Read Uab Meto KELUARAN 35 Bible Online

KELUARAN 35 - Uab Meto bible

KELUARAN 35

¹Nai Musa an nibun to Israel ma in nak neu sin nak, “Le i plenat UISNENO neu ki:

²Anmu'i neno ne he nati' hi mepu, mes anbi neno hitu le nane Neno Snasat, neno naek le mabeti neu UISNENO. Sekau le anmepu anbi Nneno Snasat so ankas in talante anmate.

³Anbi neno nane kais hi mipina ai anbi hi ume nanan.”

⁴Nai Musa namolok neu ale to Israel nak, “UISNENO In plenat onle i:

⁵Meki fua tulu neu Uisneno. Sekau le in nekan anbe', so in natulu mnatu, noni muti ma niti molo;

⁶pilu muti malula, pilu mate manafu, kanalu ma me'; pilu na'ko bibi in funun;

⁷bibi kase keso in pasu le malepa neu me'; pasu manula, hau ankai,

⁸mina neu paku; fomeni neu min buat ma neu klali le fomeni;

⁹fatu klima, ma fatu klima bian le anmo'e neu sobalu efod ma pilu ansaof neu Ana' Fuat Knino Amnanut.”

¹⁰“Ale atoni apakaet ahinet le anbi hi tnanam so sin nem he nati' anmo'e ale sa' le UISNENO naplenat nani esle':

¹¹Um-ume, in suaf ma in toben, in akain ma in haunu, in hau kbat sin, ni eno ma in sukit;

¹²Peti Fef Bela nok in hau lo'i sin, in toben ma in pilu obet;

¹³mei nok in hau lo'i sin, ale in blua sin ma utunu'

¹⁴tet paku hen tana nok in blua sin, paku nok in mina;

¹⁵baki tulu mnotu klali nok in hau lo'i sin, mina neu luli besa, klali fomeni; pilu ekat neu Um-ume,

¹⁶baki tulu neu fua tulu mnotu ma kaba' makano na'ko niti molo, hau lo'i nok blua sin; tasu neu he nafanu ma in sukin sin,

¹⁷pilu-pilu neu po'an, ni-ni nok in sukit, pilu eka neu eno naek abit po'an,

¹⁸suan-suan ma tani-tani neu Um-ume ma neu in po'an;

¹⁹blua pake luli besa neu Ana' fuat knino sin anbi leku sin nanaoba mepu anbi Ke'an Knino ma blua pake neu Ana' fuat knino Nai Harun ma in anah sin.”

²⁰Nalali te ale to Israel le nabua nane nasitbok,

²¹ma neu sekau le in nekan anbe', in neki fua tulu neu UISNENO he nablua Um-ume UISNENO. Sin amsa sin neki sa' le anlomi neu luli besa ma blua neu bale pake Ana' fuat knino.

²²Sekau am sekau le anlomi, leko atoni ma bife, nem ma neki fneti amasat, falo, kaleli, heke, ma ale blua mnatu sin he natulu neu UISNENO.

²³Atoni mese-mese le anmu'i pilu muti malula, pilu mate manafu kanalu ma me', ai pilu na'ko bibi in funun, bibi kase in pasun le anlep neu me', ai pasu malula, so natulu blua le nane.

²⁴Atoni mese-mese le anfe in noni muti ai niti molo, neki sin nem neu UISNENO. Onane amsa neu atoni-atoni le anmu'i hau ankai kase sin neki nem neu mepu nane.

²⁵Bife asun ahinet sin neki ab mate malula ma ab mate manafu, kanalu ma me' le sin anmepu nalali.

²⁶Sin amsa nasun abas le anmo'e neki bibi in funun.

²⁷Ale atopus sin neki fatu klima mate molo ma fatu klima bian le anmo'e neu efod ma pilu basaf.

²⁸Sin amsa neki fomeni ma mina neu paku, mina neu buat ma klali fomeni.

²⁹Ale atoni Israel nok malinat neki sin fua tulu neu UISNENO neu mepu le UISNENO naplenat nalali neu Nai Musa.

³⁰Nalali te Nai Musa nak neu atoni Israel sin nak, “UISNENO anbeti nalali Nai Bezaleel Nai Uri anah, Nai Hur in upuf, na'ko uf Yehuda

³¹ma nahenu in neki kuasat. Uisneno anfe neu in tenab alekot, hinet ma be'it matani anbi ale mepu amasat,

³²he nati' natenab mepu le ansato neki hinet, ma anmepu na'ko mnatu, noni muti ma niti molo;

³³ma anfon fatu klima le he naketib; he nati' anlun hau ma mepu amasat bian anteni.

³⁴Ma neu Nai Bezaleel ma Nai Aholiab, Nai Ahisamakh in anah na'ko uf Dan, UISNENO anfe neu sin hine he nati' nanoina hine nane neu atoni bian.

³⁵Anfe neu sin hine anbi ale mepu anpake ma anlun hau ahinet, atenab ma atenu muti malula, ab mate manafu, kanalu ma me' ma pilu bian anteni. Sin le nane atenab ahinet ma nabe'i anmo'e ale mepu.