Read Uab Meto AYUB 28 Bible Online

AYUB 28 - Uab Meto bible

AYUB 28

¹Anmu'i bale neu atoni napoitan noni muti; ma anmu'i bale he naknino nani mnatu.

²Besi mahani na'ko nain; nit molo nanoeb na'ko fatu.

³Atoni anfinin fai mesokan, bale na'tolo' amsa antam anbine. Anbi nane, anbi fai mesokan, atoni nami ale fatu.

⁴Bale le na'lo ma kan mu'i fa atuas anbine, le fe kan teli nite fa ma kan nao nokan fa, atoni anmepu ma nakfili anbi tani, anbi nonof in nanan le kan mu'i fa hanaf.

⁵Afu napoitan mnahat neu mansian, mes anbi afu pinan, amsa le naklelo talantia pah pinan in nesan nasitbon.

⁶Fatu napoitan nain in nanan napoitan iun leko, ma in afu matua mnatu nesaf.

⁷Kaka tasi ka nahin fa lanan neu he nao, ma kol ot kase fe ka natpen anao natuin fa amsa.

⁸Meo asu ma mu'i fui bian ka nao natuin fa lanan le kan mu'i nit fa hanaf he nati' sin ankon.

⁹Atoni anhani nape' fatu, ma anpukai nani tubu antia in nanan.

¹⁰Leka in nabol nani tub fatu, in napeni nani noni muti le maupa.

¹¹In anhani antia noenu sin atnanan, ma napoitan sa' le na'tol'on.

¹²Mes he tami nek ahinet nane anbi me ka? Hit tanoina anbi me he nati' hit tahin?

¹³Nek ahinet nane ka etfa mansian in atnanan. Namneo sin ka nahin fa in otan.

¹⁴Tasi ma tasi ainaf sin tu'in nauab neu nek ahinet nane sin kan mu'i fa.

¹⁵Nek hine nane kat seka fa teki mnatu nesaf, ma kat sos tane fa teki noni muti amsa.

¹⁶Ka tanesa in upan nok mnatu ma noni nesaf le up matani.

¹⁷Mnatu ai noni maupa ka tanesa fa nok in, ma kat baen fa teki noni nesaf na'ko mnatu nesaf amsa.

¹⁸Nek hine nane in upan nesi na'ko fatu alimat, fatu muti klima ai bale maupa abit tasi.

¹⁹Fatu klima mate molo ai mnatu nesaf, in upan nane kan tia fa nek hine.

²⁰Nek hine nane in na'u na'ko me ka? Hit tapeni lasi hine nane na'ko me ka?

²¹Ka tit fa amonit mese le nit in, leka kolo abit neno tnanan amsa kan kiso nit fa in.

²²Lasi maten ma nopu maten amsa nauab, sin ala nen a'seof.

²³Al Uisneno es nahin nek mahine nane in balan, al In es nahin lanan het nao teune,

²⁴natuin In es nit pah pinan in tu'an ma in meunuan; in antae ale sa' le anbi neno in kupun.

²⁵Leka In anfe be'it matani neu anin, ma In anlek ma anlulu tasi sin tu'an.

²⁶Leka In anlek bale ma le ulan anmofu anbine, ma lanan neu limat ma lotos anao natuine;

²⁷anbi tabu le nane nek ahinet natonon, ma antai in upan, nalali te In anlomi nani.

²⁸Uisneno nakua a'an neu mansian, “So mimtausan Uisneno he mipeni nek hine. Mi'lob hi aom na'ko bulalu he nati' hi mihin.”