Read Uab Meto KELUARAN 2 Bible Online

KELUARAN 2 - Uab Meto bible

KELUARAN 2

¹Anbi leku nane anmu'i atoni mese na'ko uf Lewi, in anmafe nok bife mese na'ko uf le nane amsa.

²Oke te bife nane nahonis li'anmone mese. Leka in ankiso nak li'ana nane namas kun, in natolo' in nan funan tenu.

³Mes li'ana nane ka nabe'i fa he natolo' in a'lon anteni. Es nane te in ainaf naiti ki'u mese le anmo'e na'ko ek fui ma anlape neki min afu in ka'in he nati' oe kais antam. Antao li'ana nane anbi ki'u nane in nanan, ma neki neu Noe Nil ma antao anbi ek fui atnanan anbi Noe Nil in ninen.

⁴Li'ana nane in tataf bife anhake na'ko lo ma ankiso sa' es of anbol neu in olif.

⁵Anbi tabu nane kesel in fetnai nem. In ansanu neu noe he naniu, mes in abha'et sin anao natuin noe ninen. Nok askeken kesel in fetnai nit ki'u nane anbi ek fui in atnanan, oke te in anlenu in ate bife mese he naiti in.

⁶Tabu kesel in fetnai anfai ki'u nane, in nit li'ana mese anbi in nanan, ma li'ana nane in fe ankae. Kesel in fetnai nane nekan anmofu neu in ma in nak, “Le i li'ana atoni Ibrani.”

⁷Oke te li'ana nane in tataf natan neu kesel in fetnai nak, “Hom lomi ka Usif Fetnai he au ami bife Ibrani mese he nasusu li'ana nane?”

⁸“Leko” kesel in fetnai natae onane. Ma li'anfeto nane in nao ma anboin li'ana nane in ainaf kun.

⁹Kesel in fetnai nak neu bife nane nak, “Ho meki li'ana le i, ma mususu in neukau, ma of au baen ko.” In neki li'ana nane ma nasusu in.

¹⁰Tabu li'ana nane nanae kle'o, in ainaf anfe nafani in neu kesel in fetnai. Oke te kesel in fetnai naiti li'ana nane anfani in anah. “Au ukanab in Nai Musa, natuin au aiti in na'ko oe,” kesel in fetnai namolok onane.

¹¹Leka Nai Musa in nanae, in nao ma naeku nok atoni-atoni le in nok sin uf mese. In nit neu anhamu'i sin onme neki mepu mafena le sin nanaoba nani. Ma in nit amsa atoni Mesir mese namate atoni Ibrani mese.

¹²Nai Musa in ankiso anfun natef, ma leka in ankiso nak ka tit fa esle' nit in, in namate atoni Mesir nane oke te ansub in nitun anbi snaen in nanan.

¹³Anbi noka fa ma nok-noka Nai Musa in nao anteni, oke te in nit atoni Ibrani nua anmabanan. “Nansa' es hom biso ho biaf?” Nai Musa natoti atoni asanat nane.

¹⁴Atoni natae nak, “Sekau es naiti ko amfani nakaf ma alef lasi neu kai? Ai ho he mumate kau amsa, onle atoni Mesir le ho mumate nane?” Oke te Nai Musa in namtau ma natenab nak, “Amle'ut neu kau! Sin nahin nalali au mo'et nane.”

¹⁵Leka kesel in nen lasi nane, in nami lanan he namate Nai Musa. Mes Nai Musa in naen oke te in namaika anbi pah Midian. Ana' fuat knino na'ko Midian, le in kanan Nai Yitro, in anmu'i anfeto hitu. Anbi neno mese, leka Nai Musa antok anhaumak oe mata mese, Nai Yitro in anfeto hitu sin nem hen sote oe ma antao neu bale mninut bibi ma bibi kase sin amaf ini.

¹⁷Mes anmu'i atukus fauk-fauk sin anli'u li'feto-li'feto nane. Oke te Nai Musa in nen ma anbab sin ma na'inut sin mu'it sin.

¹⁸Leka sin nao anfani, sin amaf natan sin nak, “Nansa' es him fani aim laba anbi neno i?”

¹⁹Sin natae nak, “Anmu'i atoni Mesir mese le anbab kai na'ko atukus-atukus bian le sin noki kai. Nesi na'ko nane te in ansote oe neu kai, ma na'inut hit mu'it sin.”

²⁰“Tabu le i in es me ka?” Nai Yitro natan in anah sin onane. “Nansa' hi misaitan atoni nane? Amnao nai amhone in he in anbukae nok kit.”

²¹Nai Musa anlomi he nati' namaika anbi nane. Namuni te Nai Yitro anmamoneb in anah le in kanan bi Zipora nok Nai Musa.

²²Bi Zipora nahonis li'anmone mese. Nakanab li'ana nane Nai Gersom, natuin Nai Musa natenab nak, “Au atoni anao amnemat kau anbi bale i.”

²³Anbi ton-ton amunit Kesel Mesir anmate. Mes to Israel sin fe ansakoi natuin an aten sin, talante sin an anbai ma antoti babat ma tuntakus. Sin sakoit nane antia Uisneno.

²⁴Uisneno an nen sin, ma In namnau In Fef Bela nok Nai Abraham, Nai Ishak ma Nai Yakub.

²⁵In nit atoni-atoni Israel an aten sin, es nane te In nafek he nati' anbab ma antuntaku sin.