Read Uab Meto KELUARAN 12 Bible Online

KELUARAN 12 - Uab Meto bible

KELUARAN 12

¹UISNENO nakua a'an neu Nai Musa ma Nai Harun anbi pah Mesir.

²Sin nak, “Funan le i anfani funan ahunut na'ko hi neno sin.

³Mutiaba plenat le' i neu ale' to Israel: Anbi funan le i antam neno mese, so ale atoni anlolo bibi kase ana mese he nati' anbukae nok in ume nanan sin.

⁴Kalu ume nanan nane ka namfau fa neu he ka nalali fa bibi kase ana' nane, so leko sin nabua nok ume ahaumakat nabe'i sin al-al sin anbukae bibi kase ana' nane. Bibi kase ana' nane so ambati natuin aif atoni le anbukae.

⁵Nabe'i him beti bibi kase ai bibi, mes so keso, in uan ton mese, ma kan mu'i fa in amle'un.

⁶Hi mes ampanat in talantia neno bo'es am ha. Anbi neno nane, anbi neno anmabe, to Israel ok-oke mes sin anlolo bibi kase ana' nane.

⁷Maiti in na' kle'o ma amnose neu ni nua en le anbi eno ma eno in sutai abit fafon anbi ume sin anbukae anbine.

⁸Anbi fai nane amsa so anse'i in nesan ma anbukae nok utan amenut ma utunu' le ka nok fa lalu haef.

⁹So anse'i bibi kase ana' nane oke, nok in anakan, in haen ma in taif sin. Ambukae sisi le anse'i nalali nane, kais ambukae mate ai mihan.

¹⁰Kais hi mibela kle'o amsa na'ko sisi nane talantia noka fa; kalu anmu'i in nesin, mes motu mani oke.

¹¹Anbi tabu him bukae hi mes ampake milali hi blua pake lanan, ma peni haef anbi hi haem ma tias anbi hi nimam. Hi mes ambukae lab-lab. Nane Tolas Paskah he nati' hi minaeb Kau, hi UISNENO.

¹²Anbi fai nane of Au fun utef pah Mesir, ma umate ale anmone nael, leko mansian, ai mu'it. Of Au kas ale uisneno teta anbi Mesir, natuin Au UISNENO kau.

¹³Na' le anbi hi ume in eno of anfani taka' na'ko ume-ume bale hi mitua ambine. Kalu Au it na' nane, of Au nao a'fini ma ka ule'un fa anbi leku Au kas pah Mesir.

¹⁴Neno nane hi mimnau mani anfani neno naek neu UISNENO. Ma neno nane so mes hi mimnau mani piut anbi ton mese-mese.”

¹⁵UISNENO nakua a'an nak, “Anbi neno hitu in nanan kaisa hi miah utunu' le ka nok fa lalu haef. Anbi neno ahunut ale lalu haef mes mipoitan sin na'ko hi ume, natuin kalu anbi neno hitu in nanan nane atoni mese in nah utunu' le antao lalu haef, ka nabe'i fa hen so'i in on Au to anteni.

¹⁶Anbi neno ahunut, ma anbi neno hitu amsa, hi mes mibua he miluli ma mibes. Anbi neno nane kais hi minaoba' hi mepu mese amsa so kalu he miloitan mnahat.

¹⁷Anbi neno nane ho to sin ok-oke Au eki sin anpoi na'ko Mesir. Es nane te so hi minaob neno naek nane piut, anbi ton mese-mese, neno nane mes hi mimnau mani on neno naek.

¹⁸Anbi funan ahunut, naubon na'ko neno bo'es am ha anbi fai, talantia antam neno bo'nua mese anbi fai, ka nabe'i fa hi miah utunu' le nok lalu haef. Anbi neno hitu in nanan ale lalu haef mes hi mipoitan sin na'ko hi ume nanan. Atoni Israel ai atoni anao amnemat le anbi neno naek nane sin nah utunu' le nok lalu haef, kan so'i anteni fa sin on Au to.”

¹⁹

²⁰

²¹Ma Nai Musa no'en ale atopus Israel ma nak neu sin nak, “Amnao nai ma maiti bibi kase ana' mese neu hi ume nanan he minaeb Tolas Paskah.

²²Maiti kmio fatu mese, ma amlepan neu bibi kase in na' le anbi fane in nanan, oke te amnose neu ni nua en abit eno ma hi ume enon in sutain. Kais atoni mese na'ko ki nasaitan ume talantia noka fa.

²³Anbi tabu UISNENO anfun natef pah le i he namate atoni-atoni Mesir, of UISNENO In nit ana' anbi ni nua en ma sutai anbi ume in eno abit fafon; In of anao anfin ma In ka nafetin fa Ahake neno Amate atoni nane hen tam neu hi ume he namate ki.

²⁴Hi ma hi anah-anah sin mes hi mituin plenat nane talantia nabal-bal.

²⁵Kalu him tam milali neu pah le UISNENO anta'en nalali neu ki, hi mes minaoba lasi le i.

