Read Uab Meto KELUARAN 15 Bible Online

KELUARAN 15 - Uab Meto bible

KELUARAN 15

¹Oke te Nai Musa ma atoni-atoni Israel ansi sit le i ma anpules UISNENO nak, “Au he si sit pules neu UISNENO, natuin In nis nalali nok matani. Ale bikase ma asaet sin In anpolin sin neu tasi in nanan;

²UISNENO au apesit le matani; In es nafetin kau. In le nane au Uisneno, au he uliatat In, Uisneno le au na'i au be'i nabes neune, au uliatat In.

³UISNENO nane meo naek abe'it ma matani, In kanan nane, UISNENO.

⁴Meo pa'e Mesir ma ale sin aklet sin In anpolin natam sin neu tasi in nanan. In meo pa'e nakaf sin le abe'it ma matani In nalema sin anbi Tasi Gelagah in nanan.

⁵Tasi amnanut an olo nan sin, ma onle fatu ansanu neu in tu'in.

⁶Ho be'im ho matanim neki lasi am kakat nae le'uf, koi UISNENO, Ho mo'e musu nasitbok oke.

⁷Nok Ho apinat le anaek Ho mule'un sin le anlaban Ko. Ho to'as nane anpin on ai, ma notu sin on aen ta'u.

⁸Tasi Ho amfu, in oe an nunuon namnanu, anhake namep on baki lape, talante sin anao nok tasi in atnanan.

⁹Musu nak, ‘Of au li'u sin ma au heke sin, au faki au suni, ma au umate sin. Oke te au usik an sin amaus, au bati ma au umlil talante namsopu.’

¹⁰Mes leka UISNENO anfun In asnasan haef mese nasanut amle'ut neu atoni Mesir. Sin anleman onle tnopas le mafena anbi okin amaunut in nanan.

¹¹Uisneno me es nabe'i hen laban Ko, koi UISNENO Apinat Anesit ma aknino? Sekau nabe'i anmo'e ale lasi amkakat ma taos mo'et anaet onle UISNENO?

¹²Ho menu Ho nukum ne'u, ma musu namneku natuin pah pinan an olo nan sin.

¹³Hom fani atopus neu to le Ho mufetin mulali sin, natuin Ho mu'ki neu fef ba'an. Nok be'it matani Ho muneo ma muhafo sin, ma Hom topu sin neu Ho bale knino.

¹⁴Uf-uf sin anen ma na'tai, atoni Filistin ma ale atopus Edom sin naskeken. Atoni Moab le abe'it ma matani sin na'tai, atoni Kanaan sin namtau.

¹⁶Sin namtau nae le'uf ansaksi be'it ma matani UISNENO. Anbi tabu Ho to sin anfin ma ankon, musu kan mu'i fa kuasat hen eka sin; to le Ho mufetin sin anfini ma ankono kun.

¹⁷Oke te Ho meki Israel neu bale le Hom beti hen fani Ho bale maika. Sin namaika nabala anbi Ho tubu knino, anbi Ho Ume le Ho es mufena.

¹⁸Ho UISNENO ko, Kesel, le muplenat tal nabal-bal.”

¹⁹Anbi tabu atoni Israel sin anlak tasi, sin anao natuin in atnanan le anmeto. Mes leka aklet-aklet atoni Mesir nok bikase ma atoni asaet sin antam anbi tasi, UISNENO naekub nafani in oe talante sin anleman.

²⁰Oke te bi Miryam, mafefa knino bife mese, Nai Harun in tataf, in naiti ket', ma ale bife sin anleku ma nabso'an.

²¹Bi Miryam ansi neu sin nak, “Amsi nai neu UISNENO, natuin In nis ma anbe'u nalali nok matani. Ale bikase ma asaet sin anpolin natam sin neu tasi in nanan.”

²²Nalali te Nai Musa in neki to Israel na'ko Tasi Gelagah sin anao neu mnela snaen Syur. Anbi neno teme tenu sin anao natuin mnela snaen mes sin ka nit fa oe.

²³Oke te sin nem antia bale mese in kanan Mara, mes oe anbi nane meun le'uf kun, talante ka nabe'i fa he sin ninu. Es nane te bale nane antek nak Mara, in oten nak menu.

²⁴Ma atoni-atoni nane namunu Nai Musa ma sin natoti in nak, “Hai of minu sa' ka?”

²⁵Nai Musa in onen neu UISNENO nok amneot, oke te UISNENO naton neune hau tuka mese. Nai Musa anpolin natam hau nane neu oe in nanan, oke te oe nane namin anfani, talante nabe'i sin ninu. Anbi bale nane UISNENO anfe In lekat lulut neu sin, ma anbi nane amsa In ansu' sin.

²⁶UISNENO nakua a'an nak, “Mituin Au plenat sin nok amneot, ma mo'e nai sa' le naleko anbi Au kisot; mituin nai ale Au plenat sin. Kalu hi mo'e onane, of Au ka kas ki fa eki menas-menas le Au usanut ulali neu atoni Mesir. Au le i UISNENO le es uleko ki.”

²⁷Nalali onane te sin nem antia bale le in kanan Elim. Anbi nane anmu'i oe mata bo'es am nua ma pet kase bo'hitu. Sin nahakeb sin um-ume anhaumak oe mata nane.