Read Uab Meto AYUB 22 Bible Online

AYUB 22 - Uab Meto bible

AYUB 22

¹Ma Nai Elifas nak, “Anbi ale to mansian, ka tit fa es he maota neu Uisneno. Atoni nek malinat in maota al neu kun in aon anmes kun.

³In otan nane sa' ka neu Uisneno, kalu ho mo'e mutuin In lomin? In upan nane sa' ka neu In kalu ho monim nane naleko?

⁴Ai ka al fa ho mumtausan Uisneno, es ho mateka ko ma nabaina ko anfani asanat,

⁵mes natuin ho sanat nane namfau, ma ho maufinu anbi ho bekom ma ho mo'em.

⁶Leka ho aon bian kan baen nabe'i fa ho tusa, ho musik man in bale pake sin.

⁷Atoni le anhae ho kam fe neune fa he ninu, ma le namnah ho kam hone fa he nah.

⁸Hom pake ho toko ma ho kuasat he nati' amtet man sin afu oke.

⁹Ho kam fiti fa ale banu, mes ho munisi' li'anmanat sin anteni.

¹⁰Es nanet kleo anfun natef nalali ko, ma natuin lasi nane ho nekam nahenu nok amtaus.

¹¹Ho neno monit sin names'ok piut, es nanet ho ka mit fa; hom lem natuin noe sako ankub nan ko.

¹²Ai Uisneno kan tunon fa anbi neno maaiti, ma antae neu pinan, neu ale afkun le amnaun le'uf.

¹³Mes ho mutan mak, ‘In nahin sa' ka? In es nope aon bian ma In mes kan lefi fa hit lasi.’

¹⁴Ho mutenab mak In kisot nane antu anbi nope, ma al In naoinson anbi neno tnanan ma pah pinan sin tu'an?

¹⁵Ai hom lomi hem nao mutuin lanan le atoni amaufinut sin anbeti nalali?

¹⁶Uisneno mes anheke sin nahun na'ko sin neno maten antia, ma noe sako mes neki sin.

¹⁷Sin le nane es nabe'i hen tite Uisneno Akuasat Afin-finit, ma sin natenab nak In mes kan mo'e fa sa'-sa' neu sin.

¹⁸Mes Uisneno es namu'ib sin! Namneo au ka utenab anfa atoni abulalut sin salit!

¹⁹Atoni amneot, in anmoni natuin in anmalin, leka in nit atoni amaufinut napeni kasat.

²⁰Atoni amaufinut in mu'in nane noe sin natuin ai notu nani sa' le nabalah.

²¹Es nane Ayub, so hom halan mok UISNENO, he nati' ho mupeni oe tene. Leka ho mo'e mani, ho mes mupeni in upan.

²²Amsimo noina na'ko UISNENO neu ko; ma mupan anbi ho nekam nanan.

²³Moebaniom neu UISNENO nok nek amnebet, ma musopu maufinu anbi ho ume nanan.

²⁴Mu'lob ho mnatu nesaf sin; ma ampolin sin neu noe le kan mu'i fa oe anteni.

²⁵Maut he nati' Uisneno Akuasat Afin-finit anfani ho mnatu, ma ho noni muti le maupa.

²⁶Ma nabe'i ho mufnek neu Uisneno, ma muhin nai, In es anfani uf neu halinat ma tetus.

²⁷Leka ho musaeb onen totis neu In, In mes natae ko, ma so ho mutiab ho han manta'en sin.

²⁸Ho haet nane mes naton in nesan, ma pina mes antana ko piut anbi ho monim.

²⁹Atoni nek anaeb neu UISNENO mes nanebet nani, mes atoni nek amnebet mes anfe neune honis.

³⁰Uisneno mes antuntaku ko leka ho ka musanab fa, ma leka ho mo'e mani In lomin.”