Read Uab Meto KELUARAN 25 Bible Online

KELUARAN 25 - Uab Meto bible

KELUARAN 25

¹UISNENO nakua a'an neu Nai Musa nak,

²“Amlenu atoni Israel he neki tulu neu Kau. Sekau in nekan anbe', in mes neki tulu

³onle: mnatu, noni muti ma niti molo;

⁴pilu muti malula, pilu mate manafu, kanalu ma memtasa, pilu na'ko bibi in funun,

⁵bibi kase keso in pasu le anlep me amtasa, pasu malula, ankai kase,

⁶mina neu paku, fo bona neu mina le anpake anbi luli besa, ma neu atu fo meni,

⁷fatu alim mate molo human namtis he nati' antao neu sobalu efod ma an obe Ana' Fuat Knino Amnanut in a'basan.

⁸Amlenu to nane anmo'e um-ume mese neu Kau, he nati' Au umaika anbi sin atnanan.

⁹Um-ume ma ale in blua sin so hi mo'e natuin salit le of Au uton ani neu ki.”

¹⁰“Anmo'e peti mese na'ko ankai kase le in amnanun senti 110, in menuan ma in a'latan senti 66.

¹¹Am amu in nanan ma in kotin meki mnatu nesaf ma anmo'e in ninen amsa na'ko mnatu.

¹²Ma neu in hau lo'i, so anmo'e niti mnatu ha ma mi'kai sin neu in haen ha sin, niti nua anbi in haen bian am bian.

¹³Anmo'e in hau lo'i nane na'ko ankai kase ma am amu meki mnatu,

¹⁴ma mitam hau lo'i nane antam natuin in niti le anbi peti in kabenan nane.

¹⁵Hau lo'i nane so nabalah anbi niti-niti nane in nanan ma ka nabe'i fa he mipoitan.

¹⁶Ma anbi peti nane in nanan so hom tao fatu nua en nane le nok Au plenat-plenat sin le Au fe ulali neu ko.

¹⁷Anmo'e peti nane in toben na'ko mnatu nesaf, in amnanun senti 110 ma in menuan senti 66.

¹⁸Ma so ho mo'e na'ko mnatu matutu namasbon onle ahake neno sin nua,

¹⁹es-es anbi peti nane in toben aon bian am bian. Ahake neno le mamasa nane so anmo'e sin anfani nua nok peti in toben,

²⁰ma anmo'e sin anmabaina es nok es ma nauf sin ninen anbi peti in tunan.

²¹Amtao fatu nua en nane neu peti in nanan ma amtobe mani peti nane.

²²Anbi bale nane of Au ueku oke ko, ma anbi tobes le nane in tunan anbi ahake neno nua en nane sin atnanan, of Au fe ko Au plenat-plenat sin neu to Israel.”

²³“Anmo'e nai mei mese na'ko ankai kase le in amnanun senti 88, ma in menuan senti 44, ma in alatan senti 66.

²⁴Am amu meki mnatu nesaf ma amtao mnatu neu in ninen anfun natef.

²⁵Anmo'e mei nane in ninen menuan senti 7,5 ma am eka meki mnatu anfun natef mei nane in ninen.

²⁶Anmo'e niti ha na'ko mnatu ma amtao sin anbi in haenen ha sin ninen.

²⁷Niti nane he nati' amtao hau lo'i ma maiti mei nane.

²⁸Hau lo'i nane so anmo'e na'ko ankai kase ma am amu meki mnatu.

²⁹So anmo'e pika sin, klas sin, in posi sin, in fane sin neu tulu tua min kase. Ale blua neu mei nane so anmo'e na'ko mnatu nesaf.

³⁰So amtao mei nane antom Peti Fef Bela nane in matan, ma anbi mei nane in tunan so miloitan utunu' piut.”

³¹“Anmo'e tet paku nane na'ko mnatu nesaf. In sukit ma in na'an nane so anmo'e na'ko mnatu le matutu; onle tuna-tuna amasat, in sufan ma in amun so anmatalu nok in sukin ma in na'an.

³²Anbi in na'an nane so anmo'e tlaef ne, tlaef tenu aon bian am bian.

³³Anbi in atlaen tenu sin so anmo'e onle tuna naek tenu nok in sufan ma in amun.

³⁴Anbi in na'an so anmo'e lunat onle tuna naek ha nok in sufan ma in amun.

³⁵Anbi tlaef mese-mese in a'pinan nane so anmo'e tuna mese in sufan.

³⁶Paku nane in haenen nok tuna-tuna in sufan ma in atlef sin so anmo'e na'ko mnatu nesaf le matutu tuka mese.

³⁷Anmo'e paku hitu anbi tet paku le nane ma anmo'e onle nane he nati' in pinan antom mat.

³⁸So anmo'e blua mese na'ko mnatu nesaf he nati' amnose abas na'ko paku in toben.

³⁹Ampake mnatu nesaf kilo bo'tenu am nim he nati' amepu tet paku nane nok in blua sin.

⁴⁰Ampanat he nati' tet paku le nane anmo'e natuin leta le Au uton ulali neu ko anbi tubu le i in tunan.”