Read Uab Meto AYUB 10 Bible Online

AYUB 10 - Uab Meto bible

AYUB 10

¹Au lenan ulali monit es, nanet au he utiaba au sakoit.

²Koi Uisneno, kais Ho musan kau; muton kau neu nansa' es Hom laban kau.

³In upan sa' ka kalu Ho mutuin kau, nalali te mu'lob Ho mepu in nesan. In upan sa' ka kalu Hom simo atoni abulalut sin tenab.

⁴Ho salit ka namnes fa nok mansian in salit.

⁵ma Ho uam ka tuka fa on sin uan.

⁶Kalu onane, nansa' es Hom mami piut ale au sanat sin?

⁷In amneon au uhin ma be' amsa, neu ka mu'i fa sanat mes au umneo. Ho muhin amsa neu kan mu'i fa atoni mese amsa nabe'i he nafetin kau na'ko Ho nimam.

⁸Ho mepu mulali kau meki Ho nimam, moe onme es tabu le i Ho mule'un kau?

⁹Ai Ho ka mumnau fa neu Hom pakae kau na'ko afu makliat? Ma Ho he moe kau he au fani neu afu?

¹⁰Hom fe sona neu au ama he namonib kau ma Ho munaeba kau anbi au aina in apun.

¹¹Hom amu mani au nesak meki pasu ma Ho mufena au aok meki nuif ma keot.

¹²Hom fe kau honis; ma Hom nek kau, Hom panat ma ampaloli kau.

¹³Mes tabu le i au uhin nak anbi afi unun, amsa Ho mutenab nukat neu kau amnesam-nes.

¹⁴Hom panat kau kal-kalu au usanab he nati' Hom tite ma kam sako kau fa.

¹⁵Leka au moe sanat, es nanet maut he au monik namle'u. Mes leka au ka mu'i fa tanhais, namaut he nati' nabaina kau anfani asanat. Au ka ube'i fa he u'aiti au nakak natuin au nekak naspae ma au amle'ut kau.

¹⁶Leka au aiti au nakak, Hom li'u mutuin kau on meo asu. Ma Ho muton Ho kuasat, neu hem hakatau kau.

¹⁷Ho muhakeb amteni saksi fe'u neu hen laban kau; ma Ho to'as nane antu'an ma nao piut neu kau. Ma Ho meo naek Hom fe sin hen maken ma namate kau.

¹⁸Nansa' es Ho mufetin kau he nahonis kau anbi pah pinan? Leko nesi au mate nahun na'ko mansian-mansian sin nit kau!

¹⁹Nok nanet onle ka nahonis nit kau fa, natuin ansub nani kau na'ko au aina in apun.

²⁰Ah, ka lo anteni fa te au mes a'mate, es nanet mufetin kau, he au malin fe nahun na'ko au uab sin namsopu.

²¹Ka lo anteni fa te au mes a'nao, ma mes au ka fain amu fa, au nao neu pah le names'ok, ma namsab.

²²Pah le mesokan le nahenu nok hakataus, le anbi nane meusine namnes nok mesokan.”