Read Uab Meto KELUARAN 40 Bible Online

KELUARAN 40 - Uab Meto bible

KELUARAN 40

¹UISNENO nakua a'an neu Nai Musa nak,

²“Muhakeb Au Um-ume anbi fun mese antam neno mese.

³Mutam Peti Fef Bela le matua nok Plenat Bo'mese neu in nanan ma amtao pilu kubat anbi in matan.

⁴Amtao mei nok in paken. Mutam tet paku amsa ma motu in paku sin.

⁵Amtao baki tulu mnatu bale mnotu atu fomeni anbi Peti Fef Bela matan ma muboni eka anbi Um-ume in enon.

⁶Amtao mani baki tulu fua mnotu anbi Um-ume in eno matan.

⁷Amtao tasu oe anbi Um-ume ma baki tulu le nane sin atnanan ma amtao oe neune.

⁸Nalali te amhel pilu anfun natef Um-ume in po'an ma muboni po'an in pilu eka naek.

⁹Nalali te Um-ume nok in blua en so ho mutulu mani neu Kau nok lanan amnose mina buat neune, nok lanan nane hom beti ale sa'-sa' neu Kau.

¹⁰Mutulu baki tulu nane nok in blua in neu Kau ma anmo'e onan amsa he nati' hi miknino sin neu Kau.

¹¹Anmo'e onan amsa neu tasu oe ma in sukit.

¹²Nalali te amlenu Nai Harun ma in anah sin nem neu Um-ume in enon ma anboe sin aon.

¹³Mipakeb Nai Harun pake Ana' fuat knino ma miknino in meki mina ma ambeti in he nati' antuthae Kau anfani Ana' fuat knino.

¹⁴Ma amlenu in anah sin anhaumakan ma antao sin sobalu.

¹⁵Ma amtao neu sin mina onle ho mo'e neu sin amaf he nati' sin amsa antuthae Kau on Ana' fuat knino. Nok buat le nane sin uf na'ko batan nao neu batan of anfani Ana' fuat knino.”

¹⁶Nai Musa anmo'e nani ale lasi nane onle UISNENO naplenat nani neune.

¹⁷Es nane te anbi fun mese antam neno mese anbi ton nua in nanan leka atoni Israel nasaitan nalali Mesir. Sin nahakeb Um-ume UISNENO nane.

¹⁸Nai Musa antao in sukit sin, nahakeb in haunu, antao in kbat sin ma namepan in ni sin.

¹⁹Oke te sin anhel Um-ume in oben ma sin antao obet aon bian kotin in fafon onle UISNENO naplenat nani.

²⁰Nalali te sin natam fatu nua en nane neu Peti Fef Bela in nanan nalali te Nai Musa antao Peti nane, ma natam hau lo'i sin neu niti sin nanan.

²¹Ma in natam Peti nane neu Um-ume nane ma naboni pilu kubat anbi in matan onle UISNENO naplenat nalali neune.

²²Nalali te Nai Musa antao mei anbi Um-ume in nanan anbi kabenan ne'u le pilu in kotin,

²³oke te in antao nani bukae utunu' onle UISNENO naplenat nani neu Nai Musa anbi mei in tunan.

²⁴In antao tet paku anbi Um-ume in nanan, anbi in kabenan li ma anbaina nok mei nane,

²⁵oke te napina paku-paku nane anbi UISNENO in matan.

²⁶Baki tulu mnotu nane antao anbi Um-ume in nanan anbi pilu in matan,

²⁷ma notu atu fomeni onle UISNENO naplenat nalali neu Nai Musa.

²⁸Nai Musa naboni Um-ume in pilu eka naek,

²⁹ma anbi eno in matan nane in antao baki tulu fua mnotu. Anbi baki tulu nane in tunan in natulu fua mnotu ma fua bukae.

³⁰Tasu nit molo nane in antao anbi Um-ume ma baki tulu atnanan, oke te antao oe neune.

³¹Nai Musa, Nai Harun ma in anah sin nafanu sin niman ma anboe sin haen anbi nane,

³²leka sin hen tam neu Um-ume UISNENO in nanan ai anhaumak baki tulu.

³³Nai Musa anhel pilu anfun natef Um-ume ma baki tulu ma naboni pilu eka neu po'an in eno naek. Nok nane te ale mepu in nasopu nani.

³⁴Nalali te nope ansanu ma an amu nan Um-ume UISNENO, ma Um-ume nane nahenu nok UISNENO In apinat.

³⁵Es nane te Nai Musa kan tam fa neu Um-ume nane in nanan.

³⁶Leka nope nane ansae anfani na'ko Um-ume UISNENO, to Israel anpukai sin um-ume ma natnani neu bale bian anteni.

³⁷Mes kalu nope nane kan sae fa sin kan poi fa he nao na'ko bale nane.

³⁸Anbi leku to Israel sin fe naoinsok, UISNENO nabala anbi Um-ume nane la namasbon on nope anbi ne-neno ma namasbon on ai anbi fa-fai.