Read Uab Meto AYUB 30 Bible Online

AYUB 30 - Uab Meto bible

AYUB 30

¹Mes tabu le i atoni munif mese nale'uf kau. Anbi ahunut au it sin amaf sin anhamu'iok ma sin anfani on au atuku bib kase sin nok asu atukus.

²Sin ka maota fa anbi kau natuin sin kan mu'i fa be'it ma matani.

³Sin namnahan ma nasusbok, talantia nahan hau ba'meto anbi mnela snaen.

⁴Sin anbok kisan anbi mnela snaen ma sin nah, leko non ai in ba'an.

⁵Anli'u sin neki hau tuka onle atoni anli'u abakat.

⁶Sin na'tolo' anbi nuat in nanan; bola sin anfani on ume neu sin.

⁷Sin nanoi on mu'it anbi nasi in nanan, sin anpuknok onle kisan anbi nasi nanan.

⁸Sin ka makana fa ma ka maupa fa, onle atoni-atoni le anli'u sin na'ko sin pah.

⁹Tabu le i sin nem ma anmanis kau; sin anmo'e kau onle meu mataf.

¹⁰Au umle'u ma uhanisin anbi sin kisot, ma sin nakinu au humak neki nape.

¹¹Uisneno anmo'e kau talantia au oel ma ka painoet fa, es nanet sin nafetin sin maunu neu kau.

¹²Pukan nane anken kau na'ko mat, ma sin natenab ma naneob he nati' namofu kau.

¹³Sin an eka au lanan neu he nale'un kau; ma ka tit fa es hen eka sin leka sin anken kau.

¹⁴Sin nale'un au kot onle noe sako; ma sin al sin nem ma Nameku kau.

¹⁵Amtaus anaek nahenu au nekak; au ka maupa kau fa onle anin anfu. Au malinat nane namneku onle nope anfin ma ankon.

¹⁶Ala kle'ot au mate natuin au nukat nane kan hakafon fa.

¹⁷Au nuif sin anmaninun anbi fai, menas nanonson ma ka namneku nit fa.

¹⁸Uisneno In na' kau neu au sobalu in to'an talantia au bale pake ankil au aok.

¹⁹In anpolin natam kau neu klofo in nanan, ma au fani onle knutu.

²⁰Au haman ko, koi Uisneno mes Ho ka mutae kau fa; leka au onen, Ho kam kius kau fa.

²¹Ho muton Ho nek to'as neu kau, ma Hom tamni' kau meki Ho be'im oke.

²²Ho mufetin anin he natpeneb kau; ma anbi anin naek in nanan Ho mute'un au aok.

²³Au uhin Ho meki kau neu nope maten, anbi bale le Ho mubuaba ale amonit.

²⁴Nansa' es Ho maken mok atoni amle'ut, le kan mo'e fa sa' leko al au toti he mufetin kau?

²⁵Ai au ka kae fa ok atoni asusal sin ma nek umnau atoni amamu'it sin?

²⁶Au ufnekan malinat ma meusine, mes al hamu'it ma mesokan es anbol.

²⁷Susal ma nu'ut es napisu kau, au nuka nane anfonat; ma anao piut na'ko neno nao neu neno.

²⁸Au u oin-oinsok anbi mesokan le kan mu'i fa pina; au hake anbi atoni amfaut sin matan ma toti tuntakus.

²⁹Au hanak nahenu nok sananet ma sakoit, onle han nu'ut na'ko meo asu ma bikase paha snaen.

³⁰Au aok apo'an metan; natuin nek nanan au aok anput.

³¹Anbi ahunut au nen a'leku ma heo in hanan le neki malinat, mes muni le i al kulut kaet.