Read Uab Meto AYUB 18 Bible Online

AYUB 18 - Uab Meto bible

AYUB 18

¹Ma Nai Bildad natae nak, “Hoi Ayub, leka ka of ho muuab mulali? Mutena nai, ma mutnin kai he hai miuab.

³Nansa' ho mutenab mak hai atoni amonot kai, ma ho munesa kai nok bijae?

⁴Ho taos mes neki menas neu ho aom. Ai al neu ho lekom, pah pinan le i kais anmu'i atuas, ma tubu-tubu natnanib sin na'ko sin bale?

⁵Atoni amaufinut sin paku mes anmate; ma ai mes kan pin anteni fa.

⁶Meusine anbi um-ume mes namesok, ma in paku ameusine nane mes kan tana fa.

⁷In lakat alekot mes an eka nani; ma in tenab sin es naekab in.

⁸In nao natuin tani balan, es nanet in haen na'kai'on.

⁹In haen tikan antoman kleo es nanet anheke nan in.

¹⁰Natolo' tani, anbi afu; ma antao lau anbi lanan le in nao natuin.

¹¹Atoni amaufinut naskeken hakataus na'ko neno kabenan sin, ma in mes anmoni nok amtaus.

¹²Anbi ahunut in abe'it, mes muni i in anoek; natuin in natef nok snama anbi me-me.

¹³Nu'e le'u nah nani in pasun; in niman ma in haen nafo' natuin nu'e oef.

¹⁴Miskotun in na'ko um-ume bale in natua nok amlilat, ma neki in ma nahakeb in anhaumak nok nopu maten.

¹⁵Tabu le i sekau am sekau nabe'i natua in um-ume, ma anbi um-ume mes ankifun upat he naneku menas.

¹⁶In a'ba'an mes anmeto ma anunuon; in atlaen sin mes anmeto ma anmaknene.

¹⁷In mes ka mahine fa leko anbi kot nanan ma kot kotin; ma kan mu'i fa atoni mese amsa le namnau in kanan.

¹⁸Anli'u in na'ko meusine ma natam in neu mesokan; ma na'lob in na'ko pah atoni amonit.

¹⁹In kan mu'i fa anah ma sufa ka'uf; anbi in kuan ka nain fa es he nabalah.

²⁰Atokos abit neno tesan naskek leka sin nen neu in monin, ma atokos abit neno saen na'tai natuin sin namtau.

²¹Atoni abulalut le ka naupab, fa Uisneno in monin onane.”