Read Uab Meto AYUB 1 Bible Online

AYUB 1 - Uab Meto bible

AYUB 1

¹Nai Ayub atoni mese le natua anbi pah Us. In naluli ma nabes neu Uisneno ma na'ki neu In. In atoni nek muti ma in kan mo'e fa amle'ut.

²In nahoni anmone sin hitu ma anfeto sin tenu.

³Naik na'ko nane in anmu'i ate namfau, bibi kase 7.000, bikase pah asnaen 3.000, bijae 1.000, bikase luke mnanu 500. Es nane te in atoni amu'it anesit na'ko atokos anbi pah Neno Saen.

⁴Nai Ayub in anmone hitu sin anbi sin monit nasenun ma anmo'en buat anbi sin ume. Anbi buat le nane anhone Nai Ayub in anfeto sin tenu amsa, ma sin antok nabuan ma nah ma ninun.

⁵Leka buat nane namsopu, Nai Ayub anfen nok-noka ma natulu fuat neu in anah sin mese-mese he nati' napeni sako sanat na'ko UISNENO. Natuin Nai Ayub in tenab, oni kalu in anah sin nasanab nalali ma nale'uf Uisneno mes sin ka nahinan fa.

⁶Anbi neno mese ahake neno sin nem ma anhake anbi UISNENO In matan, ma Nitu anbi sin tnankenu amsa.

⁷UISNENO natan neune nak, “Ho mu'ko me ka?” Nitu natae nak, “Ho ate fe au fun ma non ulali pah, funam utef pah pinan.”

⁸Oke te UISNENO natan neune nak, “Ai hom panat ma mail ma amkiso Au ate Nai Ayub? Fun anbi pah pinan ka tit fa esle na'ki ma nek leko onle in. In naluli nabes neu Kau ma kan mo'e fa amle'ut.”

⁹Mes Nitu natae nak, “Namneo Nai Ayub naluli nabes neu Ko fun in ansimo baen.

¹⁰In, nok in ume nanan ma in mu'in Ho es ampanat mani. Ho amfe tetus neu in mepu ma Ho mumu'ib in meki mu'it namfau, anfun natef pah le i.

¹¹Mes leka Ho mait mani in mu'in nane, namneo in of ansukat Ko!”

¹²Ma UISNENO nak neu Nitu nak, “Leko, ho mo'e sa' le hom lomi neu Nai Ayub in mu'in, mes kais ho mususab in!” Oke te Nitu anpoi ma in nao na'ko UISNENO In matan.

¹³Anbi haefes leka Nai Ayub in anah sin anmo'e buat anbi sin tataf anaet in ume.

¹⁴Nok askeken sin ana'lenu mese naen nem neu Nai Ayub in ume ma nak, “Usi, atoni-atoni Syeba nem ma anbe'u kai tabu hai mek bijae sin ma amfoi afu ma bikase luke mnanu sin anpaumak ma nekun hun. Sin nem ma nasik nan mu'it sin ma namate Usi ho ate sin anbine. Ma al ho ate kau es ufetnok he nati' au uton neu Usi ko.”

¹⁶Ma leka in fe nauab te, ate mese nem anteni ma nak, “Ho bibi kase sin ma Usi ho atukus sin ken neno anken nis sin ma sin mate oke. Ma al ho ate kau es ufetnok he nati' au uton neu Usi ko.”

¹⁷In fe ka nauab nalali fa te, ate hae tenu nem ma nak, “Atoni Kasdim sin pukan tenu antam ma nasik nan Usi ho bikase pah asnaen sin ma namate Usi ho ate sin. Ma al ho ate kau es ufetnok he nati' au uton neu Usi ko.”

¹⁸Leka in fe nauab, ate mese nem anteni ma neki hanaf nak, “Usi ho anah sin anmo'e buat anbi sin tataf anaet in ume.

¹⁹Nok askeken ani slutuf anfu na'ko pah snaen antoman ume le nane talantia anbel ma namate Usi ho anah sin oke. Al ho ate kau es ufetnok he nati' au uton neu Usi ko.”

²⁰Oke te Nai Ayub anfen anhake ma anpisu in blua pake anfani takaf neu in nasusbon. In eu in nakan, oke te in naluli nabes

²¹ma nak, “Afi nahonis kau ka nok fa sa'-sa', ma of au mate ka nok fa sa'-sa' amsa. UISNENO es anfe nani neu kau ma UISNENO amsa es naiti nani amsa. Pules liatas neu In kanan!”

²²Es nane te, maski Nai Ayub napeni snama nane, in kan mo'e fa sanat ma in ka nasanab fa Uisneno.