Read Uab Meto KELUARAN 5 Bible Online

KELUARAN 5 - Uab Meto bible

KELUARAN 5

¹Namuni te Nai Musa ma Nai Harun sin nao ma anhake anbi Kesel Mesir in matan ma nak, “UISNENO Israel, In naplenat nak, ‘Mufetin Au to he nao he nati' sin naluli nabes neu Kau anbi mnela hufui.’ ”

²“Sekau ka UISNENO le nane?” Kesel natan onane, “Nansa' au he nen In ma ufetin to Israel he sin anao? Au ka uhin fa UISNENO nane, ma atoni Israel au ka ufetin fa sin he sin anao.”

³Nai Musa ma Nai Harun sin nak, “Atoni Ibrani sin Uisneno nalil'on nalali neu kai. Mufetin kai he haim nao neu mnela hufui le in a'lon atnao neno tenu he hai mitulu fua tulu neu, hai UISNENO Israel. Kalu hai ka minaob fa lasi nane, of In namate kai neki menas ma makenat.”

⁴Kesel nak neu Nai Musa ma Nai Harun nak, “Nansa' hi mo'e atoni-atoni nane he nasaitan sin mepu? Amlenu ate-ate nane he nati' sin anmepu!

⁵Atoni-atoni nane sin ain namfau nae le'uf. Ma leku le i him lomi he nati' sin nasnas na'ko mepu!”

⁶Anbi neno nane amsa ale apanat to Mesir ma apaot-apaot to Israel sin napeni plenat na'ko kesel nak,

⁷“Kaisa anfe anteni aen ta'u neu to nane hen mo'e fatu mtasa. Maut he nati' sin nao ma sin nami anmeskun.

⁸Mes amlenu sin hen mo'e fatu mtasa in ain kaisa ansanu na'ko le afi sin anmo'e. Sin naklati sin aon ma napehen; es nane te sin ananbai piut he nafetin sin he nao he natulu fua tulu neu sin Uisneno.

⁹Miseke atoni-atoni nane hen mepu mafena anesi anteni, he nati' sin naeo'bok nok mepu ma kan mu'in fa tabu he natninan uab-uab luman.”

¹⁰Ale apanat to Mesir ma apaot-apaot Israel nane anpoi ma namolok neu atoni-atoni Israel nak, “Kesel naplenat he nati' kais anfe anteni ki aen ta'u.

¹¹Hi mes mami meskim anbi me-me, mes mimnau, fatu mtasa le hi mo'e nane kais ansanu na'ko aif le hi mo'e anbi tabu afinit.”

¹²Es nane te atoni Israel sin anao ma anfun natef pah Mesir he nibun aen ta'u.

¹³Ale apanat nane naseke sin piut he nati' sin anmo'e fatu ain namnes onle tabu anfe neu sin aen ta'u.

¹⁴Ale apanat nane antepo apaot-apaot Israel le anlenu sin anpanat mepu nane. Sin natan sin nak, “Nansa' ho to sin anmepu fatu mtasa nane amfaune ka namnes anteni fa on afi tabu ahunut?”

¹⁵Oke te apaot-apaot Israel sin nao ma anhake anbi kesel in matan ma sin ansakoi nak, “Nansa' Usi ho mo'e kai onane?

¹⁶Kan fe neu kai fa aen ta'u, mes naseke kai he hai mo'e fatu mtasa! Tabu le i hai matepo kai mes asanat nane Usi ho ameput sin!”

¹⁷Kesel natae nak, “Namneo hi apehet ki ma hi kam lomi fa he mepu. Es nane te him toti kau he ufetin ki he him nao he mitulu fua tulu neu hi UISNENO.

¹⁸Amnao nai he mepu amteni. Aen ta'u of kan fe anteni fa neu ki, mes hi mo'e fatu mtasa le in amfaun nabala.”

¹⁹Apaot-apaot nane sin nahin nak nasusab sin leka natonan sin nak atoni-atoni Israel mes sin anmo'e fatu mtasa le si ain namnes nok afi ahunut.

²⁰Leka sin anpoi na'ko sonaf, sin naeku nok Nai Musa ma Nai Harun le fe anpao sin.

²¹Apaot-apaot nane nak, “UISNENO nahin hi taos hi mo'et! In of ankas ki! Hi es anmo'e talante kesel ma in ameput sin anek nanan kai, talante sin he namate kai.”

²²Oke te Nai Musa in nao ma anhake anteni anbi UISNENO in human ma in matan ma in nak, “Koi Uisneno, nansa' es Ho moe to Israel namle'u onle nane? Nansa' es Ho lenu kau neu bale le i?

²³Fun na'ko leku au hake anbi kesel in matan ma au umolok natuin Ho kanam, in anhamu'i to le i nok mafena. Ma Ho ka mo'e fa sa'-sa' hem tuntaku sin.”

²⁴Oke te UISNENO nakua a'an neu Nai Musa nak, “Tabu le i of ho mit of Au mo'e onme ka neu kesel. Of Au useke in he nafetin Au to. Namneo, of Au useke in hen li'u sin na'ko pah le i.”