²⁶Kalu hi anah-anah sin natoti ki nak, ‘Tolas le i in otan sa' ka?’

²⁷Hi mes mitae mak, ‘Le i fua tulu Paskah he tanaeb UISNENO, natuin ume atoni-atoni Israel anbi Mesir In anfini ma ankono na'ko sin, tabu In namate ale anmone nael atoni Mesir, ma In anfe kit honis ma aomina!’ ” Oke te atoni-atoni Israel sin anlitu ma sin naluli ma nabes.

²⁸Oke te sin Anao ma nanaoba sa' le UISNENO naplenat nani neu Nai Musa ma Nai Harun.

²⁹Anbi fai atnanan nane UISNENO namate ale li'anmone nael na'ko to Mesir, naubon na'ko kesel in anmone nael, talantia atoni-atoni abit o'of sin anmone nael. Ale mu'it in ana' ahunut namate amsa.

³⁰Fai le nane kesel, ale anaet ma ale atoni Mesir sin naskek ma anfenan. Kaet kulut anfun natef pah Mesir natuin kan mu'i fa ume mese amsa le kan mu'i fa li'anmone amates.

³¹Anbi fai nane amsa, kesel no'en Nai Musa ma Nai Harun ma nak neu sin nak, “Hi ale ki, amnao nai, mi'ko i! Misaitan au pah! Amnao nai he miliatas hi Uisneno onle him toti.

³²Meki ale hi bijae, bibi kase ma hi bibi sin, ma him nao nai! Ma amtoti tetus neu kau amsa!”

³³Atoni Mesir sin naseke atoni Israel he nati' sin anao labah nasaitan pah nane. Sin nak, “Of hai mate ok-oke kalu hi kam nao fa!”

³⁴Oke te atoni-atoni Israel naiti sin nai ukabu le kan tao utunu' fa lalu haef, sin an amu neki pilu ma sin nasae.

³⁵Sin amsa nanaoba sa' le Nai Musa naton nalali neu sin, esle' sin antoti blua pake mnatu ma noni muti ma blua pake na'ko atoni Mesir.

³⁶UISNENO anmo'e atoni Mesir sin nek mahoen neu atoni-atoni Israel sin, talante sin anfe ale sa' le atoni Israel sin antoti. Nok lanan nane atoni Israel sin neki mu'if atoni Mesir anpoi na'ko pah nane.

³⁷Atoni Israel sin anfen ma sin anao hae na'ko kot Raamses neu kot Sukot. Sin amfaun atoni 600.000, kan so'i fa bife ma li'ana.

³⁸Sin neki bijae namfau, bibi kase ma bibi. Atoni anao amnemat namfau le sin nok amsa.

³⁹Sin antunu utunu' le kan tao fa lalu haef na'ko u kabu le sin neki na'ko Mesir. Anli'u sin nok askeken, talante kan mu'i fa sona he sin naloitan bukae.

⁴⁰To Israel sin namaika anbi pah Mesir nan ton 430.

⁴¹Anbi neno ton 430 in amsopun nane, UISNENO In to pukan-pukan anpoi nasaitan pah Mesir.

⁴²Anbi fai nane UISNENO anpao sin piut he napoitan sin na'ko Mesir. Ma nane amsa fai le sin natulu neu UISNENO anfani fai mnaut. Anbi fai nane to Israel mes sin anpao piut.

⁴³UISNENO nakua a'an neu Nai Musa ma Nai Harun nak, “Le i lekat lulut neu Tolas Paskah. Atoni anao amnemat ka nabe'i fa hen bukae sisi bibi kase le natulu anbi neno Paskah.

⁴⁴Mes ate le him sos nabe'i he in nah, kalu anhapi nalali in.

⁴⁵Atoni anao amnemat ai atoni lenu ka nabe'i fa he in nah nok.

⁴⁶Bibi kase in sisi ok-oke mes hi miah anbi ume, ma ka nabe'i fa he meki anpoi. Kaisa am ipu nuif mese na'ko in nuif sin.

⁴⁷To Israel ok-oke mes naliatas tolas nane.

⁴⁸Atoni le ka mahapi fa ka nabe'i fa he nah mnahat na'ko tolas nane. Kalu atoni anao amnemat mese le namaika nok ki ansali he nok nanaeb Tolas Paskah he naluli ma nabes neu Kau, UISNENO, ale atoni anbi in ume nanan mes mahapi nahunu fe. Nalali onane te anso'i sin on atoni Israel, ma sin nabe'i nok nanaeb Tolas Paskah.

⁴⁹Lekat lulut le i amsa antom neu atoni Israel ma atoni anao amnemat le namaika nok ki.”

⁵⁰Ale atoni Israel sin natuin ma anmo'e ale UISNENO In aplenat neu Nai Musa ma Nai Harun.

⁵¹Anbi neno nane UISNENO neki to Israel ok-oke anpoi na'ko pah Mesir.