Read Uab Meto KELUARAN 23 Bible Online

KELUARAN 23 - Uab Meto bible

KELUARAN 23

¹“Kais hi mitutab uab poi, ma kais amtuntaku atoni maufinu le anfani saksi neu lasi amle'ut.

²Kais hi mo'e mituin atoni amfaut leka sin anmo'e ansan ai an ele ma antanhai plenat ma le anfani saksi neu lasi amle'ut.

³Kais ambeti masaf ma humaf anbi lef lasi in nanan, maski nak atoni le him lefi in lasi nane atoni amamu'it.

⁴Leka hi mit hi musu sin bijae ai in bikase luke mnanu le ansek, so hi meki mifani neu tuaf na'ko mu'it nane.

⁵Leka hi musu sin bikase luke mnanu natsel natuin in baut mafena, amtuntaku in he mifena bikase luke mnanu nane, ma kais mifetin in.

⁶Miton amneot neu atoni amamu'it, leka in nem neki in lasi neu alef lasi sin matan.

⁷Mu'lon ho monim na'ko poi, ma kais mumofu atoni asanat he namate in, natuin Au ka umneob fa atoni le anmo'e maufinu onane.

⁸Kais amsimo baen, natuin baen nane of nafolob atoni neu amneot, ma namofu atoni-atoni le ka nasanab fa.

⁹Kais amtamni' ma misusu' atoni anao amnemat; hi mihin monit onme atfani atoni anao amnemat, natuin afi nahunut him fani atoni anao amnemat anbi pah Mesir.”

¹⁰“Anbi ton ne in nanan nabe'i him lue hi lene ma nabe'i him nibun in fuan.

¹¹Mes antam ton hitu so hi mifetin afu le nane. Anbi ton mese nane in nanan hi ka nabe'i fa hem nibun sa' le anmoni anmes anbi hi lene. Mifetin neu atoni amamu'it, ma in nesin maut he neu mu'i fui. Anmo'e onan amsa neu lene tua min kase ma neu hi bub fua mina.

¹²Neno ne anbi klei mese in nanan nabe'i hi mepu, mes anbi neno hitu so hi misnas, he nati' hi mu'it sin, hi ate-ate sin, ma atoni-atoni anao amnemat le' anmepu neu ki sin nabe'i nas-nas amsa.

¹³Ampanat ale sa' le Au uton ulali neu ki. Kais mibes neu uisneno teta, ma ka nabe'i fa hem tek in kanan amsa.”

¹⁴“Anbi ton-ton so hi minaeb neno naek tenu he nati' hi miliatas Kau.

¹⁵Anbi funan ahunut (Abib), anbi leku le maleka nalali, so hi minaeb tolas utunu' le ka malalu haef fa nok lanan le Au uplenat ulali neu ki, natuin anbi funan le nane him poi misaitan pah Mesir. Kais hi miah utunu' le anmo'e neki lalu haef anbi tolas neno hitu in nanan.

¹⁶Minaeb Tolas La' Hau No' anbi tabu him seki luet ahunut anbi hi lene. Minaeb Tolas La' Hau No' anbi ton in amsopun leka hi mibuab milali hi lene tua min kase in fuan ma lene hau fua.

¹⁷Anbi ton-ton leka hi minaeb neno naek tenu en nane, ale atoni-atoni so nem ma nabes neu Kau, hi UISNENO.

¹⁸Kais hi mitulu utunu' le amtao lalu haef leku hi mi'tulu' mu'it neu Kau. Mu'it in afan le hi mitulu neu Kau anbi neno-neno naek nane, ka nabe'i fa he hi mihena talante neno noka.

¹⁹Anbi ton mese-mese hi meki ane kase le hi monu anbi ahunut anbi hi UISNENO In ume. Sisi bibi ankase ai bibi ana' ka nabe'i fa he mihan meki in ainan in susu.”

²⁰“Of Au lenu ahake neno nahunun ki he nati' anpanat ki anbi lanan ma neki ki neu bale le au uloitan ulali.

²¹Ampanat nai ma mituin nai in. Kais amlaban in fun Au es a'lenu in, fun in of kan sako fa hi tanhais sin.

²²Leka hi mituin in, ma hi minaob ale Au plenat sin, of Au maken ma laban ale hi musu sin.

²³Au ahake nane of in nao nahunun ki ma neki ki amtam meu pah atoni Amori, Het, Feris, Kanaan, Hewi ma Yebus, ma of Au ule'un ani sin.

²⁴Kais mibes neu fatu le'u ma hau le'u le anpanat sin, ma kais him tao mituin sin luli besa. Miskuku sin fatu ma sin hau mamasa le anpanat sin nane, ma am ipu ni fatu-ni fatu le sin anpake neu luli besa.

²⁵Leka hi mibes neu kau, UISNENO, of Au fe ki tetus nok mnahat ma mninut, ma of Au u'lob ale menas na'ko ki.

²⁶Anbi hi pah of kan mu'i anteni fa le namofu li'ana ai bife le ankiu. Ma of Au fe ki ua mnanu.

²⁷Uf-uf le him tam ambine of namtausan ki; ma of Au usitab sin; ale ho musu sin of sin anfen ma sin naenan.

²⁸Of Au usitab hi musu sin, ma uf-uf Hewi, Kanaan ma Het of Au li'u sin na'ko hi matam he nati' him nao mat piut.

²⁹Au mes ka li'u fa sin oke anbi ton mese in nanan, he nati' afu nane kais mafetin ma kais mu'i fui anfoe nasek'on.

³⁰Of Au li'u sin kle'o-kle'o, talante hi atoni sin namfau hen toko natau pah nane.

³¹Of Au lek ani ekat neu pah le nane na'ko Tasi nonof Akaba ante Noe Efrat, ma na'ko Tasi Tnana ante mnela snaen. Au fe kuasat he hi miplenat atokos abit pah le nane, talante nabe'i him li'u sin, leka him tam anbi pah nane.

³²Kais hi mo'e Fef Bela mok atoni-atoni nane ai mok sin fatu le'u ma hau le'u.

³³Kais mifetin atoni-atoni nane he sin namaika anbi hi pah, he nati' kais hi mibes neu sin fatu le'u ma sin hau le'u ma hi misanab neu Kau. Leka hi mibes neu sin fatu le'u ma sin hau le'u, hi mofu ambi kle'o maten in nanan.”