Read Uab Meto KELUARAN 22 Bible Online

KELUARAN 22 - Uab Meto bible

KELUARAN 22

¹“Sekau es nabak bijae mese ai bibi kase mese ma in anlolo ai nasosa nani, so in anseka bijae mese neki bijae nim ma bibi kase mese in anseka neki bibi kase ha.

²So in anseka blua le in nabak nani. Kalu in kan mu'i fa sa'-sa', in of masosa anfani on ate, anseka blua le in nabak nalali. Kalu le in nabak nane bijae, bikase luke mnanu, ai bibi kase, ma mapeni anbi atoni nane fe anmoni, so in anseka mu'it nane neki mu'it nua. Kalu anbi leku fai atoni abakat mese maheke anbi ume in nanan, oke te namate in, atoni le namate nane ka nasanab fa. Mes leka lasi nane anbol anbi manas, atoni le namate nane in nasanab.

⁵Sekau es nafetin in mu'it nah hun anbi in lene ai anbi in lene tua min kase, oke te mu'it naoinson ma nah atoni bian sin luet anbi sin lene, mu'it nane in tuaf of an op luet alekot na'ko in lene ai in lene tua min kase anmes.

⁶Sekau es nafu' ai anbi in lene kun, ma nafini ai nane neu atoni bian sin lene ma notu nani ane kase le anmoni, ai ane kase mafutu le fe anhetu nalali, atoni ahopi ai nane of an op.

⁷Taleta onle anmu'i atoni le anlomi he nabela in aon bian in amaus esle' noni ai blua maupa. Mes anbi amunit blua nane namneku na'ko in ume. Kalu atoni abakat mapeni, so in anbaen kuni nua.

⁸Mes leka abakat nane ka mapeni fa, so atoni abela nane neki neu ume onen totis, ma anbi nane so in ansup nak in ka nabak fa blua le nabela anbine.

⁹Ma anbi ale matoes neu maus, leko neu bijae, bikase luke mnanu, bibi kase, blua pake ai sa' le namneku mes nit nafani, atoni le nak in-ini kun, so mamneki neu ume onen totis. Atoni le Uisneno naton anfani atoni asanat so in anbaen kuni nua neu atoni amu'it amneot.

¹⁰Leta mese anteni nak atoni mese anpanat ma anpao in aon bian in bikase luke mnanu, bijae, bibi kase, ai mu'it bian. Namuni te mu'it nane anmate, napapa' ai musu nasiknan, mes kan mu'i fa es he nahin.

¹¹Anbi lasi onle nane so in anao neu ume onen totis ma in ansup natuin UISNENO kanan nak in ka nabak fa mu'it le nane, mu'i tuaf nane in mes ansutai, ma atoni apanat nane in of kan op fa.

¹²Leka atoni bian es nabak mu'it le nane, atoni apanat nane of an op neu mu'i tuaf.

¹³Leka mu'it nane mu'i fui es anheke, atoni apanat nane so nalila mu'it in nuif sin anfani taka' neu mu'i tuaf ma in of kan op fa natuin mu'it nane.

¹⁴Leka' atoni mese antoti lapat mu'it mese ma mu'it nane napapa' ma anmate anbi leku mu'i tuaf nane kan bi fa bale nane, atotis nane of an op.

¹⁵Mes leka lasi nane anbol anbi leku mu'i tuaf nane anbin, atoni atotis nane of kan opaf. Kalu mu'it nane maseba, opat nane anso'i natam nok sebat.”

¹⁶“Sekau le anmapaisa nok li'anfeto aoteme le fe kan mu'i fa naimone hen tup nabua nok in, atoni nane mes naiti anfani in fenai ma anfe nani puah manu mnasi.

¹⁷Mes leka in amaf kan fe fa sona neu atoni nane hen mafe nok in anah, atoni nane of an op neu amaf le nane noni in naen namnes nok pua mnasi manu mnasi neu li'anfeto tnana teme nane.

¹⁸Ale bife amnanet nane so namate sin.

¹⁹Atoni le antup nabua nok mu'it so namate in.

²⁰Sekau le natulu fuat neu uisneno teta mimate in, so kalu neu Kau, hi UISNENO.

²¹Kaisa misusu' ai amtamni' atoni anao amnemat; mimnau natuin afi nahun him fani atoni anao amnemat anbi pah Mesir.

²²Kais misusu' bife banu ma li'anmanat.

²³Leka him maufinun sin, Au, UISNENO, of Au nen sin, leka sin ansakoi ma antoti babat ma tuntakus neu Kau.

²⁴Of Au nek maputun ki ma of Au umate ki anbi makenat in nanan, talante hi fenai sin of anfani bife banu, ma ho anah sin of anfani li'anmanat.

²⁵Leka him fem lapat noni neu atoni amanukat na'ko Au to sin atnanan, kais hi moesom amfani atoni atoti tusa le antoti noni in sufan.

²⁶Kalu ho maiti atoni bian in sobalu betkone anfani on blua na'at neu in tusa, so hom fe mufani sobalu betkone le nane nahun na'ko manas antes,

²⁷natuin in a'mu'in ale pilu nane, le in anpake hen amu in aon. Leka ho kam fe mufani fa, of in anpake sa' ka, hen amu in aon leku in antup? Leka in ansakoi ma antoti Kau he Au tuntaku in, of Au nen in natuin Au nek amanekat Kau.

²⁸Kais amsupan Uisneno ma kais amsukat atopus anbi ho pah.

²⁹Anbi leku in maleka nalali mutulu neu Kau hi ane kase, tua min kase ma ho min fomeni. Mitulu hi anmone unu neu Kau,

³⁰ma bijae, ma bibi kase keso le nahonis nahunun. Mifetin mu'it nane nok in ainaf anbi neno hitu in nanan, nalali te mitulu neu Kau anbi neno fanu.

³¹Hi le nane Au to, esle' nane te mu'it sa' le mu'i fui anheke ma anpisu, ka nabe'i fa he hi miah in sisi; so amfe neu asu sin.”