Read Uab Meto KELUARAN 33 Bible Online

KELUARAN 33 - Uab Meto bible

KELUARAN 33

¹Oke te UISNENO nakua a'an neu Nai Musa nak, “Misaitan bale le i ma amnao nai mok to le ho mupoitan sin na'ko pah Mesir nane meki sin nao neu pah le Au ta'en ulali neu Nai Abraham, Nai Ishak ma Nai Yakub ma neu sin sufan amsa.

²Of Au sonu ahake neno mese he nati' antopu ki. Of Au li'u uf Kanaan, Amori, Het, Feris, Hewi ma Yebus.

³Hi mes amnao neu pah le nahenu nok athoes ma maafa. Mes of Au ka nao oke ki fa, he nati' kais Au umate ki anbi lanan in atnanan natuin hi le i uf le nek manu.”

⁴Namuni onane te UISNENO anlenu Nai Musa he natonan to Israel nak, “Hi le i uf le nek manu ki. Oni bati Au he nao ubua oke ki maski nak kle'o amsa, namneo of hi mate. Amkasu hi blua mnatu sin, ma of Au lek ani neu ki.” Leka sin nen nalali UISNENO In hanan nanen, sin ankul onle atoni le ankae ma ankul. Oke te sin ankasu nani sin blua mnatu sin. Es nane te leka sin nao nasaitan Tubu Sinai, to Israel sin kan pake fa blua mnatu.

⁷Anbi ale leku, leka atoni Israel sin nahakeb Um-ume, Nai Musa in nahakeb Um-ume na'lo na'ko sin um-ume. Sin nahakeb um-ume ma Um-ume le antek nak Um-ume UISNENO, ma sekau le anlomi he naheni UISNENO In salit in nao neu bale nane.

⁸Leka Nai Musa in nao neu Um-ume nane, atoni-atoni Israel sin anhake anbi sin um-ume in ninen ma ankiso natuin Nai Musa talante in antam.

⁹Leka Nai Musa antam nalali, ni nope nane ansanu ma anhake anbi Um-ume in enon. Es nane te UISNENO namolok nok Nai Musa anbi nope le nane in nanan.

¹⁰Leku atoni Israel sin nit ni nope nane anbi Um-ume UISNENO in enon, sin al-al sin anfen ma anlitu anbi es-es in ume in enon.

¹¹UISNENO namolok nok Nai Musa humaf nok humaf, onle atoni mese' namolok nok in benuf. Nalali onane te Nai Musa in nao anfani neu in um-ume. Mes Nai Yosua Nai Nun in anah, li'anmunif mese le antuntaku Nai Musa in namaika nabala anbi Um-ume nane in nanan.

¹²Anbi neno mese Nai Musa nak neu UISNENO nak, “Koi UISNENO, Ho muplenat mulali kau he nati' au topu to le i neu pah le Hom ta'en mulali. Mes Ho ka muton fa neu sekau es Hom beti mulali he nati' antuntaku kau. UISNENO, Ho mumolok mak Ho muhin mulali kau, ma Hom lomi kau.

¹³Kalu onane, so Ho muton kau sa' le Hom sali, koi UISNENO, he nati' nabe'i au tuthae Ko ma au halin Ho nekam piut. Mumnau amsa nak to le i Hom beti mulali anfani Ho ini.”

¹⁴UISNENO nak, “Of Au uneo ma uhafo ki he nati' pah le Au ta'en ulali neu ki anfnai hi ini.”

¹⁵Nai Musa natae nak, “Leka UISNENO Ho kam nao mok kai fa, kais amlenu kai he hai misaitan bale le i.

¹⁶Anmo'e onme ka he nati' atoni nahin nak Hom nek kau ma neu to le i leka Ho kam tuntaku kai fa? UISNENO Hom haek mok kai anbi hai tnanam of anbanaika kai na'ko uf bian anbi pah pinan.”

¹⁷UISNENO nak neu Nai Musa nak, “Of Au utis ho totis natuin Au uhin ko ma Au nek ko.”

¹⁸Oke te Nai Musa antoti nak, “Koi UISNENO, muton neu kau Ho apinat ma Ho matakum.”

¹⁹UISNENO natae nak, “Of Au hake anbi ho matam eki Au apinat ma Au anaet, ma Au uton ani Au kanak le aknino. Au le i UISNENO kau, ma Au uton ulali Au nek mamun ma Au athoes neu atoni-atoni le Au beti.

²⁰Of Au ka uton fa Au humak neu ko, natuin kan mu'i fa atoni le nabe'i he na'aiti matan ma ankiso Kau, ma in hen moni nabala.

²¹Anbi Au aok bian nane anmu'i tubu fatu; ho nabe'i amhake ambi nane.

²²Leka Au fin nok Au apinat, of Au utam ko anbi tubu fatu nane in kan ma Au tobe ani ko eki Au nimak talante Au nao fini.

²³Oke te of Au aiti ufani Au nimak he nati' hom kiso koti Kau, mes ho ka mit fa Au humak.”