Read Uab Meto AYUB 19 Bible Online

AYUB 19 - Uab Meto bible

AYUB 19

¹Mes Nai Ayub natae nak, “Nansa' es hi miplenat kau piut. Ma him hakamu'i kau meki uab?

³Hi mile'uf kau anbi ale tabu, ma hi ka mimaebom fa natuin him aten kau.

⁴Oni kalu au moe sanat, nane ka nalukib ki fa amsa.

⁵Hi mitenab mak hi aom naleko nes na'ko kau; au susat hi mibaina anfani taka' neu au sanat sin.

⁶Mihin nai tabu le i Uisneno an aten kau, ma anheke kau anbi In habi in nanan.

⁷Au fiuklok natuin In maunu, mes kan mu'i fa es hen kius kau. Au hunun ak, “Amneot nane esme ka,” mes kan mu'i fa es le he nen kau.

⁸Uisneno es an eka au lanan, es nanet au ka fini fa, In namesokab au lanan sin.

⁹In nasik nan au maus sin, ma nale'un au kanak alekot.

¹⁰In nale'un kau na'ko ale bale, onle atoni le anbok hau sena in aba'an, ma nafetin kau maknene ma meto, In nasik nan au fnekat onane.

¹¹Uisneno napina In to'as neu kau; ma nabaina kau fani on In musu.

¹²In meo naek sin anlaban kau, ma kat eka tabe'i fa sin; sin an eka au lanan ma antal nan au um-ume.

¹³In na'lob au olif tataf sin na'ko kau; au fani atoni anao mnemat neu sin le au uhin sin.

¹⁴In na'lob au in-ini sin na'ko kau, ma au soba sin ka namnau anteni kau fa.

¹⁵Au ate bife sin anikan kau, fani on sin tuak; sin nabaina kau on atoni le sin fe ka nahine fa.

¹⁶Au boin au ate, mes in ka natae fa, maski nak au hanoe in eki uab amalulet.

¹⁷Au fenai anmanis kau leka nafoi nit au snasak in fon, au olif tataf sin kan lomi fa hen haumak kau.

¹⁸Li'ana-li'ana abit lanan sin naakan kau; leka au fen ahake sin anmanis kau.

¹⁹Au soba sin nit kau sin anmainisin kau, sin le au nek ani sin nasaitan nani kau.

²⁰Au aok al pasu es an amu nuif; ala kle'ot au mes amate ma a'fun ani au snasak.

²¹Au soba ki, amnek ma mimnau kau, natuin Uisneno In niman anbiso kau.

²²Uisneno antamni' kau, ma nansa' es hi misina In? Hi fe kam leu fa hem hamni kau ka?

²³Nati' au uab sin amtui sin, talantia mimnau sin;

²⁴nati' anpah nani neki besi anbi fatu, he nati' nabalah anbi ale tabu.

²⁵Mes au uhin nak anbi neno tunan anmu'i au Afetin, ma of In nem ma antuntaku kau.

²⁶Maski nak au pasu nahenu nu'e ma anpe'an, mes leka au aok ta'un fe anbin, au mes it Uisneno.

²⁷Au mes it In eki au matak, ma In mes anfani sob leko neu kau. Au nekak namle'u natuin hi miuab mak,

²⁸‘Hit het moe onme he ta mofu in?’ Hi mami uab he nati' amlasi mok kau.

²⁹Mes anbi tabu le i hi mimtausan suni! Natuin nok to'as Uisneno ankas atoni asanat; es nanet hi mihin, nak Uisneno esan le anlefi mansian in lasi.”