Read Uab Meto AYUB 29 Bible Online

AYUB 29 - Uab Meto bible

AYUB 29

¹Nai Ayub nanaob in uab piut nak,

²“So bait au monit on afi unun, tabu le Uisneno anpanat kau.

³In antuntaku kau piut, ma In antana kau, tabu au nao utuin mesokan.

⁴Nane au neno malinat sin anbi au monik, leka Uisneno anpanat au ume neki In athoen.

⁵Tabu le nane Uisneno Akuasat Afin-finit fe In nao nabua nok kau, es nanet au anah sin anfun nan kau.

⁶Au mu'it sin napoitan susu anaek. Ma bub fua mina napoitan min fomeni, maski nak ansen anbi nai fatu.

⁷Es nanet ale mnasi abit kot antok nabuan, ma au tok anbi au bale.

⁸Atoni munif sin na'lon tabu sin naiti sin human ma sin nit kau. Ma nok nek baun ale mnasi sin anhake; ma nausi neu kau.

⁹Sin anaet sin nasnasab sin uab,

¹⁰ma atoni maneka sin nasnasab in molok.

¹¹Es-esat naskek leka sin nen neu kau; sekau le nit kau sin anpules au mepu.

¹²Natuin au tuntaku amamu'it sin; ma au fiti li'an manat le kan mu'in fa ababat.

¹³Atoni asusal sin es anpules kau, au fiti bife banu sin talantia sin monin namne.

¹⁴Au mepu nok nek muti ma kan mu'i fa amle'ut; au lomi he uton amneot.

¹⁵Au fani mataf neu atoni afolot; ma au fani haef neu atoni ahe a'olet.

¹⁶Au fani amaf neu atoni amamu'it; au fani asoit neu atoni anao mnemat.

¹⁷Au u'ipu atoni amaufinut sin matanin, ma au ufetin sin na'ko sin nopu maten.

¹⁸Au fnekat esle' ua mnanu, ma nok amneot au mate anbi au ume anmes kun.

¹⁹Au fani on hau le in monin namlia, in a'ba'an nane napeni oe ma in tlaen nane napete natuin tani'.

²⁰Ale atoni anpules kau, ma au ka oel it fa anbi au monik.

²¹Atoni sin anta'an leka au unoina; sin ale au uab sin anheke nok leko.

²²Leka au umolok ulali, kan mu'i fa le hen talu anteni; au uab sin ansai ma antom onle ulan es ansai.

²³Sin ansimo au uab sin nok malinat, on atof lene ansimo ulan anbi tabu tuna nasuf.

²⁴Au mani ok sin leka sin nekan nas'unu; au malinat namepan sin nok be'it matani.

²⁵Au es afani atopus, ma au es aiti fekat. Au top sin on usif anbi in meo naek sin tnanan, ma au halin sin anbi sin nek nu'ut.