Read Uab Meto KELUARAN 36 Bible Online

KELUARAN 36 - Uab Meto bible

KELUARAN 36

¹Nai Bezaleel, Nai Aholiab, ma ale atoni apakaet sin le napeni tenab alekot ma hinet na'ko UISNENO, sin nahine ale lanan neu he nati' anmo'e ale sa' le anpake neu he nati' nafena Um-ume UISNENO. Sin of anmo'e ale sa' le UISNENO naplenat nalali.”

²Nai Musa anboin Nai Bezaleel, Nai Aholiab ma ale atoni-atoni le sin napeni hinet na'ko UISNENO ma le anlomi hen tuntaku, oke te anlenu sin he nafena mepu.

³Nai Musa anfe neu sin ale blua le atoni Israel sin nabuaba neu he nafena Um-ume UISNENO. Mes to Israel sin neki tulu piut neu Nai Musa anbi nok-noka.

⁴Oke te ale apakaet le nafena mepu nane sin nem ma natonan ma natonan Nai Musa nak,

⁵“Ale blua le atoni-atoni nabuaba nane nesi na'ko salit neu mepu le Uisneno anlenu nani.”

⁶Ma Nai Musa naton neu ale ale' um-ume oke nak ale blua le sin nabuaba neu Um-ume UISNENO nanokbon nalali, es nane te atoni-atoni kais neki sa'-sa' anteni.

⁷Ale sa'-sa' le sin nabuaba nane anesi na'ko salit neu he nasopu ale mepu nane.

⁸Namuni te ahinet-ahinet anbi ale apakaet sin anmepu Um-ume UISNENO. Um-ume nane sin anmo'e na'ko pilu muti manula tuka bo'mese le matenu na'ko ab mate manafu, kanalu ma me', ma nabuna ahake neno tunan in human anbin.

⁹Tuka mese in amnanun namnes nok es; in amnanun meter 12 ma in menuan meter 2.

¹⁰Pilu tuka sin antalu anfani pilu naek tuk es, ma tuka nim sin bian anmo'e onan amsa.

¹¹Anbi pilu naek nua en nane sin ninen antao in ninen na'ko pilu mate,

¹²anbi pilu naek mese antao aisat bo'nim, talante pilu nua en nane anfani pasan mese.

¹³Ma anmo'e kai mnatu bo'nim ma nameseb pilu naek nua en nane.

¹⁴Nalali te sin anmo'e Um-ume nane in toben neki pilu tuka bo'es am mese le antenu na'ko bibi in funun.

¹⁵Tuka mese in amnanun namnes nok es, in amnanun meter bo'es am tenu ma in menuan meter nua.

¹⁶Pilu tuka nim sin antalu anfani pilu naek mese, ma pilu tuka ne en nane sin anmo'e onan amsa.

¹⁷Anbi pilu ahunut ma amunit sin ninen antao es-es aisat bo'nim.

¹⁸Oke te anmo'e a'kaif bo'nim na'ko niti molo he nameseb pilu naeken nane anfani Um-ume in oben.

¹⁹Nalali te anmo'e eka nua neu Um-ume le nane, es na'ko bibi kase keso in pasun le anlep neu me', ma bian na'ko pasu malula.

²⁰Nalali te sin anmo'e Um-ume in hau mneo ma mnanu na'ko hau ankai kase.

²¹Hau mneo mese in amnanun meter ha ma in menuan senti bo'ne am ne.

²²Anbi bena mese antao suan nua le anpasan sin, talante bena-bena nane anmalutab sin es nok es.

²³Anbi Um-ume in bian a'ne'u sin antao bena bo'nua,

²⁴nok in sukit sin bo'ha le anmo'e na'ko noni muti, nua anbi bena mese neu in suan nua sin.

²⁵Neu Um-ume in bian a'li antao bena bo'nua,

²⁶nok in sukit sin bo'ha na'ko noni muti nua anbi bena mese.

²⁷Neu Um-ume in kotin antom neno tesan, antao bena ne

²⁸ma bena nua neu in si'un.

²⁹Bena-bena anbi in si'un anmalutab sin na'ko pinan antia in fafon. Bena nua sin le nasiubok nane anmo'e sin onane amsa.

³⁰Es nane te sin alsin bena fanu nok sukit na'ko noni muti bo'es am ne, nua anbi bena mese in un.

³¹Ma sin anmo'e hau kbat bo'es am nim na'ko ankai kase, bena nim neu Um-ume in kabenan mese,

³²ma nim anteni neu in kabenan bian, ma nim anteni neu Um-ume in kotin aon neno tesan.

³³Hau kbat abit atnanan, in amnanun astena na'ko bena mese ma antao na'ko Um-ume in panan bian antia in aon bian.

³⁴Um-ume in benan sin ma in kbaten le nane an amu sin neki mnatu, neu hen tuntaku hau-hau nane.

³⁵Sin an mo'e amsa pilu eno na'ko pilu muti manula le matenu na'ko ab mate manafu, kanalu ma me', nalali te nabuna ahake neno tunan in masan.

³⁶Neu he nati' naboni pilu le nane anmo'e nani ni ha na'ko ankai kase ma an amu neki mnatu nok in kai mnatu ma nahakeb sin anbi sukit ha le anmo'e na'ko noni muti.

³⁷Ma anmo'e pilu eka naek neu Um-ume in enon anmo'e na'ko pilu muti manula le antenu nok ab mate manafu, kanalu ma me' ma namasab neki buna.

³⁸Neu pilu eka naek nane sin anmo'e ni nim le anmatalub sin neki kaif. Ni nim panken ma sin mataluken nane an amu sin neki mnatu, ma in sukin nim sin anmo'e sin na'ko niti molo.