Read Uab Meto KELUARAN 28 Bible Online

KELUARAN 28 - Uab Meto bible

KELUARAN 28

¹“Mo'en ho tata Nai Harun ma in anah sin Nai Nadab, Nai Abihu, Nai Eleazar ma Nai Itamar, ma ampaisan sin he nati' sin antuthae Kau anfani Ana' fuat knino.

²Anmo'e blua pake Ana' fuat knino anfani pake amasat alimat.

³Mo'en ale atoni-atoni asot le Au fe ulali hinet neu sin. Amlenu sin hen so blua pake neu Nai Harun ma ampaisan in he nati' in antuthae Kau anfani Ana' fuat knino.

⁴Amlenu sin amsa hen mo'e pilu ansaof, efod, sobalu bet kone, sobalu mabuna, pilu nakaf ma futu tnanaf. Blua pake Ana' fuat knino nane so sin anmo'e neu ho tata Nai Harun ma in anah sin he nati' sin antuthae Kau anfani Ana' fuat knino.

⁵Blua pake nane so sin anmo'e na'ko pilu manafu mas mate, kanalu ma me amtasa, abas amnatu ma muti malula. Naik na'ko nane efod amsa so ambuna.

⁷Efod in tani benaf nua sin so amso anbi in ninen.

⁸Futu tnanaf mese amtenu na'ko abas malula ma amso nok efod he nati' anfani mese.

⁹Ma maiti fatu klima mate molo' nua. Mami atoni ahine mnatu mese he nati' anlun Nai Yakub in anah sin kanan anmatom nok sin uan anbi fatu nane, kanaf ne anbi fatu mese-mese. Ma fatu klim mate molo' nane amtao sin ninen meki mnatu ma amtao sin anbi tani benaf na'ko efod anfani taka' neu uf Israel sin bo'es am nua. Nok lanan nane Nai Harun neki sin kanan anbi in benan, talante Au, UISNENO, of umnau sin piut.

¹³Naik na'ko ninef mnatu nua en nane

¹⁴so sin anmo'e amsa heke mnatu nua na'ko mnatu nesaf le an amu onle tani, ma antao anbi ninef amnanu le nane.”

¹⁵“Anmo'e neu Ana' Fuat Knino Amnanut naek pilu basaf mese le in anpake anbi leku in anlomi he nahin Uisneno In salit ma In lomin. Pilu basaf nane ini buna ma in abas so namnes nok abas ma buna anbi efod.

¹⁶In susuf ha ma amli' no nua in amnanun ma in menuan es-es senti 22.

¹⁷Amtao fatu klima amasat klalo ha anbi pilu basaf nane. Anbi klalo ahunut fatu mate amtasa, fatu klima mnatu, ma fatu klim molo.

¹⁸Anbi klalo no nua, fatu klim mate leko, fatu klim tui' on niti me amtasa, ma fatu klima mate.

¹⁹Anbi klalo no tenu, fatu klima me nus, fatu klima tui' on nit me', ma fatu klima on putun.

²⁰Anbi klalo ha, fatu klima nus on neno, fatu klima mate molo, fatu klima molo amtasa. Fatu klima amsat bo'es am nua nane so ampun meki mnatu.

²¹Anbi fatu klima mese-mese so amlun kanaf mese na'ko Nai Yakub in anah sin bo'es am nua nane hen fani mnaut neu uf-uf Israel.

²²Anmo'e neu pilu basaf nane heke nua na'ko mnatu nesaf le maane on tani.

²³Anmo'e niti mnatu nua amsa ma amtao sin anbi pilu nakaf nane in si'uf abit fafon.

²⁴Ma mutam heke mnatu nua en nane natuin niti-niti le nane sin nanan.

²⁵Heka mnatu nua en nane sin panan bian so amfutun anbi ninef nane nua sin, he nati' pilu basaf nane nabe'i amalutab nok tani benaf efod abit matan.

²⁶Anmo'e niti mnatu nua anteni, ma amtao sin anbi pilu basaf in apinan abit nanan anhaumak nok efod nane.

²⁷Nalali te, anmo'e niti mnatu nua anteni ma amtao sin anbi mat na'ko efod in tani benaf anhaumak nok sot lutas in pinan, anbi futu tnanaf le antenu na'ko ab malula in fafon.

²⁸So amalutab niti pilu nakaf nok tani mate anbi niti anbi efod he nati' pilu basaf nane nabala anbi futu tnanaf in fafon ma ka natsefi fa.

²⁹Anbi leku Nai Harun antam neu bale knino, so in neki uf-uf Israel sin kanan le mahuma anbi pilu basaf, he nati' Au, UISNENO, umnau Au to piut.

³⁰So amtao Urim ma Tumim anbi pilu basaf in nanan he nati' Nai Harun anpake leka in nem ma anhake anbi Au matak. Anbi leku-leku onle nane, so in anpake pilu basaf nane piut, he nati' in nahin Au salit neu to Israel.”

³¹“Sobalu bet kone le in anpake anbi efod in fafon mo'e na'ko pilu manafu mas mate.

³²In to'an so mamepu meki pilu tenu he nati' kais in natpisu laba.

³³Ma in abetan funam natef mabuna lilkase na'ko pilu manafu mas mate, kanalu ma amtasa ma am ek meki bano molo mnatu.

³⁵Nai Harun so anpake nani sobalu bet kone nane leka in nanaoba mepu anfani Ana' fuat knino. Anbi leku in nem anhake anbi Au matak anbi ke'an knino ai nasaitan bale nane of Au nen bano nane in hanan ma in of kan mate fa.

³⁶Anmo'e lunat mese na'ko mnatu nesaf le in hanan nak ‘In mabeti neu UISNENO’.

³⁷Ma amson anbi pilu meki tani mas mate.

³⁸Lunat mnatu nane so Nai Harun anfutun anbi in ilan he nati' Au, UISNENO, lomi he simo ale tulu, le atoni Israel neki nem neu Kau, maski nak anbi tulu le nane sin nasanab nalali neu Kau.

³⁹Nai Harun in sobalu bet kone so matenu na'ko ab muti malula. Anmo'e pilu mese amsa na'ko ab muti malula ma futu tnanaf le mabuna.

⁴⁰Amso sobalu, futu tnanaf ma pilu neu Nai Harun in anah-anah sin he nati' Au u'upab sin.

⁴¹Mupakeb blua en nane neu ho tata Nai Harun nok in anah-anah sin. Mu'pehe sin meki mina bub fua mina; nok nane anfani mepan ma mabeti hen tuthae Kau anfani Ana' fuat knino.

⁴²Ma anmo'e neu sin noso tuka na'ko muti malula, in amnanun na'ko atnanan ante in pusun he nati' an amu nan in aon le ka nabe'i fa he mamnita.

⁴³Noso nane so sin anpake piut anbi leku sin antam anbi Au Um-ume in nanan ai anhaumak baki tulu he naluli ma nabes anfani Ana' fuat knino anbi ke'an knino, he nati' kais sin anmate natuin sin aon le ka nabe'i fa he makiso ma natonon. Lekat lulut le i so Nai Harun ma in sufan nanaoba nani.”