Read Uab Meto KELUARAN 14 Bible Online

KELUARAN 14 - Uab Meto bible

KELUARAN 14

¹Namuni te UISNENO nak neu Nai Musa nak,

²“Amlenu atoni Israel anao anfani ma nahakeb um-ume anbi kot Pi-Hahirot in matan, anbi kot Migdol ma Tasi Gelagah, anhaumak kot Baal-Zefon.

³Kesel Mesir of natenab nak atoni Mesir sin anfun pah le i ma anseke anbi mnela hufui.

⁴Of au umanub in nekan talante in anli'u natuin ki. Mes of Au uton ani Au kuasat neu Kesel Mesir ma in meo pa'e sin, ma sin of nahin nak Au UISNENO kau.” Oke te atoni Israel anmo'e onle UISNENO naplenat nalali neu sin.

⁵Leka Kesel Mesir in anen nak to Israel sin naen nalali, in ma in anaet sin antofok ma sin nak, “Sa' es of hit het mo'e ka? Nansa' es hi tafetin atoni-atoni Israel nane sin nao talante hit taneku tani ale ate-ate nane?”

⁶Oke te kesel naloitan aklet makenat ma in meo pa'e sin.

⁷In anfen ma anao nok in aklet sin, le sin amfaun aklet amasat natun ne, le in meo pa'e sin ansae anbin.

⁸Namneo UISNENO namanub kesel in nekan, talante in anli'u natuin atoni Israel anbi lanan in atnanan leka sin nasaitan pah nane nok tuntakus UISNENO.

⁹Meo pa'e ai solalus Mesir nok ale sin bikase, aklet ma in asaet sin anli'u atoni Israel, ma natuin sin anbi sin um-ume anbi tasi in ninen anhaumak Pi-Hahirot.

¹⁰Leka atoni Israel sin nit Kesel Mesir ma in solalus sin nem, sin namtau ma ansakoi neu UISNENO antoti babat ma tuntakus.

¹¹Sin nak neu Nai Musa nak, “Ai anbi Mesir kan mu'i fa naukel, talante ho meki kai he nati' hai mate anbi bale i? Amkiso ho mo'et in amsopun nane!

¹²Afi ahunut anbi Mesir hai miton milali mak lasi nane of anbol! Hai mak neu ko nok aseke he nati' kais ho muaunu kai, mes mufetin kai he haim fani ate piut anbi Mesir. Leko nesi haim fani ate piut anbi nane na'ko hai mate anbi mnela hufui le i!”

¹³Nai Musa natae sin nak, “Kais mimtau! Mihelnom! Of hi mit sa' le UISNENO anmole he nafetin ki. Atoni Mesir le hi mit sin anbi tabu le i, of hi ka mit amteni fa sin.

¹⁴UISNENO of anmaken anseka ki, ma ka nabe'i fa he hi mo'e sa'-sa'.”

¹⁵UISNENO nakua a'an neu Nai Musa nak, “Nansa' hom ambai amtoti tuntakus? Amlenu atoni Israel sin anao piut!

¹⁶Maiti ho tias am amlulun neu tasi in fafon. Ma oe of anbaitson ma atoni Israel nabe'i anlak anfini tasi ma anao natuin atnanan le anmeto.

¹⁷Au of umanub atoni Mesir sin nekan talante sin anli'u natuin atoni Israel piut, ma Au of uton ani Au kuasat neu Kesel Mesir, in solalus sin, aklet-aklet ma ale in asaet sin.

¹⁸Ma atoni Mesir of sin nahin nak Au UISNENO kau.”

¹⁹Oke te ahake Uisneno, le anbi to Israel sin matan, in natnani neu atoni Israel sin kotin. Ma ni nope amsa in natnani talante in anhake anbi

²⁰to pukan Mesir ma to pukan Israel sin atnanan. Nope nane napoitan mesokan, talante anbi fai teme nane in nanan to pukan nua en nane kan ma haumakan fa es nok es.

²¹Oke te Nai Musa anlulun in niman neu tasi in fafon, ma UISNENO nasanut anin neno saet anfu nok matani talante oe tasi anhelson. Anin anfu piut anbi fai teme mese in nanan, ma nabaina tasi anfani pah meto.

²²Oe tasi anbatison no nua, ma anbi tabu atoni Israel sin anlak tasi, sin nao natuin afu ametos ma oe anbi a'li ma a'ne'u anfani baki lape.

²³Atoni Mesir nok ale sin bikase, aklet ma sin asaet sin anli'u sin piut ma sin natuin atoni Israel antia tasi atnanan.

²⁴Anhaumak manas anpe' UISNENO ankiso na'ko ni ai ma ni nope neu solalus Mesir ma In nasitab sin.

²⁵In anmo'e aklet sin haen nane ka nao anteni fa talante sin ka nao mat fa. Atoni Mesir sin nak, “UISNENO anhake nok atoni Israel ma anlaban kit. Aim he hit ta'en ta'ko bale i!”

²⁶UISNENO nakua a'an neu Nai Musa nak, “Amlulun ho nimam neu tasi in fafon, ma oe of nabua anfani, ma atoni Mesir of sin anlem, nok sin aklet sin ma atoni-atoni asaet sin.”

²⁷Oke te Nai Musa nalulun in niman neu tasi in fafon ma anbi tabu manas anpe', oe nane anfani neu in a'haken ahunut. Atoni Mesir nami lanan he nafetnok, mes UISNENO nalema sin anbi tasi in nanan.

²⁸Oe tasi anfani neu in balan ma ankub nan aklet sin, asaet sin, ma ale solalus Mesir le anli'u atoni Israel anbi tasi in atnanan, talante sin anmate ok-oke.

²⁹Mes leka atoni Israel sin anlak tasi, sin anao natuin afu ametos ma oe anfani baki lape aon bian a'li ma a'ne'u.

³⁰Anbi neno nane UISNENO nafetin to Israel na'ko makenat atoni Mesir, ma sin nit atoni-atoni Mesir sin aon nitun mapolin anbi tasi in ninen.

³¹Leka atoni Israel sin nit neu onme UISNENO nok In kuasat le anaek nis ma anbe'u atoni Mesir, sin namkakan nae le'uf talante sin anpalsai neu Nai Musa In ate nane.