Read Uab Meto AYUB 31 Bible Online

AYUB 31 - Uab Meto bible

AYUB 31

¹Au manta'en ulali nok supat, li'feto munif au mes ka kiso teni fa nok nek sinmakat.

²Uisneno mes hen mo'e sa' anteni neu kit? In mes anseun banin mansian in mo'et onme ka?

³Ua amle'ut ma maten In mes anfe nani neu atoni amaufinut!

⁴Uisneno nahin sin mo'et; ma In nit ale au lanan monit.

⁵Au aiti supat natuin au ka mo'e fa amle'ut, ma au fe ka upoiba fa atoni bian.

⁶Maut he nati' Uisneno antai kau neki In tnais amneot, ma In mes nahin neu au ka usanab fa.

⁷Leka au he peo na'ko lanan amneot, ai au nekak au tao neu lasi amle'ut, ai au nimak nahenu nok sanat,

⁸es nanet maut he nati' atoni bian es nah sa' le au kifun ani, ma ale au mepu in nesan noe nain.

⁹Bait oin au nekak anmofu neu au aok bian in fe, ma au u'tolo' ma utnu' in na'ko eno kotin,

¹⁰maut he nati' au fe nahan neu atoni bian; ma maut he nati' in antup anbi atoni bian in hala.

¹¹Kalu sanat le neki hanisit nane au mo'e, maut he nati' au simo in kasat.

¹²Sanat nane in amsopun es lasi maten, ma mes nok tasi ai ale sa' le au mu'i maut he nati' in notu nani.

¹³Leka au ate ansakoi natuin au ka fe fa neune haet in upan, au nen in ma au mo'e neune nok nek muti.

¹⁴Kalu ka on fa nane, onme neu au he hake anbi au Uisneno In matan? Au mes utae In ak sa' ka leka In nem ma anlefi au lasi?

¹⁵Ai ka Uisneno fa es anmo'e kau, ma anmo'e au ate sin amsa?

¹⁶Au tuntaku atoni amamu'it ma au ka ufetin fa bife banu sin anmoni nok nek as'unu.

¹⁷Au fe ka ufetin it fa li'an manat sin hen moni anbi amnahas natuin au uloitan mnahat anaek.

¹⁸Na'ko sin fe na'baun au panat sin; au topu sin piut anbi au neno monit.

¹⁹Leka au it atoni amanukat, ma ka nabe'i fa hen sos bale pake,

²⁰au amu in eki pilu manafu le anmo'e na'ko au bibi kase, es nanet in anpules kau neki sin nekan oke.

²¹Oni kalu au tamni' li'an manat sin monit, natuin au palsai au mes is anbi lasi,

²²maut he nati' au nimak nua sin nat ipu, talantia natlaku na'ko au benak.

²³Au ka ube'i fa he mo'e onan, natuin kasat na'ko Uisneno naskekeb au nekak.

²⁴Au ka futun fa au nekak neu au maus,

²⁵ai unaebok natuin au mu'ik.

²⁶Au ka ululi ubes fa neu manas in pinan, ai neu funan in pinan amasat.

²⁷Au ka futun fa au nekak neune; ai u'aiti au nimak he ululi ma ubes neune.

²⁸Sanat onle nane maut he napeni kasat maten; natuin ankoti nalali Uisneno Akuasat Afin-finit.

²⁹Au ka malin fa natuin au musu sin nasusbok, ai umlil natuin sin napeni hamu'it.

³⁰Au ka onen fa he nati' au musu sin anmate; au ka mo'e fa sanat namnes onane.

³¹Atoni-atoni le anmepu anbi au ume sin nahin, neu au hao sekau am sekau anbi au ume nanan.

³²Au usoitan au ume neu atoni anao mnemat; ma au ka ufetin fa sin hen tup anbi lanan in ninen.

³³Atoni bian naninib sin sanat, mes au ka mo'e it fa on sin.

³⁴Au ka umtausan fa atoni amfaun sin molok, ma au ka filoli fa atoni le nanebet kau. Au ka umaika fa anbi au ume he nati' au ta' natuin umtausan akan ma si'ut.

³⁵Kan mu'i fa atoni le anlomi he nen au uab sin? Au aiti supat neu ale lasi nane namneo. So nati' Uisneno Akuasat Afin-finit natae kau. Oin bait au musu in uab sin neu kau au tui ani sin ma au so'i sin,

³⁶oin nok malinat au usae sin anbi au benak, ma au tao sin anbi au nakak anfani sobe mnisat.

³⁷Au mes uton ale lasi le au mo'e ani neu Uisneno; au mes a'hake anbi In matan nok malinat ma u'aiti au nakak.

³⁸Oin bati nain le au foi nane au ubak, ma au usik an na'ko in tuan amneot,

³⁹Oin bati afu in nesan au uah ani, ma atof lene le ansen au ufetin sin he namnah,

⁴⁰maut he nati' kais sain ma aen kase es anmoni anbi au lene, mes maut he nahenu nok kisan ma hun.” Nai Ayub in uab sin antu' onle nane.