Read Uab Meto KELUARAN 6 Bible Online

KELUARAN 6 - Uab Meto bible

KELUARAN 6

¹Uisneno nakua a'an neu Nai Musa nak, “Au UISNENO kau.

²Au ulil'ok neu Nai Abraham, Nai Ishak ma Nai Yakub on Uisneno Akuasat Afin-finit, mes Au ka uklila fa Au aok neu sin nok kanaf ‘UISNENO’.

³Au mo'e ulali Fef Bela oke sin amsa. Au manta'en ulali of Au fe ani pah Kanaan neu sin, pah le afi unun sin anmoni anbine anfani atoni anao amnemat.

⁴Au nen ulali atoni Israel sin sananet le atoni Mesir sin an aten sin, oke te of Au umnau ufani Au manta'en nane.

⁵Es nane te amkakan nai neu to Israel mak Au etun ulali sin: Au le i UISNENO; of Au ufetin ki na'ko hamu'it anbi Mesir. Of Au uton Au kuasat anaek he ufetin ki ma usanut kasat mafena neu pah Mesir.

⁶Hi of amfani Au to, ma Au fani hi Uisneno. Nok nane of hi mihin mak Au le i ho UISNENO, le nafetin ki na'ko aten anbi pah Mesir.

⁷Of Au eki ki neu pah le Au ta'en ulali nok supat neu Nai Abraham, Nai Ishak ma Nai Yakub, pah nane of Au fe ani neu sin anfani sin in-ini. Au le i UISNENO kau.”

⁸UISNENO In fef ba'an nane Nai Musa natiaba neu to Israel, mes sin kan lomi fa he nen Nai Musa, natuin lasi aten nane mafena ma naoleb sin nekan.

⁹Nalali te UISNENO nakua a'an neu Nai Musa nak,

¹⁰“Amnao nai ma amhake anbi kesel in matan ma mutonan mak in mes he nafetin to Israel he nasaitan in pah.”

¹¹Mes Nai Musa natae nak, “Atoni Israel anmes kan lomi fa he nen kau. Onme anteni Kesel Mesir he natnin atoni le ka namolok nahin fa onle kau?”

¹²Onle nane UISNENO anlenu Nai Musa ma Nai Harun he natonan to Israel ma Kesel Mesir nak sin napeni sutais na'ko UISNENO hen fani atopus neu to Israel anpoi na'ko Mesir.

¹³Le i sanut mofut na'ko Nai Musa ma Nai Harun; Nai Ruben le Nai Yakub in anmone naen in anmone sin ha: Nai Henokh, Nai Palu, Nai Hezron, ma Nai Karmi. Sin le nane anfani na'if neu sufa ka'uf anbi uf Ruben.

¹⁴Nai Simeon ma in fenai bife Kanaan sin anmu'i anmone ne: Nai Yemuel, Nai Yamin, Nai Ohad, Nai Yakhin, Nai Zohar ma Nai Saul. Sin le nane anfani na'if neu sufa ka'uf anbi uf Simeon.

¹⁵Nai Lewi anmu'i anmone tenu: Nai Gerson, Nai Kehat ma Nai Merari; sin le nane anfani na'if neu sufa ka'uf anbi uf Lewi. Nai Lewi in moni nan ton 137.

¹⁶Nai Gerson anmu'i anmone nua: Nai Libni ma Nai Simei; sin sufan ma sin ka'un namfau.

¹⁷Nai Kehat in anmone sin ha: Nai Amram, Nai Yizhar, Nai Hebron ma Nai Uziel. Nai Kehat in moni nan ton 133.

¹⁸Nai Merari in anmone sin nua: Nai Mahli ma Nai Musi. Nane sufa ka'uf anbi uf Lewi es-es nok in sufan ma in ka'un anmes.

¹⁹Nai Amram anmafe nok bi Yokhebed, in amaf in fetof, ma sin anah sin esle' Nai Harun ma Nai Musa. Nai Amram in moni nan ton 137.

²⁰Nai Yizhar in anmone sin tenu: Nai Korah, Nai Nefeg ma Nai Zikhri.

²¹Nai Uziel amsa in anmone sin tenu: Nai Misael, Nai Elsafan ma Nai Sitri.

²²Nai Harun anmafe nok bi Eliseba, Nai Aminadab in anfeto; bi Eliseba in naof es Nai Nahason. Bi Eliseba nahonis Nai Nadab, Abihu, Nai Eleazar ma Nai Itamar.

²³Nai Korah in anmone sin tenu: Nai Asir, Nai Elkana ma Nai Abiasaf. Sin le nane anfani na'if neu Nai Korah in sufan.

²⁴Nai Eleazar, Nai Harun in anmone, anmafe nok Nai Putiel in anfeto mese, ma sin anah es Nai Pinehas. Le nane sin anfani nakaf neu sin sufan ma sin ka'un ma anfani nakaf anbi ume uf Lewi.

²⁵Nai Harun ma Nai Musa le nane es UISNENO naplenat sin he neki atoni-atoni Israel anpoi na'ko Mesir.

²⁶Sin nua sin anhake anbi Kesel Mesir in matan he nati' nafetin atoni Israel.

²⁷Leka UISNENO nakua a'an neu Nai Musa anbi Mesir,

²⁸UISNENO nak, “Au le i UISNENO kau. Mutiaba nai neu Kesel Mesir ale sa' le Au uton ulali neu ko.”

²⁹Mes Nai Musa natae nak, “Koi UISNENO, Ho muhin neu au ka manoe fa anbi uab. Onme ka kesel in lomi he nen kau?”