Read Uab Meto KELUARAN 38 Bible Online

KELUARAN 38 - Uab Meto bible

KELUARAN 38

¹Nai Bezaleel naiti ankai kase, ma anmo'e baki tulu neu fua mnotu. Baki tulu nane kabenan ha, in amnanun ma in menuan es-es meter 2,2 ma in alatan meter 1,3.

²Anbi susuf mese-mese in fafon anmo'e sunaf le anmatalun mese nok baki tulu nane. An amu anfunam natef neki niti molo.

³Anmo'e tasu-tasu amsa, skop, fane-fane, kato ma ai in balan. Ale blua nane anmo'e sin na'ko niti molo.

⁴In nanono kaba na'ko niti molo ma nafunab neu baki tulu in pinan, le in amnanun astena na'ko baki tulu nane.

⁵Ma anmo'e niti ha neu in hau lo'i anbi susuf sin ha sin pinan.

⁶Hau lo'i le nane anmo'e na'ko ankai kase ma an amu neki niti molo.

⁷Oke te natam hau lo'i le nane natuin niti-niti sin nanan le anbi baki tulu in kabenan. Baki tulu nane anmo'e na'ko bena ma anmu'i bola' anbi in atnanan.

⁸Nai Bezaleel anmo'e tasu niti molo ma in sukit na'ko niti molo. Niti molo nane na'ko ale bife le antuthae Um-ume UISNENO anbi enon sin ninen.

⁹Nai Bezaleel anbaki nan po'an Um-ume UISNENO neki pilu na'ko pilu muti manula. Neu in kabenan ne'u in amnanun meter 44,

¹⁰ma antuntaku neki niti molo bo'nua, es-es nok in sukit na'ko niti molo, nok in kaif ma in aisan na'ko noni muti.

¹¹Anbi aon bian a'li anmo'e onane amsa.

¹²Anbi aon neno tesan antao pilu le in amnanun meter 22, nok in ni bo'mese ma in sukit bo'mese; in kai ma in lutan nane na'ko noni muti.

¹³Anbi aon neno saen, le in eno anbine in pilu amnanun meter 22 amsa.

¹⁴Anbi eno aon kabenan a'li ma a'ne'u nane antao pilu meter 6,6, nok ni tenu ma in sukit tenu.

¹⁶Ale pilu le anfun natef po'an nane anmo'e na'ko pilu muti manula.

¹⁷In ni nu sin sukit anmo'e na'ko niti molo, mes in kai, in lutan ma in ni sin panan nane na'ko noni muti. Ni-ni anbi po'an nane anmalutab sin es nok es neki lutan na'ko noni muti.

¹⁸Pilu eka naek na'ko po'an nane anmo'e na'ko pilu muti manula le antenu na'ko ab mate manafu, kanalu, ma me' ma namasab neki buna. In amnanun meter 9, ma in alatan meter 2 namnes nok pilu le anbi po'an.

¹⁹Antuntaku pilu eka nane neki ni ha nok in sukit ha sin na'ko niti molo. Ale kai ma tobes anbi ni panaf ma in kaif anmo'e na'ko noni muti,

²⁰mes suan-suan na'ko Um-ume ma neu in baki anmo'e na'ko niti molo.

²¹Le i sulat le antui neu tnopas anbi Um-ume UISNENO in nanan, bale le nabelak fatu nua en nok Uisneno In Plenat Bo'mese. Sulat le i matui natuin plenat Nai Musa ma Nai Itamar Ana' fuat knino Nai Harun in anah es antopu atoni-atoni Lewi ma antui nani.

²²Nai Bezaleel le Nai Uri in anah le Nai Hur in upuf na'ko uf Yehuda es anmo'e ale UISNENO In plenat sin.

²³Atuntakus es Nai Aholiab le Nai Ahisamakh in anah na'ko uf Dan, in anfani on apakaet, atenab ma atenu pilu muti manula, ab mate manafu, kanalu ma me'.

²⁴Mnatu le natulu neu UISNENO he nafena Um-ume knino in amfaun kilo 1.000, antai neki tai' le sin anpake anbi Um-ume UISNENO.

²⁵Noni muti le anpake na'ko aif atoni Israel in amfaun kilo 3.430 antai neki tai le sin anpake anbi Um-ume UISNENO.

²⁶Aif le nane namnes nok aif na'ko atoni le antui nalali sin amfaun he nati' anbaen. Atoni mese-mese anbaen namnes nok lekat lulut le anlek nalali, ma sin anpake. Anbi tuis nane atoni le in nan ton bo'nua nekin sae amfaun 603.550.

²⁷Na'ko noni muti le nane kilo 3.400 sin anpake ma anmo'e sukit natun mese neu Um-ume UISNENO in ni ma in pilu eka. Sukit mese in mafenan kilo 34.

²⁸Na'ko noni muti in nesin kilo 30 Nai Bezaleel anmo'e talus-talus ma kaif neu in ninen ma tobes neu ni le nane in tunan.

²⁹Niti molo le natulu nani neu UISNENO in amfaun ok-oke kilo 2.425.

³⁰Niti molo le nane anpake ma anmo'e sukit eno Um-ume UISNENO, baki tulu ma kaba le nakano na'ko niti molo ale blua neu baki tulu.

³¹Sukit neu pilu in anfunam natef po'an ma in eno naek, sin suan neu Um-ume ma neu in po'an funam natef.