Read Uab Meto KELUARAN 17 Bible Online

KELUARAN 17 - Uab Meto bible

KELUARAN 17

¹Nalali onane te ale to Israel sin nasaitan mnela snaen Sin ma sin natnani na'ko bale es neu bale bian onle UISNENO naplenat nani. Anbi leku mese leka sin nahakeb um-ume anbi Rafidim, mes anbi nane kan mu'i fa oe mninu.

²Oke te sin namunu Nai Musa nak, “Amfe neu kai oe mninu.” Nai Musa natae nak, “Nansa' hi mimunu ma amsu' UISNENO?”

³Mes natuin atoni-atoni nane sin anmenon es nanete sin na'munu' Nai Musa piut. Sin namolok nak, “Nansa' es ho meki kai ampoi mi'ko pah Mesir? He nati' hai, ma hai anah sin, ma hai mu'it sin anmate natuin meno?”

⁴Es nane te Nai Musa in onen ma ansakoi neu UISNENO, nak, “Of au mo'e sa' ka neu atoni-atoni le i? Amkiso nai, sin hen poli kau neki fatu.”

⁵UISNENO nakua a'an neu Nai Musa nak, “Amboin atopus fauk-fauk ma amnao mihunun to le nane. Meki tias le hom pake ma amlulun neu Noe Nil.

⁶Of Au hake bi ho matam anbi fatu naek mese anbi Tubu Sinai. Amtepo fatu nane, ma oe of anpoi talante atoni-atoni nane sin ninu.” Nai Musa anmo'e onane ma ale atopus Israel sin ansaksi lasi nane.

⁷Nai Musa nakanab bale nane Masa natuin anbi bale nane atoni Israel ansu' UISNENO anbi tabu sin natan nak, “UISNENO nok kit ai kahaf?” Bale nane amsa nakanab nak Meriba natuin anbi bale nane atoni Israel sin namunu.

⁸Namuni te atoni Amalek sin nem ma anmaken nok atoni Israel anbi Rafidim.

⁹Nai Musa nak neu Nai Yosua nak, “Ambeti nai atoni fauk-fauk he nati' amaken mok atoni Amalek. Noka fa of au hake bi tubu in tunan ma au na' tias le Uisneno anlenu kau ma au eki.”

¹⁰Nai Yosua anmo'e sa' le Nai Musa naplenat nani neune. In nao ma anmaken nok atoni Amalek, Nai Harun ma Nai Hur sin ansae neu tubu nane in tunan.

¹¹Anbi tabu Nai Musa na' naiti in niman, atoni Israel sin nisan. Mes leka Nai Musa nasanut in niman, atoni Amalek sin nisan.

¹²Leka Nai Musa anhae, Nai Harun ma Nai Hur sin antao fatu mese he nati' Nai Musa antok anbin; Nai Harun ma Nai Hur anhake anbi Nai Musa in aon bian a'li ma bian a'ne'u ma antuntaku in niman, he nati' na'aition piut talantia manas antes.

¹³Namuni te Nai Yosua in nis ma anbe'u atoni Amalek.

¹⁴UISNENO nakua a'an neu Nai Musa nak, “Amtui antom lasi mnisat le i he nati' hi mimnau piut. Mutonan Nai Yosua mak of Au ule'un atoni Amalek.”

¹⁵Oke te Nai Musa nafena baki tulu mese ma in nakanab nak “UISNENO nane au pen-pene.”

¹⁶Nai Musa nak, “Miaiti nai pen-pene UISNENO! UISNENO anmaken ma anlaban atoni Amalek tal nabal-bal!”