmeusine nabala.

²⁴Oke te kesel anboin Nai Musa ma nak, “Hi nabe'i amnao he miluli mibes neu hi UISNENO. Ale bife ma li'ana nabe'i sin nokan. Mes bijae, bibi kase, ma hi bibi ka nabe'i fa he hi meki sin.”

²⁵Nai Musa natae nak, “Kalu onane au Usif so hom fe kai mu'it anfani tulu ma anfani fua mnotu neu hai UISNENO.

²⁶Ale hai mu'it sin mes hai meki sin; ana mese amsa ka nabe'i fa he hai mani. Na'ko mu'it-mu'it nane of haim beti me es of hai he mitulu neu hai UISNENO. Leka hai amtia bale nane of hai mihin nok amneot mu'it me es of hai he mitulu.”

²⁷UISNENO namanub kesel in nekan talante in kan lomi fa he nafetin to Israel he sin nao.

²⁸Kesel nak neu Nai Musa nak, “Amnao nai mu'ko au matak! Kais au it ateni ko! Kalu talante au it ateni ko, of ho mate!”

²⁹“Onle ho mumolok au Usif,” Nai Musa in namolok onane. “Au Usif namneo of ho ka mit amteni kau fa.”