Read Uab Meto KELUARAN 29 Bible Online

KELUARAN 29 - Uab Meto bible

KELUARAN 29

¹“Le i lanan he hi mimepan Nai Harun ma in anah sin he nati' sin nabe'i antuthae Kau anfani Ana' fuat knino. Maiti bijae keso tipu mese ma bibi kase keso nua le kan mu'i fa in amle'un.

²Amkabu ut kais nok lalu haef, na'ko ut alekot. Utunu' nane in bian so anmo'e utunu' nok fomeni, ma in bian kais nok mina, ma in nesin anmo'e kokis, ma amnose mina neune.

³Amtao sin neu poni in nanan ma mitulu le nane neu Kau minaoba nok tulu bijae keso tipu ma bibi kase nua en nane.

⁴Amlenu Nai Harun ma in anah-anah sin he nem anbi Au Um-ume in eno nok naknino sin aon.

⁵Mipakeb blua pake Ana' fuat knino neu Nai Harun: sobalu, efod, sobalu bet kone le an aum nan efod, pilu basaf ma futu tnanaf.

⁶Amtaone pilu neu in nakan, ma mikiab neu in pilu nane meki mnatu nok lunat ‘Mabeti neu UISNENO’.

⁷Oke te maiti mina tolas, am op neu in nakan ma mu'pehe in.

⁸Nalali onane te, amboin in anah-anah sin ma amtao neu

⁹sin sobalu ma futu tnanaf neu sin, oke te amtao pilu neu sin nakan. So hi mimepan Nai Harun nok in anah sin onle nane. Sin ma sin sufan so' anfani atuthaes neu Kau anfani Ana' fuat knino tal nabal-bal.

¹⁰Namuni onane so hi meki bijae keso nane anbi Au matak, anbi Au Um-ume in enon. So Nai Harun nok in anah sin antao sin niman neu mu'it nane in anakan.

¹¹Amlolo bijae keso nane anbi Au matak, anbi Au Um-ume in enon.

¹²Maiti bijae nane in na', ma amnose meki ho klulum neu sunaf-sunaf anbi baki tulu le nane, Na' le nane in nesin so hom opan anbi baki tulu nane in nupun.

¹³Nalali onane te maiti afa' le an amu in taifen, ma nesan alekot na'ko in aten ma in akin sin ma in afan ma amtao sin oke anbi baki tulu in tunan ma motu mani he nati' anfani tulu neu Kau.

¹⁴Bijae nane in nesan, in pasun ma in taifen so motu mani sin anbi Um-ume in kotin. Nane tulu sako sanat neu ale Ana' fuat knino sin.

¹⁵Namuni onane te maiti mese na'ko bijae keso le nane. Nai Harun nok in anah sin so antao sin niman anbi mu'it nane in anakan.

¹⁶Amlolo mu'it le nane, maiti in na' ma amponin neu baki fuat nane in kabenan ha sin.

¹⁷Bibi kase nane so amketu tuka-tuka. So amboe in taifen ma in pusun ma amtao sin antom fafon na'ko in anakan ma tukan bian sin.

¹⁸Mitulu bibi kase keso nane oke anbi bale fuat in tunan he nati' anfani fua mnotu. Fua tulu nane in fon anhalin Au nekak.

¹⁹Maiti amteni bibi kase keso nane, esle' bibi kase keso neu tolas mepan. Amlenu Nai Harun ma in anah sin antao sin niman neu mu'it nane in anakan.

²⁰Oke te amlolo bibi kase nane, maiti in na' akle'o ma amnose neu Nai Harun ma in anah sin luken ne'u in un ma neu in klulu naet na'ko haen ma niman ne'u. Na' le nane in nesin amponin neu baki fuat un kabenan ha sin.

²¹Maiti na' akle'o le anbi baki fuat in tunan ma min tolas, ma amlisin neu Nai Harun nok in anah sin ma neu sin blua pake. Nok lanan nane Nai Harun ma in anah sin ma sin blua pake nane naknino'ok neu Kau.

²²Maiti bibi kase keso nane in afan, ma in ikon le maafa, ma afa le an amu in taifen, ma in aten alekot, ma in akin nok in afan, ma in pusun ne'u.

