Read Uab Meto KELUARAN 39 Bible Online

KELUARAN 39 - Uab Meto bible

KELUARAN 39

¹Nai Bezaleel ma Nai Aholiab anmo'e blua pake luli besa na'ko ab mate manafu, kanalu ma me' neu le Ana' fuat knino anbi leku sin antam ma nanaoba mepu anbi Ke'an Knino. Blua pake Ana' fuat knino neu Nai Harun sin anmo'e namnes nok UISNENO In plenat neu Nai Musa.

²Efod anmo'e na'ko pilu muti manula, ab mate manafu, kanalu ma me', ma aba mnatu.

³Sin nape' mnatu pisa-pisa nalali te anpini manihis anfani abas ma antenu nok pilu muti manula, ab mate manafu, kanalu ma me'.

⁴Nalali te anmo'e tani benaf nua hen fani efod in futun le anso nani in ninen.

⁵Futu tnanaf antenu nani le anmo'e na'ko abas le namnes ma anso neu efod nane talante anfani mese onle Uisneno naplenat nani neu Nai Musa.

⁶Sin anfon fatu klima mate molo ma nanineb neki mnatu. Nok hinet sin anlun Nai Yakub in anah sin bo'es am nua sin kankenu anbi fatu-fatu nane.

⁷Nalali te antao fatu-fatu nane anbi tani benaf na'ko Efod anfani lasi mnaut neu uf bo'es am nua na'ko to Israel, onle Uisneno naplenat nalali neu Nai Musa.

⁸Nai Bezaleel ma Nai Aholiab anmo'e pilu ansaof na'ko abas le namnes nok Efod ma nabuna amsa onan.

⁹In nasusufon ma anli' nono nua, in menuan ma in amnanun es-es senti 22.

¹⁰Anbi pilu basaf nane sin naketi fatu klima ketis ha. Ketis ahunut: Fatu klima mate molo, ma fatu klima molo.

¹¹Ketis no nua esle': Fatu klima mate leko, ma klima koto, fatu klima mate.

¹²Ketis no tenu esle': Fatu klima me', fatu klima muti me', ma fatu klima putun.

¹³Ketis no ha esle': Fatu klima, nus onle neno, fatu klima mate molo; fatu klima bo'es am nua en nane ma fatu neki mnatu.

¹⁴Anbi fatu klima mese anlun kanaf mese na'ko Nai Yakub in anah sin bo'es am nua hen fani mnaut neu uf-uf Israel.

¹⁵Ma anmo'e heke mnatu nua na'ko mnatu nesaf ma an ane onle tani.

¹⁶Anmo'e niti nua amsa na'ko mnatu ma antao sin anbi pilu basaf in panan sua sin.

¹⁷Ma heke mnatu nua en nane natam sin anao niti mnatu sin nanan,

¹⁸ma in panan nua en bian anfutu sin anbi nin fen nua sin, talante pilu basaf nane anmatalu nok tani basaf na'ko Efod in matan.

¹⁹Oke te anmo'e anteni niti mnatu nua ma antao sin anbi pilu basaf nane anbi in panan abit nanan ma antoman efod.

²⁰Nalali onane te anmo'e niti mnatu nua ma antao sin anbi tani benaf nua sin le antom nok efod in matan anhaumak nok in sot le antalu nek in sanu, anbi futu tnanaf le antenu na'ko ab manula in fafon.

²¹Namnes nok plenat Uisneno neu Nai Musa niti pilu basaf anmalutab neki tani mate nok niti efod, talante pilu basaf nane nabala anbi futu tnanaf in fafon ma ka natsefi fa.

²²Sobalu bet kone le anpake anbi efod in fafon anmo'e na'ko ab mate manafu.

²³Sobalu bet kone nane in to'an namepan anteni neki pilu matenu he kaisa natpisu laba.

²⁴Anbi in ninen abit nanan anfun natef antao lun lin kase fuan na'ko pilu muti manula, ma ab mate manafu, kanalu ma me', ma nakselo sin neki bano na'ko mnatu namnes nok UISNENO In plenat neu Nai Musa.

²⁷Sin anmo'e sobalu bet kone neu Nai Harun ma in anah sin,

²⁸ma pilu, ma nos tuka na'ko muti manula,

²⁹ma futu tnanaf na'ko muti manula, ab mate manafu, kanalu ma me' ma mabuna onle UISNENO naplenat nani neu Nai Musa.

³⁰Ma anmo'e amsa blua amasat na'ko mnatu nesaf, anfani taka' nak sin mabeti nalali neu UISNENO. Anbi blua amasat le nane sin antui a'at nak, “Anbeti nalali neu UISNENO.”

³¹Blua amasat nane sin antao antom pilu in, matan namnes nok UISNENO In plenat neu Nai Musa.

³²Ma sin nasopu nani ale mepu nafena Um-ume UISNENO. Atoni Israel sin nasopu nani ale sa' onle UISNENO naplenat nalali neu Nai Musa.

³³Sin neki neu Nai Musa Um-ume nane nok in blua sin, kaif sin, in hau kbaf sin, in ni ma in sukit sin,

³⁴in eka na'ko bibi keso in pasun le anlep neu me', eka na'ko pasu manula, ma pilu obet.

³⁵Peti Fef Bela le antao fatu nua en, hau lo'i ma in toben,

³⁶mei nok in blua sin ma bukae utunu',

³⁷tet paku na'ko mnatu nesaf, in paku sin nok in pake, mina neu paku,

³⁸baki tulu na'ko mnatu, mina neu buat, atu fomeni, pilu eno naek neu Um-ume,

³⁹baki tulu le anmo'e na'ko niti molo nok kaba' niti molo le' makano, in hau lo'i nok in pake, tasu bale he nafanu nok in sukit sin.

⁴⁰Pilu-pilu neu po'an ma ni-ni nok in sukit sin, pilu eno naek na'ko po'an ma in tani-tani sin, Um-ume in suan sin, ma ale blua le anpake nani anbi Um-ume in nanan.

⁴¹Ma blua pake luli besa neu Ana' fuat knino anbi leku sin nanaoba mepu anbi Ke'an Knino ma blua le mabeti neu Nai Harun ma in anah sin.

⁴²Atoni Israel sin nasopu nani ale mepu namnes nok UISNENO In plenat neu Nai Musa.

⁴³Nai Musa antae ale sa' ma in ankiso nak sin anmo'e anmatom onle UISNENO naplenat nalali. Oke te Nai Musa anfe tetus neu sin.