Read Uab Meto KELUARAN 37 Bible Online

KELUARAN 37 - Uab Meto bible

KELUARAN 37

¹Nai Bezaleel anmo'e Peti Fef Bela na'ko ankai kase, in amnanun senti 110, in menuan ma in alatan es-es senti 66.

²In nanan ma in kotin an amu neki mnatu nesaf, ma anmo'e in ninen neki mnatu anfun natef.

³Nalali te anmo'e niti mnatu ha he nati' antao in hau lo'i ma antao nani sin anbi in haenen ha sin, niti nua anbi in aon bian.

⁴Anmo'e nani in hau lo'i na'ko ankai kase, ma an amu nani neki mnatu,

⁵oke te hau lo'i nane natam natuin niti le anbi peti in haenen.

⁶Nalali te anmo'e in toben na'ko mnatu nesaf, in amnanun senti 110 ma in menuan senti 66.

⁷Ma in anmo'e amsa ahake neno tunan nua na'ko mnatu nesaf matosi,

⁸ahake neno tunan mese anbi peti in toben aon bian ma es anbi peti in panan tukan,

⁹ma anmo'e sin anmabaina neun es nok es, ma in ninen le naufon nane an amu nan peti in toben.

¹⁰Nai Bezaleel anmo'e mei na'ko ankai kase le in amnanun senti 88, in mnanun senti 44 ma in alatan senti 66.

¹¹An amu mei le nane neki mnatu nesaf ma nanineb in neki mnatu nesaf anfun natef.

¹²Ma in anmo'e mei in ninen senti 7,5. In ninen nane antao mnatu nesaf anfun natef.

¹³Anmo'e niti ha neu in hau lo'i ma antao sin anbi mei in haenen ha sin.

¹⁴Niti le he nati' antuntaku hau lo'i le nane antao sin anhaumak mei in ninen.

¹⁵Hau lo'i le nane anmo'e na'ko ankai kase ma an amu neki mnatu.

¹⁶In amsa anmo'e pika-pika, klas-klas, boti oe ma fane-fane neu ne natulu tua min kase. Mei blua en nane anmo'e sin na'ko mnatu nesaf.

¹⁷Ma Nai Bezaleel anmo'e tet paku na'ko mnatu nesaf. In sukit ma in na'an anmo'e na'ko mnatu tosi. In tuna-tuna, ma in sufa teme ma in sufan le anboe anmo'e mese nok in na'an.

¹⁸Anbi in na'an nane anmo'e tlaef ne, tlaef tenu anbi aon bian am bian.

¹⁹Anbi tlaef mese anmo'e onle tuna tenu nok in sufa teme ma in sufan le natbo.

²⁰Anbi in na'an anmo'e masaf onle tuna ha nok in sufan ma in sufa teme.

²¹Anbi pasan mese-mese in pinan nane anmo'e tuna sufa mese.

²²Paku nane in haen ok-oke nok in sufan sin ma in tlaef sin anmo'e na'ko mnatu tuka mese le matutu kun.

²³Anbi paku nane in haen anmo'e paku hitu nok blua he naknino paku nane in abas ma in toben nane na'ko mnatu nesaf.

²⁴Neu he nati' anmo'e tet paku nane ma in blua sin anmo'e na'ko mnatu nesaf kilo 35.

²⁵Nai Bezaleel anmo'e baki tulu bale mnotu atu fomeni na'ko ankai kase. Baki tulu nane in kabenan ha; in amnanun ma in menuan es-es senti 45 ma in alatan senti 90. Ma anbi in susuf ha sin fafon anmo'e sunaf le namasab nok baki tulu le nane.

²⁶Anbi kabenan ha sin ma sunaf sin fafon an amu neki mnatu nesaf ma in ninen anmo'e na'ko mnatu anfunam natef.

²⁷Anmo'e niti nua amsa anbi in kabenan he nati' antuntaku baki tulu nane in hau lo'i.

²⁸Hau lo'i le nane anmo'e na'ko ankai kase ma an amu neki mnatu.

²⁹Nai Bezaleel amsa anmo'e mina neu buat ma klali nesaf le anfomeni ma anselo onle min fobona.