Read Uab Meto AYUB 27 Bible Online

AYUB 27 - Uab Meto bible

AYUB 27

¹Nai Ayub natae anteni in uab nane, “Nak Uisneno amonit, le ka naton fa In amneot neu kau,

³au aiti supat ak: Natuin Uisneno fe anfe neu kau snasaf amonit, ma snasaf nane fe anbi au aok,

⁴au fefak mes ka napoitan fa uab poi, ma au mak mes kan tek fa uab fulit.

⁵Es nanet au ka ak fa ak hi mimneo; talantia au mate amsa au ka una'tok fa natuin au ka mu'i fa sanat.

⁶Au mes a'na' utau au fnekat, ma au nekak mes naknino'on piut.

⁷Nati' au musu sin napeni kasat on atoni abulalut, ma amkiso sin le anlaban kau on atoni amle'ut.

⁸Anmu'i ka fnekat neu atoni amonot, anbi tabu Uisneno natan sin smanan?

⁹Oin Uisneno In nen sin kaet ai kahaf, onme ka susal antoman in?

¹⁰So leko in anmoni anbi halinat Uisneno, ma an onen neu In ka natfek fa.

¹¹Au mes unoina ki neu kuasat Uisneno nane nak, ma mes au uton ki Uisneno Akuasat Afin-finit In salit.

¹²Mes hi mit milali kim. Es nanet es him fe fainekat le ka maota fa?”

¹³Mai Nai Zofar nauab nak, “Uisneno Akuasat Afin-finit ankas atoni abulalut on le i.

¹⁴Leka in anah sin namfau, sin mes anmate anbi makenat ma in upuf sin anmoni anbi manukat.

¹⁵Sin benuf sin mes anmate natuin snama, ma bife banu sin mes kan kae fa natuin sin.

¹⁶Sin mes anibun noni muti, ma sin bale pake nane namfau,

¹⁷mes noni muti ma bale pake nane mes anfani atoni nek muti sin ini.

¹⁸Atoni amaufinut nane sin ume anmau onle nab-naba in kuna ma sin anmo'e sin ume on atoni apaot sin la'at.

¹⁹In natupa in aon on atoni amu'it, mes ka nan fa lo, natuin leka in anfen na'ko tupas, in mu'in nane namnoe ma namneku.

²⁰Aslutuf anaek antoman in onle noe sako nem nok askeken. Anin slutuf anbi fai anfu ma natpeneb in ma nao.

²¹Anin neno saen naiti nani in, ma na'lob na'ko in ume.

²²Uisneno ka nek fa in es nanet ansukat in, ma in naen ma naninbon.

²³Leka in natsel atoni napasa niman; ma anbi me-me in napeni akan.”