Read Uab Meto KELUARAN 16 Bible Online

KELUARAN 16 - Uab Meto bible

KELUARAN 16

¹Oke te to Israel ok-oke anfen na'ko Elim, ma anbi fun nua antam neno bo'es am nim leka sin nasaitan nalali Mesir, sin nem antia mnela snaen Sin, anbi Elim ma Tubu Sinai sin atnanan.

²Anbi mnela snaen nane sin alsin namunu Nai Musa ma Nai Harun.

³Sin nak, “Naleko nesi oni bait afi UISNENO namate kai anbi pah Mesir. Anbi bale nane hai nabe'i antoko ma miah sisi ma utunu' talante hai mimsen. Mes hi meki kai neu bale i he nati' hai ale kai amate natuin amnahas.”

⁴UISNENO nakua a'an neu Nai Musa nak, “Leku le i of Au usanut mnahat nok athoes onle ulan neu ki. Neno-neno mes him nibun mnahat nane al neu neu neno mese. Nok lanan nane Au lomi he su' Au to ne nati' Au uhin oni sin fe natuin Au plenat-plenat sin ai kahaf.

⁵Anbi neno ne sin mes anibun mnahat nane in amfaun kuni nua.”

⁶Es nane te Nai Musa ma Nai Harun nak neu atoni Israel nak, “Anbi neno mabe i hi of mihin nak UISNENO es napoitan ki na'ko pah Mesir.

⁷Anbi neno noka of hit mit UISNENO In apinat. UISNENO In nen ki neu hi mito'an In; namneo, alkun UISNENO, natuin hai le i al minaoba sa' le In naplenat nani.

⁸UISNENO of anfe neu ki sisi anbi neno anmabe le i, ma utunu' anbi nok-noka he nati' hi mimsen, natuin UISNENO nen nalali hi nek maputu neu In. Namneo, hi mito'an kai, hi mito'an UISNENO kun.”

⁹Namuni te Nai Musa nak neu Nai Harun nak, “Amlenu sin ale sin he nem anhake anbi UISNENO In matan, natuin In nen nalali sin lasi munu nane.”

¹⁰Anbi leku Nai Harun fe namolok nok sin oke, sin ankiso neu mnela snaen ma nok askeken sin nit UISNENO In apinat anbi nope in nanan.

¹¹UISNENO nakua a'an neu Nai Musa nak,

¹²“Au nen ulali atoni Israel sin lasi munu. Mutonan sin mak anbi neno anmabe of sin anbukae sisi, ma anbi noka fa of sin anbukae utunu' talantia sin namsen. Ma sin of nahin nak Au, UISNENO kau, le sin Uisneno.”

¹³Anbi leku neno anmabe kol pui namfa-fau sin nem talante an aum nan ale sin um-ume, ma anbi leku nok-noka akum ansanu ma anfun natef sin um-ume.

¹⁴Leka akum nane nasum nalali, sin nit anbi mnela snaen in fafon sa' es manihis onle ika in knufan ma malule onle sen-sene.

¹⁵Leka atoni Israel sin nit, sin ka nahin fa neu sa' esle' nane. Es nane te sin anmantanan es nok es nak, “Sa' esle' nane?” Oke te Nai Musa nak neu sin nak, “Le nane bukae le UISNENO anfe nani neu ki.

¹⁶UISNENO naplenat sin he nati' sin es-es anibun natuin le sin hen pake, esle' liter nua neu atoni mese.”

¹⁷Atoni Israel anmo'e onane; mes bian naiti nesi na'ko liter nua atoni mese ma anmu'i le kan tia fa.

¹⁸Leka sin ansu', naklil'on nak atoni le anibun namfau, ka nesi fa, ma le anibun akle'o, ka nanuka fa. Sin es-es anibun namnes nok le sin hen pake.

¹⁹Nai Musa nak neu sin nak, “Sekau amsa ka nabe'i fa he nabelak bukae nane kle'o amsa neu noka.”

²⁰Mes atoni fauk-fauk na'ko sin atnanan ka nen fa Nai Musa in molok. Sin nabelak bukae nane bian amsa. Anbi noka fa bukae nane nakauna ma nafo; es nane te Nai Musa nato'an sin.

²¹Anbi ale nok-noka sin anibun bukae nane in amfaun namnes nok le sin hen pake, ma leka manas anmaputu, bukae le nabala anbi afu nane in namnoe.

²²Anbi neno ne sin nibun bukae nane kuni nua, esle' liter ha neu atoni mese. Ale sin atopus sin nem ma naton lasi nane neu Nai Musa.

²³Nai Musa namolok neu sin nak, “Le i UISNENO In aplenat: Neno noka nane neno mabeti he nati' hi misnas, neno Snasat, neno le natulu ma natnat nani neu UISNENO. Sa' le him lomi hem amse'i anbi neno i, amse'i nai, ma sa' le him lomi he mihan, mihan nai. Le anesi na'ko hi hem pake anbi neno i, ambanaika ma mibelak neu noka.”

²⁴Es nane te bukae nesif nane sin nabelak neu noka fa onle Nai Musa naplenat; bukae nane ka namle'u fa ma ka nakauna fa.

²⁵Nai Musa nak, “I bukae neu neno le i, natuin neno esle' i neno Snasat, neno he misnas he nati' miliatas UISNENO, ma hi of ka mit fa bukae nane kle'o amsa anbi um-ume in kotin.

²⁶Neno ne in nanan hi mes mibuab bukae, mes anbi neno hitu nane neno snasat, ma kan mu'i fa bukae le hen sanu anbi neno nane.”

²⁷Anbi neno hitu atoni Israel fauk-fauk sin he nibun bukae ai mnahat, mes sin ka napeni fa sa'-sa'.

²⁸Oke te UISNENO nakua a'an neu Nai Musa nak, “Hi kam lomi fa he mituin Au plenat sin antia leka anteni?

²⁹Mimnau nai nak Au fe neu ki neno mese he nati' hi misnas. Es nane te anbi neno ne Au fe mnahat le nanokbon neu neno nua. Anbi neno hitu atoni mese-mese mes nabala anbi in ume, ma ka nabe'i fa he in anpoi.”

³⁰Es nane te anbi neno hitu sin kan mepu fa.

³¹Atoni Israel sin antek mnahat nane nak manna ai mak muti. Natuin in masan muti onle sip aijao fuan ma in minan onle kokis le antao oni oef neune.

³²Nai Musa nak, “UISNENO anlenu kit he taiti manna ai mak muti kais anesi na'ko liter nua he tahik ma tapan neu hit sufak, he nati' sin nit mnahat le UISNENO anfe neu kit anbi mnela snaen, anbi leku In napoitan kit na'ko pah Mesir.”

³³Nai Musa nak neu Nai Harun nak, “Maiti tasu mese amtao mak muti kais anesi na'ko liter nua neu in nanan, ma amtao anbi UISNENO In matan neu hit sufak.”

³⁴Es nane te Nai Harun antao tasu nane anbi Peti Fef Bela he nati' nahik ma napan nani matom nok plenat UISNENO neu Nai Musa.

³⁵Mak muti nane anfani on atoni Israel sin bukae anbi ton bo'ha in nanan talante sin antia pah Kanaan, bale sin namaika anbine. (

³⁶Tnais le sin anpake anbi batan nane, in mafenan liter bo'nua.)