Read Uab Meto AYUB 13 Bible Online

AYUB 13 - Uab Meto bible

AYUB 13

¹Ale lasi nane au it ma au nen ulali, ma namneo au uhine.

²Sa' le hi mihine au uhine amsa; kais hi mitenab mak him be'u kau.

³Mes au he u'uab ok In Le Akuasat Afin-finit, au he esi au lasi anbi Uisneno In matan.

⁴Natuin him obe hi mono meki poi, namnes nok ale mnane.

⁵Bait oni hi he ka miuab fa, oin hi ahinet ki.

⁶Es nanet amnen nai au matoes, ma mituin nai natuin au he esiok.

⁷Nabe'i ka natuin Uisneno, hi mo'e lasi poi? Nabe'i ka hi mipoibom natuin In salit?

⁸Ai hi hem hake mok Uisneno, ma matoe he mesi In?

⁹Leka Uisneno antae ki in upan nane leko ai kahaf? Nabe'i ka him fuli Uisneno onle him fuli mansian?

¹⁰Maski nak nok a'tol-tolo' hi mesi, nok nek maunu Uisneno mes ankas ki.

¹¹Ai Uisneno In anaet nane ka naskekeb ko fa? Es nanet hi mes mimtausan In?

¹²Hi noina sin onle afu le ka maota; ma ho uab sin onle auf makliat le in anpe' pisa-pisa.

¹³Es nanet amta nai, namaut he au u'uab! Au ka filoli fa sa' es mes hen bol.

¹⁴Au uloitan he una'at au smanak!

¹⁵Au ufek ulali natuin au u'oelbok, au una'tok! Leka Uisneno he namate kau, mes au mes esiok anbi In matan.

¹⁶Oin mes nok au matanik, au mes ufetnok, natuin atoni abulalut ka nabe'i fa hen hake anbi Uisneno In matan.

¹⁷Tabu le i mituin lek-leko au uab, ma amnen au molok.

¹⁸Au uloitan ulali he au utiab au lasi; au palsai mes ka ka nasanab kau fa.

¹⁹UISNENO, leka Ho amu ma Hom luku kau, au mes ata' ma pao an tabu amsopun.

²⁰Mes mutae kau neu au totis nono nua le i, he nati' au ube'i hake bi Ho matam.

²¹Musnasab hakamu'it neu kau, ma kais amhakatau kau.

²²Mukua Ho a'am ma au mes utae Ko, ai mufetin kau he au u'uab ma mutae mani kau.

²³Au elet tanhais ma au sanat le au mo'e in a'naene ba'u ka? So Ho muton au elet tanhais sin mese-mese.

²⁴Nansa' es Ho mu'lo ma muskotu mu'ko kau? Nansa' es Ho mutenab kau anfani on Ho musu?

²⁵Au onle hau no' le ankua leka anin anfu, nansa' es Ho mo'e kau talantia au u'tai! Au onle aen ta'u le anmaknene ma anmeto, nansa' es Hom li'u mutuin kau!

²⁶Him lek ma amlulu amenut neu au monik; Hom seunbanin au sanat bi tabu au munif kau.

²⁷Hom futu au haek meki kolen besi; ale au bekok Hom panat mani, talantia au haek nobin, ka nafetnon fa na'ko Ho kisot.

²⁸Es nanet au mau onle hau le nafo; onle iki nalapub pilu. Au le i alapu' kau.