Read Uab Meto KELUARAN 9 Bible Online

KELUARAN 9 - Uab Meto bible

KELUARAN 9

¹UISNENO nakua a'an neu Nai Musa nak, “Amnao nai ma amhake ambi kesel in matan ma muton neu in mak UISNENO, atoni Ibrani sin Uisneno, nakua a'an nak: ‘Mufetin Au to he sin nao he nati' sin naluli nabes neu Kau.

²Kalu ho kam lomi fa he mufetin sin,

³Au of usanut snama anaek neu ale ho mu'it, bikase, bikase luke mnanu, bikase paha snaen, bijae, bibi kase ma ho bibi sin.

⁴Au of banaika atoni Israel sin mu'it ma atoni Mesir sin mu'it. Na'ko atoni Israel sin mu'it of kan mu'i fa esle' hen mate.

⁵Au, UISNENO kau, Au lek ulali neno noka he unaoba ani lasi nane.’ ”

⁶Anbi nokfa fe nok-noka UISNENO anmone onle In namolok nalali. Ale mu'it atoni Mesir anmate ok-oke, mes na'ko atoni Israel sin mu'it kan mu'i fa esle' hen mate.

⁷Kesel natoti neu sa' es anbol nalali, oke te natonan in nak na'ko atoni Israel sin mu'it kan mu'i fa esle' hen mate. Mes kesel namanub in nekan ma in kan lomi fa he nafetin to nane he sin anao.

⁸UISNENO nakua a'an neu Nai Musa ma Nai Harun nak, “Maiti afu poho fauk na'ko bale hanat. Anbi kesel in matan, Nai Musa mes amkifun afu nane neu neno atnanan.

⁹Ma afu nane of nasitbon anfun natef pah Mesir. Afu nane of napoitan bisu-bisu le anpe' ma anfani papa' le naoe anbi mansian ma mu'it sin aon.”

¹⁰Oke te Nai Musa ma Nai Harun sin naiti afu, ma sin anao ma anhake anbi kesel in matan. Nai Musa ankifun afu nane neu neno atnanan.

¹¹Bisu anpoi anbi mansian ma mu'it anpe' ma anfani papa' le naoe. Ale mnane kan hake nabe'i fa anbi Nai Musa in matan natuin sin aon nahenu nok bisu onle atoni-atoni Mesir bian.

¹²Mes UISNENO namanub kesel in nekan, ma onle UISNENO namolok nalali, kesel nane kan lomi fa he nen ma natnin Nai Musa ma Nai Harun sin molok.

¹³UISNENO nakua a'an neu Nai Musa nak, “Amnao nai neu kesel in matan anbi fe nok-noka ma mutonan in mak UISNENO, atoni Ibrani sin Uisneno nak: ‘Mufetin Au to he nati' sin anao ma naluli nabes neu Kau.

¹⁴Anbi haef le i of Au usanut snama ka alfa neu ho anaet sin ma ka alfa neu ho to sin, mes neu ko amsa, he nati' ho muhin nak kan mu'i fa esle' he nanes'on nok Kau anbi pah pinan anfun natef.

¹⁵Oni bait Au he kas ko mok ho to eki menas, namneo hi mate mimle'u milali.

¹⁶Mes Au ufetin ki he hi moni he nati' Au uton Au kuasat neu ko, talante Au kanak mateka anfun natef pah pinan.

¹⁷Maski nak onane, ho fe munaebom ma kam lomi fa he mufetin Au to sin he nao.

¹⁸Noka fa, tabu papmese onle i, of Au usanut ul fatu le anae le'uf kun, le fe kan bol nit fa anbi Mesir na'ko neno ahunut antia leku le i.

¹⁹Es nane te mupoitan aplenat he nati' ale mu'it ma ale amaus le anbi mone natam sin neu bale tainine. Ale mansian ma ale mu'it anbi me-me le ka na haof ton fa of anmate natuin antoman ul fatu.’ ”

²⁰Fauk-fauk anbi anaet sin namtausan a'an UISNENO. Sin neki sin ate-ate sin ma sin mu'it sin natam sin neu ume he nati' nahaoftok.

²¹Mes bian sin natuin lasi mnaut nane ma sin nafetin sin ate-ate sin ma sin mu'it sin anbi mnela.

²²Oke te UISNENO nakua a'an neu Nai Musa nak, “Muaiti ho nimam neu neno tunan, ma ul fatu of ansanu nem neu pah Mesir anfun natef. Ulan nane of antoman mansian, mu'it ma ale luet anbi lene.”

²³Nai Musa naiti in tias neu neno tunan, ma UISNENO nasanut anin slutuf ma ul fatu, limat ma lotos neu pah pinan. UISNENO nasanut

²⁴ul fatu le nae le'uf kun nok limat ma lotos le anku'an anfun natef. Le nane ul fatu le nae le'uf kun anbi atoni Mesir sin monin.

²⁵Anbi pah nane anfun natef ul fatu nane nale'un ale sa' anbi lene, ma mansian ma mu'it. Ale luet anbi lene in nanan namle'u ma ale hau-hau sin natselan.

²⁶Alkun anbi pah Gosyen, bale atoni Israel namaika anbine, ul fatu kan sanu fa anbine.

²⁷Oke te kesel no'en Nai Musa ma Nai Harun ma in nak, “Au usanab ulalilen. UISNENO nane es amneot, au ma au to hai mo'e milali sanat.

²⁸Amonen nai neu UISNENO; hai misusbon anaek natuin lotos ma ul fatu le i. Au of ufetin ki hem nao. Ka nabe'i he hi mimaika amteni anbi bale le i.”

²⁹Nai Musa nak neu kesel nak, “Leka au tia ulali kot nane in kotin, of au uaiti au nimak ma onen toti neu UISNENO. Lotos of nasnas ma ul fatu of namne he nati' au Usif ho muhin nak pah pinan le i UISNENO in-ini.

³⁰Mes au uhin nak au Usif ma ale anaet hi ka mimtausan fa UISNENO.”

³¹Pen mina ma sain namle'u, natuin pen mina ma sain he napune.

³²Mes ale ane kase ma buka' ka namle'u fa natuin fe kan tia fa in etin.

³³Oke te Nai Musa nasaitan kesel ma in nao neu kot in kotin; anbi nane in na'aiti in niman ma in onen neu UISNENO. Anbi leku nane amsa limat ma lotos, ul fatu

³⁴ma ulan nasnas. Leka kesel in nit lasi le anbol nane, in anmo'e anteni sanat. In ma in anaet sin nekan namanu piut.

³⁵Onle UISNENO naton nalali anao natuin Nai Musa, kesel kan lomi fa he nafetin atoni Israel sin he nao.