Read Uab Meto KELUARAN 18 Bible Online

KELUARAN 18 - Uab Meto bible

KELUARAN 18

¹Nai Musa, in babaf, Nai Yitro, Ana' fuat knino anbi pah Midian, in nen neu Uisneno anmo'e ale sa' neu Nai Musa ma to Israel, anbi leku In napoitan sin na'ko pah Mesir.

²Es nane te Nai Yitro in anao ma ansenu Nai Musa, in neki bi Zipora, Nai Musa in fenai le fe namaika anbi pah Midian,

³in nok Nai Gersom ma Nai Eliezer, in anmone nua sin. In anmone unu nakanab Nai Gersom natuin Nai Musa nak, “Au atoni amnemat kau anbi pah mata teme,”;

⁴anmone kliko nakanab Nai Eliezer natuin Nai Musa nak, “Uisneno le au na'i au be'i nabes neune In antuntaku nalali kau ma In es nafetin kau talante Kesel Mesir ka namate kau fa.”

⁵Nai Yitro nem nok Nai Musa in fenai ma in anah nua sin neu mnela snaen bale Nai Musa nahakeb in um-ume anhaumak nok tubu knino.

⁶In anfe hanaf neu Nai Musa nak of sin neman,

⁷es nane te in anpoi ma ansenu sin. In nabes anbi Nai Yitro in matan ma anek in. Ma sin mantotin es nok es neu sin aominan ai kahaf, oke te sin antaman neu Nai Musa in um-ume.

⁸Nai Musa natonan in babaf ale sa' le UISNENO anmo'e nalali neu kesel ma neu to Mesir he nati' nafetin to Israel. In amsa naton neune ale mafena-mafena le Israel naeku ma natef anbi lanan atnanan, ma onme UISNENO nafetin sin.

⁹Leka Nai Yitro in nena ale lasi nane in namlil

¹⁰ma in nak, “Pules liatas neu UISNENO le anfe ki aomina ma nafetin ki na'ko kesel in niman ma na'ko to Mesir! Pules liatas neu UISNENO le nafetin to Israel na'ko lasi aten!

¹¹Tabu le i au uhin nak UISNENO nane naek anesin ale uisneno teta, natuin ale lasi le In anmo'e nane leka atoni Mesir sin naton neka naeb neu to Israel.”

¹²Nalali te Nai Yitro neki tulu mnotu ma tulu lolot anfani tulu neu Uisneno. Nai Harun nok ale atopus to Israel sin nem ma anbukae nok Nai Yitro anbi Uisneno In human ma In matan.

¹³Anbi noka fa Nai Musa anlefi lasi matoes anbi atoni-atoni Israel. Mepu nane nah tabu na'ko nok-noka antia fai nanesab.

¹⁴Leka Nai Yitro ankiso ale Nai Musa in mepu sin in natoti nak, “Sa' es mes ho he mepu neu to le i? Ale mepu i mes ho mese mepu sin, talante al hen toti ho fainekat, atoni-atoni nane mes anhake anbi i na'ko nok-noka talantia anfai?”

¹⁵Nai Musa natae nak, “Atoni-atoni nane sin nem neu kau he nati' nahin Uisneno In lomin.

¹⁶Kalu sin anmabanan, sin nem neu kau he nati' au ufek sin lasi, ma au utiaba neu sin ale plenat ma lekat lulut Uisneno.”

¹⁷Nai Yitro nak, “Ka leko fa onane.

¹⁸Nok lanan nane ho muhaeb ho aom, ma atoni-atoni nane amsa. Mepu nane mafena neu atoni mese.

¹⁹Mutnin au fainekat, ma Uisneno of antuntaku ko. Namneo leko hom fani on aseka neu to le i anbi Uisneno In matan, ma ho meki sin lasi neu In.

²⁰Ho mes munoina neu sin plenat-plenat Uisneno ma muton neu sin monit alekot ma sa' le sin he nanaoba nani.

²¹Mes naik na'ko nane mes hom beti atoni fauk-fauk le mahine, ma amlek sin hen fani atopus neu atoni nifun mese, atoni natun mese, atoni bo'nim, ma atoni bo'mese. Sin le nane so atoni-atoni le namtausan ma na'ki neu Uisneno, atoni le mapalsai ma le kan lomi fa hen simo noni mate.

²²Ma amlenu sin hen fani on alef lasi neu to le i, es-es neu in nonot. Mepu nane mes sin nanaoba nani nok alekot. Lasi-lasi mafena nabe'i sin neki nem neu ko, mes mabanat le an-ana nabe'i sin naloitan nani. Lasi nane of anhakaf ko ma sin ansutai anpeni ko.

²³Leka ho mo'e onane, ma lasi nane Uisneno es naplenat nani neu ko, ho mes nabe'i munaoba ho mepu, ma ale atoni of sin anfani nok malinat natuin sin lasi mapaloli nok manoe.”

²⁴Nai Musa natuin Nai Yitro in fainekat,

²⁵ma in anbeti atoni-atoni ahinet na'ko to Israel sin atnanan. In anlek sin anfani atopus neu atoni nifun mese, atoni natun mese, atoni bo'nim ma atoni bo'mese.

²⁶Sin nanaoba sin mepu anfani alef lasi neu to Israel. Ale lasi mafena sin neki neu Nai Musa, mes lasi-lasi a'baut sin anmes naleko nani.

²⁷Nalali te Nai Musa nafetin Nai Yitro anao ma anfani neu in pah.