Read Uab Meto AYUB 14 Bible Online

AYUB 14 - Uab Meto bible

AYUB 14

¹Mansian na'ko le nahonis in a'olet ma alima'et; in uan tuka ma nahenu nok as unu.

²In anbo ma anmaknene on hau sufa; in nafinbon on hafo ma namneku ankon.

³Koi Uisneno nansa' es Hom tao mata onane neu kau? Ma Ho muhakeb kau anbi Ho alef lasi sin matan?

⁴Napeni ka mansian asanat napoitan lais leko?

⁵Hom lek mulali mansian in uan; ma amlul mulali in funan nok amneot, Ma Hom eka mulali in monin es nanet in; mes kan fini fa.

⁶Maut he nati' in nas-nas ma kais maunu in; he nati' in antamis nit in monin, talantia nasopu in sutais.

⁷Fun fe anmu'i fnekat neu hau le anse' nani; in mes nasuni ma nasnuk,

⁸maski in ba'an anbi nain, ma in tukluan anmate natuin anmau.

⁹Mes leka oe antoman, in anmoni anteni, on hau fe'u mese le in nasnuk ma natol.

¹⁰Mes leka mansian anmate, in lasi namsop. Ma leka in nasaitan pah pinan, in mes anao an ali me ka?

¹¹On oe nasum na'ko nifu, ma on noe nonon in oen anmeti,

¹²onane te mansian le anmate nalali: in mes kan fen anfani fa. In mes kan fen fa leka neno tnanan fe anbin, ma in mes kan fen fa na'ko in tupas.

¹³So Ho mutolo' kau na'ko plenat nitu; munini kau talantia Ho to'as namsopu Mes Hom lek tabu neu kau he nati' Ho mumnau mufani kau.

¹⁴Natuin leka mansian anmate, nabe'i ka he in anmoni anfani? Neno nao neu neno au pao, talantia au neno susal sin anfin ma ankon.

¹⁵Ma Ho mes amboin kau, ma au mes utae Ko amsa. Ho mes amnek mufani kau, fani amonit le Hom pakae mulali.

¹⁶Ma Ho mes ampanat monit, ma Ho mes kam so'i fa au sanat-sanat sin.

¹⁷Ho mes amsako au sanat, ma mu'lob sin, Ho mes amnose mani au elet tanhais sin.

¹⁸Tubu-tubu mes ankua ma nasitbok, ma tubu fatu sin mes sin nain sin bale.

¹⁹Oe le ansai naek mes anpeu nani fatu sin, ma ulan naek mes neki nani afu. Mansian in fnekat Ho mes mule'un mani onane.

²⁰Hom be'u in talantia nabal-bal; Hom lenu he nao ma Ho muklelo in human.

²¹In anah sin anfani atoni makana mes in ka nahin fa. Ma leka sin anmofu anbi mamu'it, es mes ka natonan fa in.

²²Al in ta'un es anmo'e in aon nasusbon, ma natuin in aon anmes in smanan nasusbon.”