²³Na'ko ki'u utunu' le ho mutulu mulali neu Kau, maiti utunu' nane na'ko masaf mese: mese le maselo nok min fomeni, mese le ka maselo fa neki mina, ma kokis mese.

²⁴Ma amtao ale bukae nane anbi Nai Harun ma in anah sin niman ma amlenu sin he na'aiti neu Kau anfani tulu loitan balab.

²⁵Ma amsimo utunu' le nane na'ko sin ma motu anbi baki fuat in tunan anbi fua mnotu nane in tunan. Tulu le nane in fon anhalin Au nekak.

²⁶Maiti bibi kase keso nane in a'basan ma mitulu anfani tulu loitan balab neu Kau. Ma nane anfani ho ini.

²⁷Anbi tolas mepan Ana' fuat knino in nanan, bibi kase keso in basan, in pusun le anpake anbi tolas le nane so mitulu mani neu Kau anfani tulu loitan balab ma ampaisan neu ale Ana' fuat knino sin.

²⁸Le i Au fekat le ka nabe'i fa he him seka: Anbi leku Au to sin nem ma natulu fuat halan nekaf, mu'it nane in basan, in pusun nane anfani Ana' fuat knino sin ini.

²⁹Nai Harun in blua pake luli besa so hi misanut neu in anah sin, he nati' sin anpake anbi leku namepan sin.

³⁰Nai Harun in anah le anfani Ana' fuat knino anseka in amaf le antam neu Au Um-ume he nati' nanaoba luli besa anbi ke'an knino, so in anpake blua le nane anbi neno hitu in nanan.

³¹Maiti bibi kase keso nane in nesan le ampake anbi tolas namepan Nai Harun ma in anah sin ma mihan sisi le nane anbi bale mese le naknin'on.

³²Sisi nane so sin anbukae nani nok utunu' in nesin anbi Au Um-ume in enon.

³³So sin anbukae mnahat le natulu tolas sako sanat in nanan anbi leku namepan nani. Alkun Ana' fuat knino es nabe'i anbukae mnahat le mabeti neu Kau.

³⁴Leka anbi noka fa am nok-noka sisi ai utunu' nane fe anesi, in nesin nane so sin notu nani, ma ka nabe'i fa he hi miahan natuin anbati nalali neu Kau.

³⁵Tolas mepan neu Nai Harun ma in anah sin so hi mo'e mani anbi neno hitu in nanan, onle Au uplenat ulali neu ko.

³⁶So hi mitulu bijae keso mese anbi neno mese anfani tulu sako sanat. Amo'e lasi halan ma miknino mani baki fuat nane.

³⁷Anmo'e lasi nane neno-neno anbi neno hitu in nanan. Nok nane baki fuat naknino'on anfun ma natef; ale sa' le antoman baki fuat nane so mina'at neu UISNENO, ma sekau es anpoi of napeni amle'ut natuin in knino kun.”

³⁸“So ho mutulu bibi kase keso le in uan ton mese neno-neno anbi Au baki fuat le nane in tunan tal nabal-bal.

³⁹Ana mese neu tulu anbi nok-noka ma le ana mese anten neu tulu anbi neno an mabe.

⁴⁰So mutulu bibi kase keso anbi nok-noka nok ut alekot kilo mese amselo nok min fomeni nesaf botil mese ma batis. Naik na'ko le nane tua min kase botil mese ma batis amsa.

⁴¹Bibi kase neu he matulu anbi neno mabe so anmo'e namnes onane amsa, esle' nok ut, min fomeni ma tua min kase. Fua mnotu nane info bonan anhalin Au nekak.

⁴²Ma neu ale batan, so hi mitulu fua mnotu anbi Au matak anbi Au Um-ume in enon. Anbi nane of Au u eku oke Au to ma umol-molok neu ko.

⁴³Anbi nane of Au u eku oke to Israel, ma Au apinat of naknino bale le nane.

⁴⁴Of Au uknino ani Um-ume ma baki fuat le nane. Nai Harun ma in anah sin Au beti sin na'ko le bian he nati' sin antuthae Kau anfani Ana' fuat knino.

⁴⁵Of Au umaika anbi to Israel sin atnanan, ma Au fani on sin Uisneno.

⁴⁶Sin of nahin nak Au le i sin UISNENO le upoitan ulali sin na'ko pah Mesir, he nati' Au umaika anbi sin atnanan. Au le i sin UISNENO.”